విచక్షణారహితంగా రసాయన ఎరువులను వినియోగించడం వల్ల భూసారానికి నష్టం కలుగుతుందని, సమతుల్య ఎరువుల వినియోగంతో పాటు ప్రకృతి వ్యవసాయ పద్ధతులను అనుసరించి నేల తల్లిని పరిరక్షించుకోవాలని ప్రకాశం జిల్లా వ్యవసాయ అధికారి శ్రీనివాసులు, ఆత్మ పీడీ రత్న మంజుల రైతులకు సూచించారు.
ప్రకాశం జిల్లా కమిటీ ఆధ్వర్యంలో జె.పంగులూరు మండల కేంద్రంలోని రోటరీ భవన్లో “విచక్షణారహిత ఎరువుల వినియోగం” అంశంపై అవగాహన, శిక్షణా కార్యక్రమం నిర్వహించారు. ఈ కార్యక్రమానికి మండల వ్యవసాయ అధికారి డి. సుబ్బారెడ్డి అధ్యక్షత వహించారు.
ఈ సందర్భంగా అధికారులు మాట్లాడుతూ, అధిక దిగుబడుల కోసం ఎరువులను అతిగా వినియోగించడం వల్ల నేల సారవంతత క్రమంగా తగ్గిపోతుందని పేర్కొన్నారు. పంటల అవసరాలకు అనుగుణంగా సమతుల్య పద్ధతిలో ఎరువులను వినియోగించడం ద్వారా భూసారాన్ని కాపాడుకోవడంతో పాటు రైతులు మెరుగైన దిగుబడులు సాధించవచ్చని వివరించారు.
అలాగే, భారతీయ వ్యవసాయ సంప్రదాయాలకు అనుగుణంగా ప్రకృతి వ్యవసాయ విధానాలను ప్రోత్సహించాల్సిన అవసరం ఉందన్నారు. రసాయనాలపై ఆధారపడకుండా సహజ వనరులను వినియోగించే వ్యవసాయ పద్ధతులు రైతులకు, వినియోగదారులకు మరియు పర్యావరణానికి మేలు చేస్తాయని తెలిపారు.
ఎరువుల పంపిణీని పారదర్శకంగా నిర్వహించేందుకు, అలాగే డీఏపీ, యూరియా వంటి ఎరువులను వ్యవసాయేతర అవసరాలకు తరలించకుండా నిరోధించేందుకు కేంద్ర, రాష్ట్ర ప్రభుత్వాలు ఏపీ ఏఐఎంఎస్ యాప్ను ప్రవేశపెట్టినట్లు వివరించారు. ఇకపై రైతులకు ఎరువుల పంపిణీ ఈ యాప్ ద్వారానే నిర్వహించబడుతుందని తెలిపారు.
“భూమి మనకు అన్నం పెట్టే తల్లి. భవిష్యత్ తరాలకు సారవంతమైన నేలను అందించాలంటే సమతుల్య ఎరువుల వినియోగం, ప్రకృతి వ్యవసాయ పద్ధతుల అమలు అత్యంత అవసరం” అని అధికారులు పేర్కొన్నారు.
