భోజ్శాల వాస్తవానికి శ్రీ వాగ్దేవి దేవాలయమేనని పేర్కొంటూ, ఆ ప్రాంగణం నుంచి అన్ని ఇస్లామిక్ చిహ్నాలను తొలగించాలని కోరుతూ సుప్రీంకోర్టులో ఒక పిటిషన్ దాఖలైంది. ఇటీవల మధ్యప్రదేశ్ హైకోర్టు ఇచ్చిన తీర్పులో భోజ్శాలను “శ్రీ వాగ్దేవి హిందూ పుణ్యక్షేత్రం”గా పేర్కొన్న నేపథ్యంలో ఈ పిటిషన్ ప్రాధాన్యం సంతరించుకుంది.
పిటిషనర్లు తమ వాదనలో, భోజ్శాల ప్రాంగణాన్ని దాని అసలు హిందూ వైభవానికి పునరుద్ధరించాల్సిన అవసరం ఉందని తెలిపారు. ప్రస్తుతం అక్కడ కనిపిస్తున్న ఇస్లామిక్ చిహ్నాలు, నిర్మాణ అంశాలను తొలగించడం ద్వారా చారిత్రక కట్టడాన్ని అసలు రూపంలోకి తీసుకురావచ్చని వారు అభిప్రాయపడ్డారు.
అలాగే, ఆర్కియాలజికల్ సర్వే ఆఫ్ ఇండియా -ASI ఆధ్వర్యంలో మొత్తం సముదాయంలో శాస్త్రీయ పద్ధతిలో తవ్వకాలు నిర్వహించాలని పిటిషన్లో డిమాండ్ చేశారు. ఈ తవ్వకాల ద్వారా భోజ్శాల యొక్క నిజమైన చరిత్ర, అసలు వాస్తు నిర్మాణం, పురాతన హిందూ ఆధారాలు వెలుగులోకి వస్తాయని పేర్కొన్నారు.
ఇంకా, భక్తులు మరియు సందర్శకుల నుంచి ప్రస్తుతం వసూలు చేస్తున్న ప్రవేశ రుసుమును కూడా రద్దు చేయాలని పిటిషనర్లు కోరారు. భోజ్శాల హిందువుల ఆధ్యాత్మిక విశ్వాసాలకు కేంద్రబిందువుగా ఉన్నందున, అక్కడ భక్తులకు ఎటువంటి ఆర్థిక భారం లేకుండా దర్శన సౌకర్యం కల్పించాల్సిన అవసరం ఉందని వారు తెలిపారు.
ఈ అంశంపై సుప్రీంకోర్టు స్పందనపై దేశవ్యాప్తంగా హిందూ సంఘాలు, చరిత్రాభిమానులు ఆసక్తిగా ఎదురుచూస్తున్నారు.
