News

భారత సైన్యానికి ట్యాంకుల పంపిణీ: రష్యా

90views

న్యూఢిల్లీ: భారత సైన్యానికి తేలికపాటి యుద్ధ ట్యాంకులు సరఫరా చేసేందుకు రష్యాకు చెందిన రోసోబోర్న్‌ఎక్స్‌పోర్ట్‌ సంసిద్ధత వ్యక్తం చేసింది. భారత్‌ సైన్యం విడుదల చేయనున్న టెండర్‌ కోసం స్ప్రుట్‌-ఎస్‌డీఎంఐ1 లైట్‌ యాంఫీబియస్‌ ట్యాంక్‌ను సిద్ధం చేయనుంది. ఇప్పటికే దీనికి సంబంధించిన సాంకేతిక వివరాలను అందజేసినట్టు రోసోబోర్న్‌ ఎక్స్‌పోర్ట్స్‌ పేర్కొంది.

”భారత్‌ కోరక మేరకు మేము ఇప్పటికే సాంకేతిక ప్రతిపాదనలను అందజేశాము. మేము సంప్రదింపులు జరపడంతోపాటు.. భారత్‌కు ట్యాంకును చూపేందుకు సిద్ధంగా ఉన్నాం. దీంతోపాటు సాంకేతికత బదలాయింపునకు కూడా సిద్ధమే. భారత్‌లోనే తయారీ కేంద్రం కూడా ఏర్పాటు చేస్తాం” అని ఆ సంస్థకు చెందిన ఓ అధికారి పేర్కొన్నారు.

అక్టోబర్‌ 18 నుంచి గాంధీ నగర్‌లో డిఫెన్స్‌ ఎక్స్‌పో ప్రారంభం కానున్న సమయంలో ఈ ప్రకటన రావడం గమనార్హం. టీ-72, టీ-90 ట్యాంక్‌ల కోసం తయారయ్యే అన్ని రకాల ఆయుధాలను ఈ తేలికపాటి ట్యాంక్‌ నుంచి కూడా ఉపయోగించవచ్చని రష్యా అధికారులు వెల్లడించారు.

చైనా సైన్యం లద్ధాఖ్ వద్ద మోహరింపులు పెంచడంతో 2021 ఏప్రిల్‌లో 25 టన్నుల కంటే తక్కువ బరువుండే 350 తేలికపాటి యుద్ధట్యాంకులను దశలవారీగా కొనుగోలు చేయడానికి రిక్వెస్ట్‌ ఫర్‌ ఇన్ఫర్మేషన్‌ (ఆర్‌ఎఫ్‌ఐ) జారీ చేసింది. తాజాగా ఆ ప్రాజెక్టుకు ఇప్పటికే కీలక అనుమతులు లభించాయి. డిఫెన్స్‌ అక్విజేషన్‌ కౌన్సిల్‌ నుంచి కూడా త్వరలోనే అనుమతులు లభించే అవకాశం ఉంది.

Source: Eenadu

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి