అఖిల భారతీయ ప్రాంత ప్రచారకుల బైఠక్ కు ఏర్పాట్లు

రాష్ట్రీయ స్వయంసేవక్ సంఘ్ (RSS) అఖిల భారతీయ ప్రాంత ప్రచారకుల బైఠక్ కర్నాటకలోని బెళగావిలో జరగనున్నాయి. జులై 10,11,12 తేదీల్లో జరగనున్నాయి. ఈ నేపథ్యంలో ఈ బైఠక్ జరిగే వేదిక చుట్టూ రెండు కిలోమీటర్ల మేర పోలీసులు రెడ్ నోజ్, నో ఫ్లై జోన్ ప్రకటించారు. భారీ భద్రతా ఏర్పాట్లు చేశారు. మరో వైపు ఎనిమిది రోజుల పర్యటన నిమిత్తం సర్ సంఘచాలక్ మోహన్ భాగవత్ సోమవారం నగరానికి చేరుకున్నారు. ఈ నేపథ్యంలో పోలీసులు భద్రతా కారణాల రీత్యా పలు ట్రాఫిక్ ఆంక్షలను విధించారు.

జూలై 6 సాయంత్రం హైదరాబాద్ నుంచి ప్రత్యేక విమానంలో డాక్టర్ భాగవత్ సాంబ్రా విమానాశ్రయంలో దిగారు. అక్కడ ప్రాంత ప్రచారకులు, క్షేత్ర ప్రచారకులు, ఇతర ప్రతినిధులు ఆయనకు స్వాగతం పలికారు.

మోహన్ భాగవత్ తో పాటు ఆరెస్సెస్ ప్రతినిధులు కూడా వస్తున్న నేపథ్యంలో , బెళగావి డిప్యూటీ కమిషనర్ మహమ్మద్ రోషన్ జూలై 6 నుండి జూలై 14 వరకు ఉద్యమబాగ్ లోని ఫౌండ్రీ క్లస్టర్ గెస్ట్ హౌస్, ఆనగోల్ లోని సంత్ మీరా స్కూల్ మరియు గూడ్స్ షెడ్ రోడ్డులోని జగన్నాథరావు జోషి స్మారక భవన్ చుట్టూ రెండు కిలోమీటర్ల పరిధిని రెడ్ జోన్ మరియు నో-ఫ్లై జోన్‌గా ప్రకటించారు.

ఈ నిషేధాజ్ఞల ప్రకారం, నోటిఫైడ్ ఏరియా పరిధిలో డ్రోన్లు, మానవరహిత వైమానిక వాహనాలు (UAVలు), మానవరహిత విమాన వ్యవస్థలు (UAS), రిమోట్ కంట్రోల్డ్ ఫ్లయింగ్ డివైజ్‌లు మరియు పారాగ్లైడర్ల నిర్వహణను పూర్తిగా నిషేధించారు. పోలీసులు మూడు వేదికల చుట్టూ నిఘాను ముమ్మరం చేశారు, కొన్ని ప్రాంతాలకు రాకపోకలను నిశితంగా పర్యవేక్షిస్తున్నారు. సమావేశ వేదికలకు దారితీసే ముఖ్యమైన రహదారులపై భద్రతా సిబ్బందిని కూడా మోహరించారు. అదనపు ఇంటెలిజెన్స్ మరియు విధ్వంసక నిరోధక చర్యలను అమలు చేశారు.

ఈ సమావేశాలకు దేశ వ్యాప్తంగా వున్న ప్రాంత ప్రచారకులు, సహ ప్రాంత ప్రచారకులు, క్షేత్ర ప్రచారకులు, సహ క్షేత్ర ప్రచారకులు పాల్గొంటారు. ఈ విషయాన్ని ఆరెస్సెస్ అఖిల భారతీయ ప్రచార ప్రముఖ్ సునీల్ అంబేకర్ తెలిపారు.

సమావేశంలో శాఖా స్థాయిలో ‘కార్య యోజన’ (వార్షిక ప్రణాళికలు) అమలుకు సంబంధించిన అంశాలపై సమగ్ర చర్చలు జరుగుతాయి. సంఘ్ శతాబ్ది ఉత్సవాల సందర్భంగా చేపట్టిన శాఖా కార్య విస్తరణను ఈ సమావేశం సమీక్షిస్తుంది. అలాగే శాఖల విస్తరణను గరిష్ట స్థాయికి చేర్చడానికి అవసరమైన ప్రణాళికలపై చర్చిస్తుంది. 2026 నాటి సంఘ్ శిక్షణా శిబిరాల నివేదికలు, సమీక్ష, శతాబ్ది సంవత్సరంలో పూర్తయిన కార్యక్రమాల సమీక్ష, మిగిలిన నిర్ణీత కార్యక్రమాల ప్రణాళిక, 2026–27 సంవత్సరానికి సర్ సంఘచాలక్ డా. మోహన్ భగవత్ ‘ప్రవాస యోజన’ (పర్యటన ప్రణాళికలు) వంటి అంశాలు ఈ చర్చలలో భాగంగా ఉంటాయి.

సంఘ్ వ్యవస్థాగత నిర్మాణం ప్రకారం, మొత్తం 11 క్షేత్రాలు, 46 ప్రాంతాల నుండి కార్యకర్తలు హాజరవుతారని భావిస్తున్నారు. వీటితో పాటు, సంఘ్ ప్రేరణతో నడిచే 32 సంస్థలకు చెందిన అఖిల భారతీయ సంఘటన కార్యదర్శులు కూడా ఇందులో పాల్గొంటారు. 2026 మార్చిలో సమల్ఖా (హర్యానా)లో జరిగిన ‘ప్రతినిధి సభ’ అనంతరం, ఏప్రిల్, మే, జూన్ నెలల్లో దేశవ్యాప్తంగా వివిధ స్థాయిలలో సంఘ్ శిక్షణా శిబిరాలు నిర్వహించారు.

సంఘ శతాబ్ది సంవత్సరం (2025–26) మిగిలిన కార్యక్రమాలు విజయదశమి వరకు, అంటే 20 అక్టోబర్ 2026 వరకు కొనసాగుతాయి. సమావేశానికి హాజరయ్యే ప్రచారక్‌లు ప్రస్తుత పరిస్థితులకు సంబంధించిన అనుభవాలు, జనాభా గణన వంటి ముఖ్యమైన సమకాలీన అంశాల గురించి కూడా చర్చిస్తారు.