అయోధ్యలోని శ్రీరామ జన్మభూమి ఆలయానికి సంబంధించిన విరాళాల దుర్వినియోగం ఆరోపణల కేసులో సాధువులు, సంతులకు ఎలాంటి ప్రమేయం లేదని ఉత్తరప్రదేశ్ ముఖ్యమంత్రి యోగి ఆదిత్యనాథ్ స్పష్టం చేశారు. ప్రత్యేక దర్యాప్తు బృందం (సిట్) సమర్పించిన ప్రాథమిక నివేదికలో ఇదే విషయం వెల్లడైందని ఆయన తెలిపారు.
ఈ వ్యవహారంపై కొందరు రాజకీయ పార్టీలు వాస్తవాలను పక్కనబెట్టి రాజకీయ ప్రయోజనాల కోసం అనవసర వివాదాన్ని సృష్టిస్తున్నాయని సీఎం యోగి పేర్కొన్నారు. ఉత్తరప్రదేశ్ ప్రతిష్ఠను దెబ్బతీయడంతో పాటు ప్రజలను తప్పుదోవ పట్టించే ప్రయత్నాలు జరుగుతున్నాయని ఆయన విమర్శించారు.
అలాగే, అసెంబ్లీలో నిర్ణీత కార్యక్రమాలపై చర్చ జరగకుండా సభా కార్యకలాపాలకు అంతరాయం కలిగించడం ప్రజాస్వామ్య స్ఫూర్తికి, రాజ్యాంగబద్ధ వ్యవస్థకు అనుకూలం కాదని ఆయన అభిప్రాయపడ్డారు.
ఈ అంశాన్ని ఉత్తరప్రదేశ్ అసెంబ్లీ వర్షాకాల సమావేశాల్లో ప్రస్తావిస్తామని ప్రతిపక్షాలు ప్రకటించడంతో ఈ కేసు మరోసారి చర్చనీయాంశంగా మారింది. ఇదిలా ఉండగా, ఈ కేసు దర్యాప్తు కోసం ఐజీ కిరణ్ నేతృత్వంలో కొత్త ప్రత్యేక దర్యాప్తు బృందం (సిట్)ను ఏర్పాటు చేసినట్లు జూలై 27న రాష్ట్ర ప్రభుత్వం సుప్రీంకోర్టుకు తెలియజేసింది. ఈ కేసు దర్యాప్తులో భాగంగా ఇప్పటివరకు ఎనిమిది మందిని అరెస్టు చేసినట్లు అధికారులు వెల్లడించారు.
