నాన్పుర్: బీజేపీ మాజీ నేత నుపుర్ శర్మకి సంబంధించిన వీడియో చూసినందుకు ఓ యువకుడిపై హత్యాయత్నం జరిగింది. 23 ఏళ్ళ అంకిత్ ఝా అనే వ్యక్తిపై మరో వర్గానికి చెందిన నలుగురు కత్తితో దాడి చేశారు. ఈ ఘటన బీహార్లోని సితామర్హీ జిల్లా నాన్పుర్ పోలీస్ స్టేషన్ పరిధిలో ఆదివారం జరిగింది.
పోలీసుల వివరాల ప్రకారం.. అంకిత్ ఓ పాన్ షాప్ దగ్గర వాట్సాప్ చూస్తుండగా నిందితులు అతని వద్దకు వచ్చి గొడవ పడ్డారు. ఈ క్రమంలో వారు అతనిపై దాడి చేసి పరారయ్యారు. స్థానికులు బాధితుడిని హుటాహుటిన ఆసుపత్రికి తరలించారు. ప్రస్తుతం అంకిత్ చికిత్స పొందుతున్నాడు. అయితే.. ఈ ఘటనకు మతపరమైన ఘర్షణలతో ఎలాంటి సంబంధం లేదని పోలీసులు స్పష్టం చేశారు.
కాగా, ఈ హత్యాయత్నానికి, నుపుర్ శర్మ వివాదానికి సంబంధం ఉందంటున్నారు బాధితుడి కుటుంబసభ్యులు. ఘటన జరిగిన సమయంలో బాధితుడు నుపుర్ శర్మ వివాదానికి సంబంధించిన వీడియో చూస్తున్నాడని అందుకే ఓ వర్గానికి చెందిన నిందితులు అతని దాడి చేశారన్నారు.
కానీ ఎఫ్ఐఆర్ నమోదు చేసే సమయంలో ఆ పేరును ఫిర్యాదులో ప్రస్తావనకు తీసుకురాకూడదని.. అలానే ఎఫ్ఐఆర్ నమోదు చేస్తామని పోలీసులు బలవంతం చేసినట్టు ఆరోపించారు. కానీ అంకిత్ కుటుంబసభ్యుల ఆరోపణలను పోలీసులు తోసిపుచ్చారు. ఈ ఘటనకు, మతఘర్షణలకు ఎలాంటి సంబంధం లేదని.. పరారీ ఉన్న నలుగురు నిందితుల్లో ఇప్పటికే ఇద్దరిని అరెస్ట్ చేసినట్టు సితామర్హీ ఎస్పీ తెలిపారు.
Source: EtvBharat
