భారతదేశపు గొప్ప జ్ఞాన సంప్రదాయాల ద్వారా శాస్త్రీయ జ్ఞానం వ్యాప్తి

బనారస్ హిందూ విశ్వవిద్యాలయంలో విజ్ఞాన భారతి’ ఏడో జాతీయ సదస్సు జరిగింది. సైన్స్ సెంటర్ (BHU), ఇండియన్ ఇన్‌స్టిట్యూట్ ఆఫ్ టెక్నాలజీ (BHU) మరియు ఇంటర్-యూనివర్సిటీ సెంటర్ ఫర్ టీచర్ ఎడ్యుకేషన్ సంయుక్త ఆధ్వర్యంలో జరుగుతున్న ఈ రెండు రోజుల సదస్సులో, దేశ విదేశాలకు చెందిన 1,300 మందికి పైగా శాస్త్రవేత్తలు, పరిశోధకులు, విద్యావేత్తలు, విధాన రూపకర్తలు మరియు పరిశ్రమల ప్రతినిధులు పాల్గొంటున్నారు.

ఈ సదస్సుకి యూపీ సీఎం యోగి, ఆరెస్సెస్ అఖిల భారతీయ ప్రచార ప్రముఖ్ సునీల్ అంబేకర్ ముఖ్య అతిథులుగా హాజరయ్యారు. ఈ సందర్భంగా యోగి ఆదిత్యనాథ్ మాట్లాడుతూ ప్రసంగిస్తూ, పరిశోధన మరియు ఆవిష్కరణల లక్ష్యం మానవ సంక్షేమం, ఆర్థిక పురోగతి మరియు జాతీయ అభివృద్ధి కావాలని ఆకాంక్షించారు.పపరిశోధన మరియు ఆవిష్కరణలు ఎల్లప్పుడూ భారతీయ నాగరికతలో అంతర్భాగంగా ఉంటూ, భారతదేశ శ్రేయస్సుకు మరియు ప్రపంచ నాయకత్వానికి దోహదపడ్డాయని అన్నారు.

మన దేశంలో వ్యవసాయం, ఆరోగ్యం, ఆహారపు అలవాట్లు ప్రాచీన పరంపరకు సంబంధించినవని, మన సంప్రదాయాలన్నీ శాస్త్రీయతపైనే ఆధారపడి వున్నాయన్నారు. ఇవి మన సమాజాన్ని బలోపేతం చేయడమే కాకుండా, ప్రజల్లో కొత్త చైతన్యాన్ని, స్ఫూర్తిని కలిగిస్తున్నాయని అన్నారు.కోవిడ్ సమయంలో రోగనిరోధక శక్తిని పెంచుకోవడానికి భారతీయ పద్ధతులను అవలంబించడం ద్వారా ప్రాచీన భారతీయ జ్ఞాన వ్యవస్థలు సాధారణ ప్రజలకు సహాయపడ్డాయని అన్నారు.

ఇక.. ఆరెస్సెస్ అఖిల భారతీయ ప్రచార ప్రముఖ్ సునీల్ అంబేకర్ మాట్లాడుతూ ఆధునిక శాస్త్రీయ పురోగతికి మరియు భారతదేశపు సమగ్ర జ్ఞాన సంప్రదాయాలకు మధ్య సమన్వయాన్ని పెంపొందించుకోవాల్సిన అవసరం వుందన్నారు. సాంకేతిక పురోగతికి సమకాలీన విజ్ఞానశాస్త్రం గణనీయమైన కృషి చేసినప్పటికీ, పర్యావరణం, ఆరోగ్యం మరియు సమాజానికి సంబంధించిన నూతన సవాళ్లను ఎదుర్కోవడానికి మరింత సమగ్రమైన మరియు మానవ-కేంద్రిత విధానం అత్యవసరమని అన్నారు.

కృత్రిమ మేధస్సు మరియు ఇతర అభివృద్ధి చెందుతున్న సాంకేతికతల విషయానికి వస్తే, మానవ శ్రేయస్సు మరియు పర్యావరణ సుస్థిరత కోసం అటువంటి సాంకేతికతలను వినియోగించుకునే విషయంలో ‘విజ్ఞాన భారతి’వంటి సంస్థలు కీలక బాధ్యతలు నెరవేర్చాలన్నారు.సామాజిక అవసరాల ఆధారంగా పరిశోధన, ఆవిష్కరణలను ముందుకు తీసుకెళ్లాలని యువతకు పిలుపునిస్తూ, శాస్త్రీయ దృక్పథాన్ని పెంపొందించాలని, భారతీయ భాషలు మరియు భారతదేశపు గొప్ప జ్ఞాన సంప్రదాయాల ద్వారా శాస్త్రీయ జ్ఞానాన్ని వ్యాప్తి చేయాలని సూచన చేశారు.

మన భాషలు కూడా జ్ఞానం మరియు విజ్ఞానంతో సుసంపన్నమైనవని, సంస్కృతంతో పాటు ఇతర భాషలు మరియు ప్రాంతీయ మాండలికాలలో అంతర్లీనంగా ఉన్న జ్ఞానం, విజ్ఞానానికి ఆధునిక దృక్పథాలను జోడించి, వాటిని సమాజానికి ఉపయోగకరమైన రీతిలో అందించాలని పిలుపునిచ్చారు.భారతదేశంలో, కేవలం మానవాళికే కాకుండా సమస్త ప్రపంచం మరియు సృష్టి యొక్క శ్రేయస్సును కాంక్షించే సంప్రదాయం వుందని, జీవితంలోని ప్రతి అంశాన్ని సమగ్ర దృక్పథంతో పరిశీలించే—నిరంతర చింతన ప్రక్రియ ఆచరణలో వున్నాయన్నారు.

భారతదేశ జ్ఞాన సంప్రదాయాలలో వేళ్లూనుకున్న సమగ్ర దృక్పథం ద్వారా శాస్త్రీయ అవగాహనను పెంపొందించడానికి ‘విజ్ఞాన భారతి’ కట్టుబడి ఉందని ఆ సంస్థ జాతీయ అధ్యక్షులు మరియు ఇండియన్ నేషనల్ సైన్స్ అకాడమీ అధ్యక్షులు అయిన డాక్టర్ శేఖర్ సి. మాండే పేర్కొన్నారు.భారతీయ సంప్రదాయంలో, విజ్ఞానం, తత్వశాస్త్రం మరియు ఆధ్యాత్మికత పరస్పరం పూరకాలుగా పరిగణించబడతాయన్నారు.