తిరువనంతపురం: కేరళలోని ‘ఎలోహిమ్ గ్లోబల్ వర్షిప్ సెంటర్’కు చెందిన పాస్టర్ బినూ వాజముట్టోంపై మైనర్లపై లైంగిక దాడి, అక్రమ నిర్బంధం, బలవంతపు శ్రమకు గురిచేసినట్లు వచ్చిన ఆరోపణలు రాష్ట్రంలో చర్చనీయాంశంగా మారాయి. ఇడుక్కి జిల్లా అనకరకు చెందిన 17 ఏళ్ల బాలుడు చేసిన ఫిర్యాదు ఆధారంగా కేసు వెలుగులోకి వచ్చింది. ఈ నేపథ్యంలో పాస్టర్ను అరెస్టు చేయాలని డిమాండ్ చేస్తూ పలువురు నిరసనలకు దిగారు.
పోలీసులకు అందిన ఫిర్యాదు ప్రకారం, పాస్టర్ బినూ వాజముట్టోం నిర్వహిస్తున్న ‘స్నేహతానల్’ సంస్థలో కొందరు మైనర్లపై లైంగిక దాడులు జరిగాయని, వారిని అక్రమంగా నిర్బంధించి బలవంతంగా పని చేయించారని ఆరోపించారు. ఈ ఆరోపణలపై పోలీసులు దర్యాప్తు చేపట్టారు.
జూన్ 21, 2026న కేరళలోని పతనంతిట్టలో ఉన్న ‘ఎలోహిమ్ గ్లోబల్ వర్షిప్ సెంటర్’ ఎదుట పాస్టర్ను వెంటనే అరెస్టు చేయాలని డిమాండ్ చేస్తూ బీజేపీ కార్యకర్తలు నిరసన కార్యక్రమం నిర్వహించారు.
నిరసనల నేపథ్యంలో ఎలాంటి అవాంఛనీయ ఘటనలు జరగకుండా పోలీసులు ప్రార్థనా కేంద్రం పరిసరాల్లో అదనపు భద్రతా బలగాలను మోహరించారు.
