గణేష్ ఉత్సవాలను మతసామరస్యానికి ప్రతీకగా, శాంతియుత వాతావరణంలో నిర్వహించేందుకు ప్రతి ఒక్కరూ సహకరించాలని శ్రీ సత్యసాయి జిల్లా జాయింట్ కలెక్టర్ మౌర్య భరద్వాజ్, ఏఎస్పీ అంకితా సురానా పిలుపునిచ్చారు. ఉత్సవాల నిర్వహణపై స్థానిక గుడ్డం కల్యాణ మండపంలో ప్రభుత్వ శాఖల అధికారులు, పోలీసు ఉన్నతాధికారులు, గణేష్ ఉత్సవ కమిటీ సభ్యులు, నిర్వాహకులతో సమీక్ష సమావేశం నిర్వహించారు. సమావేశానికి హిందూపురం ఏఎస్పీ కేవీ మహేష్ అధ్యక్షత వహించారు.
ఈ సందర్భంగా జాయింట్ కలెక్టర్, ఏఎస్పీ మాట్లాడుతూ, గణేష్ మండపాల ఏర్పాటుకు సంబంధిత శాఖల నుంచి ముందస్తు అనుమతులు తప్పనిసరిగా తీసుకోవాలని సూచించారు. విగ్రహ ప్రతిష్ఠాపన, నిమజ్జన కార్యక్రమాలు నిర్ణీత సమయాల్లోనే నిర్వహించాలని, శోభాయాత్రల్లో శబ్ద కాలుష్య నియంత్రణ నిబంధనలను కచ్చితంగా పాటించాలని చెప్పారు. డీజేలు, అధిక శబ్దంతో కూడిన సౌండ్ సిస్టమ్లకు అనుమతి లేదని స్పష్టం చేశారు.
రహదారులపై ట్రాఫిక్కు అంతరాయం కలగకుండా మండపాలు ఏర్పాటు చేయాలని, విద్యుత్ సరఫరాలో భద్రతా ప్రమాణాలు పాటించి షార్ట్ సర్క్యూట్లకు అవకాశం లేకుండా చర్యలు తీసుకోవాలని సూచించారు. ప్రతి మండపం వద్ద అగ్నిమాపక పరికరాలు సిద్ధంగా ఉంచడంతో పాటు పారిశుధ్యం, పరిశుభ్రతకు ప్రాధాన్యం ఇవ్వాలని కోరారు.
ఏఎస్పీ అంకితా సురానా మాట్లాడుతూ, మత సామరస్యానికి భంగం కలిగించే వ్యాఖ్యలు, నినాదాలు లేదా కార్యక్రమాలను నిర్వహించరాదన్నారు. సోషల్ మీడియాలో తప్పుడు ప్రచారం లేదా రెచ్చగొట్టే పోస్టులు పెడితే కఠిన చర్యలు తీసుకుంటామని హెచ్చరించారు.
నిమజ్జన శోభాయాత్రలో మహిళలు, చిన్నారులు, వృద్ధుల భద్రతకు ప్రత్యేక చర్యలు తీసుకుంటామని తెలిపారు. అనుమానాస్పద వ్యక్తులు లేదా వస్తువులు కనిపిస్తే వెంటనే పోలీసులకు సమాచారం ఇవ్వాలని సూచించారు. శోభాయాత్రలో మద్యం సేవించడం, ఇతర చట్టవిరుద్ధ కార్యకలాపాలకు పాల్పడడం, శాంతిభద్రతలకు విఘాతం కలిగించే చర్యలను సహించబోమని స్పష్టం చేశారు. పోలీసు శాఖ నిర్దేశించిన మార్గం, సమయానుసారమే నిమజ్జన కార్యక్రమాలు నిర్వహించాలని సూచించారు.
