పశ్చిమ బెంగాల్ లో సువేందు అధికారి నేతృత్వంలోని బీజేపీ ప్రభుత్వంలో, ప్రార్థనా స్థలాల్లో లౌడ్స్పీకర్ల వినియోగంపై కఠిన నియంత్రణలు అమలు చేయనున్నట్లు స్పష్టం చేశారు. పరిపాలనా సమావేశంలో పోలీసు అధికారులతో మాట్లాడిన ఆయన, ఏ మతపరమైన ప్రదేశమైనా ప్రభుత్వం నిర్ణయించిన శబ్ద పరిమితులను తప్పనిసరిగా పాటించాల్సిందేనని ఆదేశించారు.
సాధారణ ప్రజల శాంతి, విద్యార్థుల చదువులు, వృద్ధులు మరియు రోగుల ఆరోగ్యాన్ని దృష్టిలో పెట్టుకుని శబ్ద కాలుష్యాన్ని నియంత్రించడం అత్యవసరమని ఆయన పేర్కొన్నారు. మత స్వేచ్ఛకు పూర్తి గౌరవం ఉంటుందని, అయితే ప్రజలకు ఇబ్బంది కలిగించే విధంగా అధిక శబ్దంతో లౌడ్స్పీకర్లు వినిపించడం అనుమతించబోమని స్పష్టం చేశారు.
ఈ నిబంధనలను అమలు చేసే సమయంలో బలవంతం కాకుండా, చర్చలు మరియు అవగాహన ద్వారా సమస్యలను పరిష్కరించాలని పోలీసు అధికారులకు సూచించారు. ప్రార్థనా స్థలాల ప్రాంగణాల బయటకు అధిక శబ్దం వెళ్లకుండా చర్యలు తీసుకోవాలని ఆదేశించారు.
పండుగల సమయంలో ప్రత్యేక సడలింపులు
దుర్గాపూజ, ఈద్ వంటి ప్రధాన పండుగల సమయంలో ప్రత్యేక పరిస్థితులను పరిగణలోకి తీసుకుంటామని సువేందు అధికారి తెలిపారు. సంప్రదాయాలు, సంస్కృతిని గౌరవిస్తూ అవసరమైన చోట తగిన నిర్ణయాలు తీసుకుంటామని చెప్పారు.
ప్రజల ప్రశాంత జీవనానికి భంగం కలగకుండా, అన్ని వర్గాలు పరస్పర గౌరవంతో ముందుకు సాగాల్సిన అవసరం ఉందని ఆయన పిలుపునిచ్చారు.
