లండన్: బ్రిటన్లోని పీటర్బరో నగరంలో గత నాలుగు దశాబ్దాలుగా హిందువులకు ఆధ్యాత్మిక, సామాజిక కేంద్రంగా కొనసాగుతున్న ‘న్యూ ఇంగ్లాండ్ కాంప్లెక్స్’ విక్రయ నిర్ణయం తీవ్ర వివాదానికి దారితీసింది. ఈ కాంప్లెక్స్లో ఉన్న హిందూ ఆలయ స్థలాన్ని వేలం అనంతరం ‘యునైటెడ్ కింగ్డమ్ ఇస్లామిక్ మిషన్’కు విక్రయించాలని పీటర్బరో నగర మండలి నిర్ణయించడంతో హిందూ సంఘాలు ఆందోళన వ్యక్తం చేస్తున్నాయి.
ఈ ప్రాంగణంలో కార్యకలాపాలు నిర్వహిస్తున్న ‘భారత్ హిందూ సమాజ్’ ఆలయం పీటర్బరోతో పాటు పరిసర ప్రాంతాల్లో నివసిస్తున్న వేలాది మంది హిందువులకు ప్రధాన ప్రార్థనా కేంద్రంగా కొనసాగుతోంది. ఆలయానికి 40 ఏళ్ల చరిత్ర, సామాజిక సేవలను పరిగణనలోకి తీసుకోకుండా ఈ నిర్ణయం తీసుకున్నారని సంస్థ ఆరోపిస్తోంది.
హైకోర్టులో న్యాయపోరాటం
విక్రయ ప్రక్రియను సవాలు చేస్తూ భారత్ హిందూ సమాజ్ బ్రిటన్ హైకోర్టులో పిటిషన్ దాఖలు చేసింది. వేలానికి ముందు నిర్వహించిన ఆస్తి విలువ నిర్ధారణలో లోపాలు ఉన్నాయని, నిర్ణయ ప్రక్రియ పారదర్శకంగా జరగలేదని పిటిషన్లో పేర్కొంది. అనంతరం 2026 ఫిబ్రవరిలో హైకోర్టు మధ్యంతర స్టే మంజూరు చేయడంతో, ఆస్తి విక్రయ ప్రక్రియను తాత్కాలికంగా నిలిపివేశారు.
ప్రస్తుతం పీటర్బరో నగర మండలి తీసుకున్న నిర్ణయం చట్టబద్ధంగా జరిగిందా లేదా అనే అంశంపై న్యాయ సమీక్ష కొనసాగుతోంది.
“ఇస్లామిక్ మిషన్పై కాదు.. ప్రక్రియపైనే అభ్యంతరం”
ఈ వివాదంపై భారత్ హిందూ సమాజ్ స్పందిస్తూ, ‘యునైటెడ్ కింగ్డమ్ ఇస్లామిక్ మిషన్’ సంస్థపై తమకు ఎలాంటి అభ్యంతరం లేదని స్పష్టం చేసింది. తమ అభ్యంతరం పూర్తిగా పీటర్బరో నగర మండలి అనుసరించిన విక్రయ విధానం, నిర్ణయ ప్రక్రియపైనే అని వెల్లడించింది.
ఆలయం మూసివేస్తే వేలాది మంది హిందువులకు ఇబ్బందులు
భారత్ హిందూ సమాజ్ వివరాల ప్రకారం, ఈ ఆలయం పీటర్బరో ప్రాంతంలోని సుమారు 4,500 మంది హిందువులకు ప్రధాన ధార్మిక కేంద్రంగా ఉంది. ఒకవేళ ఆలయం మూసివేయాల్సి వస్తే, భక్తులు పూజలు, ఆధ్యాత్మిక కార్యక్రమాల కోసం కేంబ్రిడ్జ్ లేదా లీసెస్టర్ నగరాలకు సుదూర ప్రయాణం చేయాల్సిన పరిస్థితి ఏర్పడుతుందని సంస్థ ఆందోళన వ్యక్తం చేసింది.
ప్రభుత్వ ఆస్తుల విక్రయాలపై చర్చ
బ్రిటన్లో పెరుగుతున్న ఆర్థిక ఒత్తిడి, ప్రభుత్వ నిధుల కోతల నేపథ్యంలో అనేక స్థానిక మండలాలు బడ్జెట్ లోటును భర్తీ చేసేందుకు కమ్యూనిటీ భవనాలు, క్రీడా కేంద్రాలు, ఇతర ప్రభుత్వ ఆస్తులను విక్రయిస్తున్నాయి. ఈ నేపథ్యంలో పీటర్బరోలోని ఈ ఆలయ స్థల విక్రయ నిర్ణయం కూడా విస్తృత చర్చకు దారితీసింది. ప్రస్తుతం ఈ వ్యవహారంపై హైకోర్టు తుది నిర్ణయం కోసం హిందూ సమాజం ఎదురుచూస్తోంది.
