ఉక్రెయిన్పై సైనిక చర్య నేపథ్యంలో రష్యా ఆయిల్ కొనుగోళ్లపై అమెరికా సహా పశ్చిమ దేశాలు ఆంక్షలు విధించాయి. దీంతో రష్యా ధరలు తగ్గించి ఆఫర్ ఇచ్చింది. ఈ అవకాశాన్ని భారత్ అందిపుచ్చుకుంటోంది. రికార్డు స్థాయిలో ముడి చమురును రష్యా నుంచి దిగుమతి చేసుకుంటోంది. మన దేశానికి ముడి చమురు సరఫరా చేస్తున్న దేశాల్లో రష్యా వరుసగా ఐదో నెలలోనూ తొలి స్థానంలో నిలిచింది. ఫిబ్రవరి 2023లో రికార్డు స్థాయిలో రోజుకు 16 లక్షల బ్యారెళ్లను రష్యా నుంచి భారత్ దిగుమతి చేసుకుంది. ఈ మేరకు ఇంధన సరఫరా డేటాను సేకరించే వోర్టెక్సా తెలిపింది. ఇది ఇరాక్, సౌదీ అరేబియాల నుంచి దిగుమతి అవుతున్న దానికంటే ఎక్కువ కావడం గమనార్హం.
ఏడాది క్రితం భారత్ ప్రతి సంవత్సరం రష్యా నుంచి దిగుమతి చేసుకుంటున్న చమురు వాటా 0.2 శాతం మాత్రంగానే ఉండేది. కానీ, ఫిబ్రవరి 2023, నాటికి అది రోజుకు 16 లక్షల పీపాలకు చేరింది. 2022, నవంబర్లో రోజుకు 9,09,403 బ్యారెళ్లు, అక్టోబర్లో 9,35,556 బ్యారెళ్ల ముడి చమురు దిగుమతి అయ్యింది. గత ఏడాది అక్టోబర్లో తొలిసారి సౌదీ, ఇరాక్లను వెనక్కి నెట్టి రష్యా అతిపెద్ద దేశంగా నిలిచింది. భారత్ దిగుమతి చేసుకుంటున్న ఆయిల్లో ఒక్క రష్యా నుంచే 35 శాతం వస్తోంది.
