లక్నో: ఉత్తరప్రదేశ్‌లోని లక్నో కింగ్ జార్జ్ మెడికల్ యూనివర్సిటీ (కేజీఎంయూ)లో మహిళా వైద్యులు, ఉద్యోగులపై లైంగిక వేధింపులు, మత మార్పిడికి ఒత్తిడి, బెదిరింపుల ఆరోపణలు కలకలం రేపుతున్నాయి. ఈ వ్యవహారంపై ప్రత్యేక దర్యాప్తు బృందం (ఎస్‌టీఎఫ్) సమర్పించిన నివేదికలో 12 మంది విశ్వవిద్యాలయ ఉద్యోగుల పేర్లు ఉన్నట్లు సమాచారం. వీరిలో ఐదుగురిపై నేరుగా వేధింపులకు పాల్పడినట్లు, మరో ఏడుగురు నిందితులకు సహకరించినట్లు ఆరోపణలు ఉన్నాయి.
ఈ వ్యవహారాన్ని తీవ్రంగా పరిగణించిన ఉత్తరప్రదేశ్ ప్రభుత్వం అక్టోబరు 30న కీలక ఆదేశాలు జారీ చేసింది. నివేదికలో పేర్లు ఉన్న ఉద్యోగులపై కేజీఎంయూ చట్టం-2002, విశ్వవిద్యాలయ నిబంధనల ప్రకారం చర్యలు ప్రారంభించాలని ఆదేశించింది. ఈ నేపథ్యంలో నవంబరు 6న విశ్వవిద్యాలయ కార్యనిర్వాహక మండలి సమావేశం నిర్వహించనున్నారు.
పాథాలజీ విభాగంలో జూనియర్ రెసిడెంట్‌గా పనిచేసిన రమీజుద్దీన్ అలియాస్ రమీజ్ మాలిక్ తనను లైంగికంగా వేధించడంతోపాటు, మతం మార్చుకుని వివాహం చేసుకోవాలని ఒత్తిడి చేశాడని ఓ మహిళా వైద్యురాలు ఫిర్యాదు చేశారు. ఈ కేసులో అతడిని 2026 జనవరి 9న పోలీసులు అరెస్టు చేశారు. మరో కేసులో వివాహం చేసుకుంటానని నమ్మించి ఓ నర్సింగ్ విద్యార్థినిని లైంగికంగా వేధించాడని ఓ మెడికల్ ఇంటర్న్‌పై ఆరోపణలు వచ్చాయి.
ఈ రెండు ఘటనల నేపథ్యంలో కేజీఎంయూ అంతర్గత విచారణ చేపట్టగా, మరిన్ని ఫిర్యాదులు వెలుగులోకి వచ్చాయి. దీంతో మాజీ డీజీపీ భావేష్ సింగ్ నేతృత్వంలోని ఏడుగురు సభ్యుల కమిటీ సిఫార్సు మేరకు ఎస్‌టీఎఫ్ విస్తృత దర్యాప్తు చేపట్టింది. పాథాలజీ, గాంధీ వార్డు, మైక్రోబయాలజీ, రేడియాలజీ విభాగాల్లో మహిళా ఉద్యోగుల ఫిర్యాదులను పరిశీలించింది.
ఓ మహిళా కాంట్రాక్టు ఉద్యోగిని మతం మార్చుకుని వివాహం చేసుకోవాలని సీనియర్ ఉద్యోగి ఒత్తిడి చేసినట్లు, ఆమె ఫిర్యాదు చేసినప్పటికీ సంబంధిత వ్యక్తిపై చర్యలు తీసుకోకుండా కాంట్రాక్టును రద్దు చేసినట్లు నివేదికలో ఆరోపణలు ఉన్నాయి. మరికొందరు మహిళా వైద్యులను బెదిరించడం, ఫిర్యాదులను అణచివేయడం, నిందితులకు సహకరించడం వంటి అంశాలనూ ఎస్‌టీఎఫ్ ప్రస్తావించినట్లు సమాచారం.
ఆగస్టు 25న రాష్ట్ర ప్రభుత్వానికి నివేదిక సమర్పించిన ఎస్‌టీఎఫ్.. ఉద్యోగుల పాత్రలను విడివిడిగా పరిశీలించింది. అక్టోబరు 30న ప్రభుత్వం ఆదేశాలు జారీ చేయడంతో ఇప్పుడు కేజీఎంయూ తదుపరి చర్యలకు సిద్ధమవుతోంది.
కాగా, నివేదికలో పేర్లు ఉన్నంత మాత్రాన వారు నేరాలకు పాల్పడినట్లు నిర్ధారణ అయినట్లు కాదని అధికారులు స్పష్టం చేస్తున్నారు. ఆరోపణలపై శాఖాపరమైన విచారణ జరిపి, ఆధారాల ఆధారంగా చర్యలు తీసుకోవాల్సి ఉంటుంది. ఇప్పటికే నమోదైన రెండు క్రిమినల్ కేసుల దర్యాప్తు కూడా కొనసాగుతోంది. నవంబరు 6న జరిగే కార్యనిర్వాహక మండలి సమావేశంలో ఈ వ్యవహారంపై కీలక నిర్ణయాలు తీసుకునే అవకాశం ఉంది.
