నిన్నటి ఆయుధాలతో రేపటి యుద్ధాన్ని ఎలా ఎదుర్కోగలం?

అమెరికా సంస్థ DARPA నుంచి మన DRDO నేర్చుకోవాలి.

DARPA వార్షిక బడ్జెట్ మూడు బిలియన్ డాలర్లు. DRDO బడ్జెట్ సుమారుగా 2.5 బిలియన్ డాలర్లు. రెండు బడ్జెట్ ల మధ్య పెద్ద తేడా లేకపోయినా DARPA అంత సమృద్ధిని DRDO ఎందుకు సాధించలేక పోయింది?

అక్టోబర్ 4, 1947 న సోవియట్ యూనియన్ యొక్క మొట్టమొదటి కృత్రిమ ఉపగ్రహం స్ఫుత్నిక్1 యొక్క విజయవంతమైన ప్రయోగాన్ని అమెరికా ప్రజలకు పెద్ద షాక్ గా అభివర్ణిస్తూ సోవియట్ యూనియన్ కు చెందిన ప్రఖ్యాత న్యూస్ ఏజెన్సీ ‘టాస్’ ఒక కథనాన్ని వెలువరించింది. ఈ వార్త ఇరుదేశాల ప్రజల మధ్య తీవ్ర భావోద్వేగాలకు కారణమైంది. అప్పటి అమెరికన్ ఆర్మీ జనరల్ ఐసన్ హోవర్ నేతృత్వంపై నలువైపుల నుంచి వెల్లువెత్తిన విమర్శలు దీర్ఘకాలంలో అమెరికాకు అనుకూలమైన ఫలితాలనే అందించాయి. సైనిక సంపత్తి, పరిజ్ఞానం, సాంకేతికతలో అమెరికాను అగ్రగామిగా నిలపాలని అమెరికా నాయకత్వం యొక్క దృఢ నిర్ణయానికి రష్యా యొక్క స్పుత్నిక్ ప్రయోగం ఒక బలమైన కారణం అయింది.

అందుకుగాను యూఎస్ ప్రభుత్వం మొట్టమొదటగా డిఫెన్స్ అడ్వాన్సుడ్ రీసెర్చ్ ప్రాజెక్ట్స్ ఏజెన్సీ (DARPA) ను 1958 ఫిబ్రవరిలో ప్రారంభించింది. దాని వెబ్సైట్ లోని సమాచారం చూస్తే యూఎస్ ఎప్పుడూ ” వ్యూహాత్మక, సాంకేతిక ఆవిష్కరణలో ముందుండాలి తప్ప వాటివల్ల బాధపడే స్థితిలో ఉండకూడదు. ఎప్పుడూ ఆ దిశగా నూతన పరివర్తన సాధిస్తూ ఉండాలి తప్ప సాధారణ పురోగతికి పరిమితం కాకూడదు” అన్న నియమాన్ని అనుసరించి DARPA పనిచేస్తుంది అని తెలుస్తుంది. DARPA సాధించినవన్నీ కూడా ముఖ్యమైన లక్ష్యాలు. మొట్టమొదటిగా వాళ్లు ARPANET ద్వారా తమ మిలిటరీని ఇంటర్నెట్ తో అనుసంధానించారు. అలాగే స్టెల్త్ టెక్నాలజీ, మైక్రో ఎలక్ట్రానిక్స్, నిఘా కోసం స్పెన్సర్ లు వాడడం, మానవ రహితంగా ఎగిరే విమానాలు, రాత్రులు చీకట్లో కూడా స్పష్టంగా కనిపించే పరికరాలు లాంటి విప్లవాత్మకమైన యుద్ధ పోరాట పద్ధతులకు, సాధనాలకు శ్రీకారం చుట్టారు.

ఎప్పటికప్పుడు వర్తమాన సాంకేతికతను అధిగమించి నిరంతరం నూతన ఆవిష్కరణలపై దృష్టి పెట్టిన కారణంగానే DARPA అద్వితీయమైన విజయాలను సాధించగలిగింది. దీనిని బట్టే DARPA తన భవిష్యత్ యుద్ధ తంత్రాలకు ఏ విధంగా మెరుగులు దిద్దుకుంటూ ఉంటుందో అర్థమవుతుంది.

5 నెలల క్రితం DARPA యొక్క సాంకేతిక నిపుణుల కార్యాలయం (TTO) పరిశోధన కొనసాగింపు, ఆధునిక సాంకేతిక అభివృద్ధి, ప్రదర్శనలు, నవీన యుద్ధ నైపుణ్య నిర్మాణం తదితరాలకు నిధులను కోరింది. ఆ లేఖలో సైనిక సాంకేతిక పాటవంలో తమ ఆధిపత్యాన్ని మరింతగా విస్తరించేందుకు, అందులో మరింత చురుకుగా వ్యవహరించేందుకు తమకు చేదోడును ఇవ్వవలసిందిగా తమ ప్రభుత్వాన్ని అభ్యర్థించింది. ఆ లేఖలో గాలిలోనూ, నీటిమీద, నేల మీద, అంతరిక్షంలో యుద్ధం చేయడానికి తమకు గల సామర్ధ్యాలను వివరించింది.

అలాగే తక్కువ ఖర్చుతో అధిక ప్రయోజనాలను ఇచ్చే ఎయిర్ క్రాఫ్ట్స్, ఓడలు, జలాంతర్గాములు, అంతరిక్ష సాధనాలు, మొదలగు వివరాలు ఆ లేఖలో పొందుపరచబడ్డాయి. అందులో స్టెల్త్ టెక్నాలజీలో అవసరమైన విప్లవాత్మకమైన ప్రగతిని కూడా TTO సూచించింది. భవిష్యత్ యుద్ధ అవసరాలకు తక్కువ ఖర్చుతో రూపొందించుకునే సాధనాలు, నెట్వర్క్ సిస్టమ్స్ కీలకమవుతాయి అని TTO అభిప్రాయపడింది.

DARPA పత్రంలో వాయు వ్యవస్థలో తక్కువ ఖర్చుతో అత్యధిక సంఖ్యలో రూపొందించబడిన అత్యంత ప్రమాదకరమైన ‘హైపర్ సోనిక్స్’ ను ఉదహరించారు.

అలాగే నావికాదళ వ్యవస్థలో కూడా సామర్ధ్య విస్తరణ, తక్కువ ఖర్చుతో వాణిజ్య అవసరాలకు కూడా పనికి వచ్చేలా ఉండే, అద్భుతమైన పనితీరు కలిగిన సాధనాల ప్రస్తావన, వాటి విస్తరణ ఆవశ్యకతను పేర్కొని ఉన్నారు.

అలాగే అంతరిక్ష వ్యవస్థలో LEO (తక్కువ భూమి కక్ష్య) వద్ద పనిచేసే అంతరిక్ష పరికరాలను విస్తరించడం మరియు విభజించడం, GEO (జియో సింక్రోనస్ ఎర్త్ కక్ష్య) పరికరాలపై ఆధారపడటాన్ని తగ్గించడంపై దృష్టిపెట్టాలి. – వాణిజ్య నమూనాల నుండి తీసుకోబడిన చిన్న, సరళమైన ఉపగ్రహాలను సృష్టించడం మరియు వాణిజ్యపరమైన నెట్‌వర్క్ అభివృద్ధి కోసం వారి ఉత్పత్తులను వినియోగించేవారి సంఖ్యను పెంచుకోవడం.  అలాగే ‘గ్రౌండ్ సిస్టమ్స్’ లో కూడా, స్థానిక ఆధిపత్యాన్ని కొనసాగించటానికి చిన్న యూనిట్లను తయారు చెయ్యడం, లేదా వ్యక్తిగత ఉపయోగార్ధం కూడా కొన్ని యుద్ద పరికరాలను రూపొందించడంపై దృష్టి నిలపాలని ఆ లేఖలో పేర్కొన్నారు.

భవిష్యత్ యుద్ధనౌకల కోసం DARPA ఈ రోజు ఖరీదైన వైమానిక మరియు నావికా పరికరాలపై కాకుండా చిన్న, నెట్‌వర్క్డ్ వ్యవస్థలపై దృష్టి పెడుతోంది. కారణం భవిష్యత్తులో యుద్ధ భూమిలో ఆధిపత్యం వహించబోయేవి అవే కనుక. ఎయిర్ క్రాఫ్ట్, నావల్ డిస్ట్రాయర్ మరియు జలాంతర్గాములు సమీప భవిష్యత్తులో వాటి ప్రాముఖ్యతను కోల్పోవు అనడంలో ఎటువంటి సందేహం లేదు, కానీ యుద్ధ విజయానికి కారణమయ్యే విషయంలో వాటి ప్రాముఖ్యత నెమ్మదిగా ప్రశ్నార్థకమవుతోంది.

సౌదీ అరేబియాలో అత్యంత అధునాతన వాయు రక్షణ వ్యవస్థ ఉంది, అయితే అరాంకో ఆయిల్ ప్రాసెసింగ్ ప్లాంట్ పై చౌకైన, తక్కువ ఎత్తులో ఎగిరే డ్రోన్లు మరియు క్రూయిజ్ క్షిపణుల దాడిని నిరోధించడంలో ఇది విఫలమైంది. ఇది దేశీయ చమురు ఉత్పత్తిని తాత్కాలికంగా సగానికి తగ్గించింది.

భారతదేశం రక్షణ వ్యయంలో ప్రపంచంలో 5వ స్థానంలో ఉంది. అయినప్పటికీ, ఆధునిక సాంకేతిక పరిజ్ఞానాలపై పెద్దగా దృష్టి లేదు. మన సైనిక సాంకేతిక విజయాలు ఎక్కువగా పాత ట్యాంకులు, హెలికాప్టర్లు మరియు క్షిపణుల ఉత్పత్తి, అలాగే సాంకేతికత అందిపుచ్చుకున్న తర్వాత విదేశీ ఆయుధాలను ఉత్పత్తి చేసే కర్మాగారాల స్థాపనకే పరిమితమౌతోంది.

సైన్యం, నావికాదళం మరియు వైమానిక దళం వారి సంఖ్యను తగ్గించడానికి ఇష్టపడవు. అందువల్ల, ప్రస్తుత సంస్థాగత నిర్మాణాన్ని నిలుపుకోవటానికి, అందుకు అవసరమైన పద్ధతులను లేదా ఆయుధ వ్యవస్థలను మాత్రమే సేకరిస్తున్నాయి. డిఫెన్స్ రీసెర్చ్ అండ్ డెవలప్‌మెంట్ ఆర్గనైజేషన్ (DRDO) సైతం భవిష్యత్ సాంకేతిక పరిజ్ఞానాల కంటే ప్రస్తుతం ఉన్న సేవల లోపాలను తీర్చడంపై దృష్టి పెడుతోంది.

DARPA యొక్క వార్షిక బడ్జెట్ 3 బిలియన్ డాలర్లకు పైగా ఉంది. అలాగే DRDO బడ్జెట్ కూడా సుమారు 2.5 బిలియన్ డాలర్లు. బడ్జెట్‌లో పెద్ద తేడా లేకపోయినా, DARPA DRDO కన్నా ఎలా ఎక్కువ సాధించగలిగింది? దీనికి సమాధానం రెండు సంస్థల యొక్క భిన్నమైన శైలి. DARPA ఒక నిధుల ద్వారా నడిచే సంస్థ. కానీ దానికి ఎక్కువ ప్రయోగశాలలు, పరిశోధనా సిబ్బంది లేరు. ఇందులో కేవలం 200 మంది వ్యక్తులు మాత్రమే పనిచేస్తారు.  వారిలో సగం మంది మూడు నుండి ఐదు సంవత్సరాల పరిమిత కాలానికి మాత్రమే నియమించబడతారు. అన్ని పరిశోధనలు విశ్వవిద్యాలయాలు, పరిశ్రమలు మరియు ప్రభుత్వ ఆర్ అండ్ డి సంస్థలతో ఒప్పందాల ద్వారా నిర్వహించబడతాయి. మరోవైపు, DRDOలో ఉద్యోగుల సంఖ్య సుమారు 30,000.  ప్రయోగ శాలలు 50 కంటే ఎక్కువున్నాయి. ఈ రకమైన నిర్వహణ వ్యయం కారణంగా, పరిశోధన కోసం పరిమిత నిధులు మాత్రమే అందుబాటులో ఉంటాయని స్పష్టంగా తెలుస్తోంది.

అంతర్జాతీయంగా మనపై ఆంక్షలు ఉన్నప్పటికీ మన అణు త్రయాన్ని అభివృద్ధి చేయడంలో DRDO కొన్ని అద్భుతమైన విజయాలు సాధించిందనడంలో సందేహం లేదు. అలాగే ఎక్కువగా పాతకాలపు పరికరాలతో కూడిన త్రివిధ దళాల యొక్క ప్రస్తుత పరికరాల అవసరాలను కూడా DRDO విస్మరించదు. ‘మేక్ ఇన్ ఇండియా’ కార్యక్రమం కూడా పరిమిత విజయాన్ని మాత్రమే సాధించింది.

భారతదేశం యొక్క పరిస్థితులు మరియు అవసరాలు అమెరికాతో పోల్చలేనివని మరియు DARPA మరియు DRDOలు వేటికవి చాలా భిన్నమైన విధులను కలిగి ఉన్నాయని కొందరు వాదించవచ్చు. ఇవన్నీ చెల్లుబాటు అయ్యే వాదనలే కానీ రాబోయే యుద్ధాల స్వరూపాన్ని దృష్టిలో ఉంచుకుని భవిష్యత్ శక్తి నిర్మాణం, సాంకేతికతలపై దృష్టి పెట్టాలన్న విషయాన్ని మరువకండి. భవిష్యత్ యుద్ధ పోరాట సాంకేతిక పరిజ్ఞానాలను పరిశోధించడానికి మరియు అభివృద్ధి చేయడానికి మిలటరీ మరియు DRDO విశ్వవిద్యాలయాలు మరియు ప్రైవేట్ పరిశ్రమలతో కలిసి పనిచేయాలి. తద్వారా మాత్రమే మనం నిన్నటి సిద్ధాంతం మరియు ఆయుధ వ్యవస్థలతో రేపటి యుద్దాన్ని ముగించకుండా ఉండగలుగుతాం.

ఆంగ్ల మూలం : రిటైర్డ్ లెఫ్టినెంట్ జనరల్ D. S HOODA

తెలుగు అనువాదం : VSK DESK.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవాలంటే ఇక్కడ క్లిక్ చెయ్యండి.