విజయవాడ: ఆశ్వయుజ పౌర్ణమిని పురస్కరించుకుని విజయవాడ ఇంద్రకీలాద్రిపై గిరి ప్రదక్షిణ కార్యక్రమం ఈరోజు ఉదయం వైభవంగా జరిగింది. వేలాది మంది భక్తులు పాల్గొని శ్రీ దుర్గా మల్లేశ్వర స్వామివార్లను దర్శించుకుని మొక్కులు చెల్లించుకున్నారు. మంగళవాయిద్యాలు, వేదమంత్రోచ్చారణలు, భజన సంకీర్తనలు, సంప్రదాయ కోలాట ప్రదర్శనల నడుమ గిరి ప్రదక్షిణ భక్తిశ్రద్ధలతో కొనసాగింది.
ఆశ్వయుజ పౌర్ణమి సందర్భంగా ఘాట్‌ రోడ్డు ప్రవేశ మార్గంలోని శ్రీ కామధేను అమ్మవారి సన్నిధి నుంచి ఇంద్రకీలాద్రి గిరి ప్రదక్షిణ ప్రారంభమైంది. ఆలయ అధికారులు ప్రత్యేక పూజలు నిర్వహించి, కొబ్బరికాయ కొట్టి కార్యక్రమానికి శ్రీకారం చుట్టారు. దేవస్థానం ఆధ్వర్యంలో ధర్మ ప్రచారంలో భాగంగా ఏర్పాటు చేసిన కళాబృందాలు సంప్రదాయ కోలాట నృత్యాలు, భజన సంకీర్తనలను ప్రదర్శించాయి. వేదపండితుల మంత్రోచ్చారణలు, మంగళవాయిద్యాల నడుమ ప్రదక్షిణ కొనసాగింది.
గిరి ప్రదక్షిణలో భాగంగా శ్రీ దుర్గా మల్లేశ్వర స్వామివార్ల వాహనం ముందు స్థానిక మహిళలు పలు ప్రాంతాల్లో రహదారులను పసుపు నీటితో శుద్ధి చేశారు. హారతులు సమర్పించి, కొబ్బరికాయలు కొట్టి అమ్మవారికి భక్తితో మొక్కులు చెల్లించుకున్నారు. జయజయధ్వానాలతో ఆ ప్రాంతాలు ఆధ్యాత్మిక వాతావరణాన్ని సంతరించుకున్నాయి.
ఘాట్‌ రోడ్డులోని శ్రీ అమ్మవారి ఆలయం నుంచి ప్రారంభమైన గిరి ప్రదక్షిణ కుమ్మరిపాలెం సెంటర్‌, విద్యాధరపురం, పాలఫ్యాక్టరీ, చిట్టినగర్‌, కొత్తపేట, బ్రాహ్మణవీధి మీదుగా తిరిగి ఇంద్రకీలాద్రికి చేరుకునేలా కొనసాగింది.
ప్రదక్షిణ మార్గంలో భక్తులకు దేవస్థానం తరఫున అమ్మవారి కుంకుమ, ప్రసాదాలను పంపిణీ చేశారు. వేలాది మంది భక్తులు ఉత్సాహంగా పాల్గొని అమ్మవారిని, స్వామివారిని దర్శించుకున్నారు.
పౌర్ణమి వేళ గిరి ప్రదక్షిణకు విశేష ప్రాధాన్యం
శ్రీ దుర్గా మల్లేశ్వర స్వామివారితో పాటు శ్రీ విఘ్నేశ్వరుడు, శ్రీ సుబ్రహ్మణ్యస్వామి, శ్రీ ఆంజనేయస్వామి తదితర దేవతలు కొలువైన ఇంద్రకీలాద్రి చుట్టూ ప్రదక్షిణ చేయడం విశేష ఫలితాలను ఇస్తుందని భక్తుల విశ్వాసం. ముఖ్యంగా పౌర్ణమి రోజున గిరి ప్రదక్షిణ చేయడం శ్రేష్ఠమని పండితులు పేర్కొంటారు.
ఆశ్వయుజ పౌర్ణమి సందర్భంగా నిర్వహించిన ఈ గిరి ప్రదక్షిణతో ఇంద్రకీలాద్రి పరిసరాలు భక్తి పారవశ్యంలో మునిగిపోయాయి. సంప్రదాయాలు, ఆధ్యాత్మిక కార్యక్రమాల సమ్మేళనంగా సాగిన ఈ వేడుక భక్తులకు ప్రత్యేక అనుభూతిని అందించింది.
