విదేశీ పేరు లేదా విదేశీ పౌరసత్వం ఉన్నంత మాత్రాన ఒక వ్యక్తి హిందువు కాదని చెప్పలేమని మద్రాస్ హైకోర్టు కీలక తీర్పు వెలువరించింది. హిందూ మతాన్ని స్వీకరించడానికి ప్రత్యేక సర్టిఫికెట్లు, మత మార్పిడి వేడుకలు లేదా అధికారిక ధ్రువీకరణ అవసరం లేదని స్పష్టం చేసింది. మనఃస్ఫూర్తిగా హిందూ మతాన్ని విశ్వసిస్తూ, దాని ఆచారాలు, సంప్రదాయాలను అనుసరిస్తే వారు హిందువులుగానే పరిగణించబడతారని పేర్కొంది.
అమెరికా పౌరురాలు లారా ఫ్రాన్సెస్ అయ్యంగార్కు సంబంధించిన కేసును విచారించిన ధర్మాసనం, ఆమెను “అమెరికన్ క్రైస్తవ మహిళ”గా పేర్కొంటూ తమిళనాడు హిందూ దేవాదాయ శాఖ జారీ చేసిన ఉత్తర్వులను కొట్టివేసింది. విదేశీయులు అనగానే వారు క్రైస్తవులేనని భావించడం సరైనది కాదని కోర్టు స్పష్టం చేసింది.
ఒక వ్యక్తి హిందూ జీవన విధానాన్ని ఆచరిస్తూ, హిందూ మతంపై విశ్వాసంతో జీవిస్తే అతను లేదా ఆమె హిందువుగానే గుర్తింపు పొందుతారని ధర్మాసనం పేర్కొంది. హిందూ మతాన్ని స్వీకరించేందుకు ప్రత్యేక మత మార్పిడి కార్యక్రమాలు లేదా ప్రభుత్వ ధ్రువీకరణ తప్పనిసరి కాదని వ్యాఖ్యానించింది.
ఈ నేపథ్యంలో తంజావూరులోని ఆలయంలో హిందూ మహిళలకు లభించే పూజ, దర్శనం తదితర హక్కులు లారా ఫ్రాన్సెస్ అయ్యంగార్కు కూడా సమానంగా వర్తిస్తాయని మద్రాస్ హైకోర్టు ఆదేశించింది. అయితే ఆలయ ఆగమ శాస్త్రాలు, సంప్రదాయాలు, అమలులో ఉన్న నిబంధనలకు లోబడి ఈ హక్కులను కల్పించాలని స్పష్టం చేసింది.
విదేశీ పౌరసత్వం లేదా పేరు ఆధారంగా హిందూ గుర్తింపును నిరాకరించకూడదని, వ్యక్తి విశ్వాసం, ఆచరణ, హిందూ జీవన విధానమే ప్రధాన ప్రమాణాలని హైకోర్టు చేసిన వ్యాఖ్యలు ప్రాధాన్యం సంతరించుకున్నాయి. విదేశాల్లో నివసిస్తున్న లేదా విదేశీ పౌరసత్వం కలిగిన హిందూ భక్తుల ఆలయ ప్రవేశ హక్కులు, మత గుర్తింపుకు సంబంధించి ఈ తీర్పు ఒక కీలక మార్గదర్శకంగా నిలిచే అవకాశం ఉందని న్యాయ నిపుణులు అభిప్రాయపడుతున్నారు.
