ఆర్‌బీసీ గౌరవ ఫెలోషిప్ అందుకున్న కర్ణాటక సంగీత గాయని

భారతీయ శాస్త్రీయ సంగీతాన్ని ప్రపంచ వేదికపై మరింత విస్తృతంగా పరిచయం చేస్తూ విశిష్ట సేవలందిస్తున్న బెంగళూరుకు చెందిన ప్రముఖ కర్ణాటక గాయని డాక్టర్ రాధికా బాలకృష్ణన్ మరో అరుదైన ఘనతను సొంతం చేసుకున్నారు. యూకేలోని Royal Birmingham Conservatoire (RBC) ప్రతిష్టాత్మక గౌరవ ఫెలోషిప్ ను అందుకున్న తొలి కర్ణాటక గాయనిగా ఆమె చరిత్ర సృష్టించారు. సంగీత ప్రదర్శనలతో పాటు బోధన, పరిశోధన, భారతీయ సంగీత ప్రచారంలో ఆమె చేసిన విశేష కృషికి గుర్తింపుగానే ఈ అత్యున్నత గౌరవం లభించింది.

నాన్న ప్రోత్సాహంతో ప్రారంభమైన సంగీత ప్రయాణం
పదేళ్ల వయసులోనే కర్ణాటక శాస్త్రీయ సంగీతాన్ని అభ్యసించడం ప్రారంభించిన రాధికకు సంగీతంపై చిన్ననాటి నుంచే అపారమైన ఆసక్తి ఉండేది. కొత్త పాటలు నేర్చుకుని పాడడం ఆమెకు ఎంతో ఇష్టం. ఆమె ప్రతిభను గుర్తించిన తండ్రి శాస్త్రీయ సంగీతంలో ముందుకు సాగాలని ప్రోత్సహించారు.

కుటుంబం మైసూరుకు మారిన అనంతరం హెచ్.ఎన్. రాజలక్ష్మి వద్ద సంగీత శిక్షణ పొందిన రాధిక, మైసూరు విశ్వవిద్యాలయంలో లలిత కళల్లో మాస్టర్స్ పూర్తి చేశారు. నాటకం, భరతనాట్యం, కర్ణాటక సంగీతం అనే మూడు ప్రధాన విభాగాల్లో ఒకేసారి ప్రతిభ చాటుతూ మూడు బంగారు పతకాలు సాధించారు. అనంతరం భారతీయ శాస్త్రీయ సంగీతంపై లోతైన పరిశోధనలు చేసి పీహెచ్‌డీ పట్టా పొందారు.

సంప్రదాయానికి ఆధునిక శైలుల మేళవింపు
త్యాగరాజ స్వామి, ముత్తుస్వామి దీక్షితార్ కీర్తనలను ఆలపించడంలో ప్రావీణ్యం కలిగిన రాధికకు కర్ణాటక శాస్త్రీయ సంగీతంలో 15 ఏళ్లకు పైగా అనుభవం ఉంది. సంప్రదాయ సంగీతానికి పాశ్చాత్య సంగీత శైలులను జోడిస్తూ దేశ, విదేశాల్లో అనేక సంగీత కచేరీలు నిర్వహించారు. లండన్, బర్మింగ్‌హామ్ సహా పలు నగరాల్లో భారతీయ శాస్త్రీయ సంగీత మాధుర్యాన్ని విదేశీ ప్రేక్షకులకు పరిచయం చేశారు.

గాయనిగానే కాదు.. గురువుగానూ ప్రత్యేక గుర్తింపు
సంగీత ప్రదర్శనలతో పాటు బోధనలోనూ రాధిక విశేష సేవలందిస్తున్నారు.
* 2023లో బర్మింగ్‌హామ్ సిటీ యూనివర్సిటీలోని ఇండియన్ స్టడీస్ విభాగానికి చెందిన ఐసీసీఆర్ ఛైర్ బాధ్యతలు నిర్వహిస్తూ భారతీయ సంగీతాన్ని విదేశీ విద్యార్థులకు బోధించారు.
* ప్రస్తుతం శంకర్ మహదేవన్ అకాడమీలో సీనియర్ ప్రొఫెసర్‌గా పనిచేస్తూ యువతకు సంగీత శిక్షణ అందిస్తున్నారు. అకాడమీ సంగీత పాఠ్య ప్రణాళిక రూపకల్పనలోనూ కీలక పాత్ర పోషించారు.
* యూకేలోని Royal Birmingham Conservatoireలో విజిటింగ్ ప్రొఫెసర్‌, ఆర్టిస్ట్‌గా సేవలందిస్తూ భారతీయ సంగీతాన్ని అంతర్జాతీయ స్థాయిలో విస్తరిస్తున్నారు.

తొలి కర్ణాటక గాయనిగా చరిత్ర
భారతీయ శాస్త్రీయ సంగీతాన్ని ప్రపంచవ్యాప్తంగా ప్రాచుర్యం కల్పించడంలో చేసిన విశేష కృషికి గుర్తింపుగా రాధికకు రాయల్ బర్మింగ్‌హామ్ కన్జర్వేటోయర్ గౌరవ ఫెలోషిప్ ప్రదానం చేసింది. ఈ ప్రతిష్టాత్మక గౌరవం అందుకున్న తొలి కర్ణాటక గాయనిగా ఆమె అరుదైన రికార్డు సృష్టించారు.

ఈ సందర్భంగా స్పందించిన రాధిక, “ఈ ఫెలోషిప్ అందుకోవడం ఎంతో ఆనందంగా ఉంది. భవిష్యత్ తరాలకు గొప్ప సంగీతాన్ని అందించాలనే నా ప్రయత్నానికి దక్కిన గౌరవమిది. సంగీతానికి సరిహద్దులు ఉండవని నేను ఎప్పుడూ నమ్మాను. ఈ గుర్తింపు ఆ నమ్మకాన్ని మరింత బలపరిచింది” అని తెలిపారు.