ప్రయాగ్రాజ్లోని మహాకుంభ్-2025 సందర్భంగా పాకిస్థాన్ కరాచీలోని పంచముఖి హనుమాన్ ఆలయం మరియు శ్మశానవాటిక ప్రధాన సేవకుడు రామ్నాథ్ మిశ్రా ‘తర్పణం’ చేయడానికి చితాభస్మాన్ని తీసుకొని హరిద్వార్లోని గంగా పవిత్ర జలాల్లో నిమజ్జనం చేయడానికి భారతదేశానికి వచ్చారు.
పాక్ కి చెందిన 400 మంది హిందువులు, సిక్కుల అస్థికలను నిమజ్జనానికి సంబంధించి మహాకుంభ్ నగర్లోని సెక్టార్ 24లో తన తల్లి కమలా దేవి, భార్య, కుమారుడు దేవేంద్రనాథ్ మిశ్రా, ఇద్దరు కుమార్తెలు మరియు మేనల్లుడితో కలిసి రామ్నాథ్ ఫిబ్రవరి 10న ఈ పవిత్ర తంతును నిర్వహించారు.
ఈ సందర్బంగా మాట్లాడుతూ, తన పూర్వీకులు శతాబ్దాలుగా పంచముఖి హనుమాన్ ఆలయానికి సేవ చేస్తున్నారని రామ్నాథ్ మిశ్రా పేర్కొన్నారు. తన పూర్వీకులు ప్రయాగ్రాజ్లోని చాకియా గ్రామానికి చెందినవారని, కానీ చాలా సంవత్సరాలుగా ఇక్కడికి దూరంగా ఉండటం వల్ల ఇప్పుడు ఇక్కడ ఎవరితోనూ సంబంధాలు లేవని ఆయన అన్నారు. మహాకుంభ సమయంలో గంగానదిలో స్నానం చేసే అవకాశం లభించడం తన అదృష్టంగా భావిస్తున్నానని ఆయన అన్నారు.
ఫిబ్రవరి 21న సంగం పవిత్ర జలంతో ఢిల్లీకి వెళ్తానని, అక్కడ నిగమ్ బోధ్ ఘాట్లో ఈ పవిత్ర జలంతో చితాభస్మ కలశాలకు పూజ జరుగుతుందని మిశ్రా చెప్పారు. చితాభస్మంపై సంగమం నీటిని చల్లిన తర్వాత, ఢిల్లీ నుండి హరిద్వార్కు రథయాత్ర నిర్వహించి, ఫిబ్రవరి 22న హరిద్వార్లోని సతి ఘాట్ వద్ద చితాభస్మాన్ని నిమజ్జనం చేస్తామని ఆయన చెప్పారు.
కరాచీలోని శ్మశానవాటికను కూడా పునరుద్ధరించామని, ఇప్పుడు అక్కడ 15 మృతదేహాలను ఒకేసారి దహనం చేయవచ్చని ఆయన అన్నారు. శ్మశానవాటికలో చితాభస్మాన్ని నిల్వ చేయడానికి ఒక నిర్మాణం కూడా నిర్మించబడిందని ఆయన అన్నారు. గత ఏడు నుంచి ఎనిమిది సంవత్సరాలలో 400 మంది హిందువుల చితాభస్మాన్ని సేకరించామని, ఇప్పుడు వీసా రావడంతో తర్పణం చేయడానికి అన్ని చితాభస్మాలతో వచ్చానని తెలిపారు.”1947 నుండి భారతదేశంలో చితాభస్మం నిమజ్జనం కోసం తీసుకువచ్చే హిందూ బృందం చేసిన మూడవ సందర్శన ఇది” అని రామ్నాథ్ మిశ్రా అన్నారు.
కరాచీకి చెందిన అతడు ముఖ్యమంత్రి యోగి ఆదిత్యనాథ్ కు వీరాభిమాని అని చెప్పారు. ఉత్తరప్రదేశ్ లోని లక్నోకు మాత్రమే తనకు వీసా వచ్చిందని ఆయన అన్నారు. ఆ తర్వాత ఆయన సీఎం యోగి ఆదిత్యనాథ్ కు సందేశం పంపగా, ముఖ్యమంత్రి ఆయనకు ప్రయాగ్ రాజ్, వారణాసి, మధుర, అయోధ్యతో సహా యూపీలోని మొత్తం నాలుగు నగరాలకు వీసా ఇప్పించారని హర్షం వ్యక్తం చేశారు.
