ఉత్తరప్రదేశ్లోని సంభల్ జిల్లాలో హిందూ యువకుడిని వివాహం చేసుకున్న తమన్నా మాలిక్ మరోసారి కన్వర్ యాత్రలో పాల్గొననున్న నేపథ్యంలో ఈ వ్యవహారం స్థానికంగా చర్చనీయాంశంగా మారింది. శాంతిభద్రతల పరిరక్షణ దృష్ట్యా జిల్లా యంత్రాంగం ముందస్తు చర్యలు చేపట్టింది.
సంభల్కు చెందిన తమన్నా మాలిక్, హిందూ యువకుడు అమన్ త్యాగిని ప్రేమించి సుమారు నాలుగేళ్ల క్రితం వివాహం చేసుకున్నారు. తమ వైవాహిక జీవితం సాఫీగా కొనసాగితే భర్తతో కలిసి పరమేశ్వరునికి జలాభిషేకం చేస్తానని తమన్నా మొక్కుకున్నట్లు కుటుంబ సభ్యులు తెలిపారు. ప్రస్తుతం ఈ దంపతులకు ఇద్దరు కుమారులు ఉన్నారు.
గత మహాశివరాత్రి సందర్భంగా తమన్నా బుర్ఖా ధరించి హరిద్వార్ నుంచి గంగాజలం తీసుకువచ్చి శివలింగానికి జలాభిషేకం చేయడం దేశవ్యాప్తంగా చర్చకు దారితీసింది. ఆ సమయంలో దీనిపై భిన్నాభిప్రాయాలు వ్యక్తమైనప్పటికీ, తాను నిత్యం బుర్ఖానే ధరిస్తానని, దుస్తులు తన వ్యక్తిగత ఎంపిక అని తమన్నా స్పష్టం చేశారు.
ఈసారి సావన్ మాసంలో కూడా భర్తతో కలిసి కన్వర్ యాత్ర నిర్వహించాలని ఆమె నిర్ణయించుకోవడంతో స్థానిక పోలీసులు అప్రమత్తమయ్యారు. రెండు వర్గాల మధ్య ఎలాంటి ఉద్రిక్తతలు తలెత్తకుండా ఉండేందుకు అస్మోలి పోలీసుల నివేదిక ఆధారంగా సంభల్ ఎస్డీఎం కోర్టు తమన్నా మాలిక్, అమన్ త్యాగిలకు శాంతిభద్రతల నోటీసులు జారీ చేసింది. రూ.20 వేల చొప్పున పూచీకత్తు సమర్పించాలని ఆదేశాలు జారీ చేసినట్లు అధికారులు తెలిపారు.
ఈ విషయంపై అమన్ త్యాగి మాట్లాడుతూ, భద్రతా కారణాల వల్ల తమన్నాను కోర్టుకు తీసుకురాలేదని, తాను మాత్రం నోటీసుల మేరకు కోర్టులో హాజరై అవసరమైన ప్రక్రియ పూర్తి చేశానని తెలిపారు. రాజ్యాంగం ప్రతి పౌరుడికి తనకు నచ్చిన దుస్తులు ధరించే స్వేచ్ఛ కల్పించిందని, తమన్నా బుర్ఖా ధరించినా కన్వర్ యాత్రను కొనసాగిస్తుందని చెప్పారు.
అలాగే, గాజియాబాద్కు చెందిన మరో మహిళ కూడా కన్వర్ యాత్రలో పాల్గొననున్న నేపథ్యంలో ఆమెకు మద్దతుగా తమన్నా ఈ యాత్ర చేపడుతున్నట్లు అమన్ త్యాగి వెల్లడించారు. మహిళల ఆధ్యాత్మిక విశ్వాసాలను గౌరవించాల్సిన అవసరం ఉందని ఆయన అభిప్రాయపడ్డారు.
ఈ వ్యవహారంపై సంభల్ ఎస్డీఎం వికాస్ చంద్ర స్పందిస్తూ, గతంలో శాంతిభద్రతల పరిస్థితులను దృష్టిలో ఉంచుకుని ముందస్తు చర్యలు మాత్రమే తీసుకున్నామని తెలిపారు. ఎవరైనా తమకు నచ్చిన వేషధారణలో కన్వర్ యాత్ర చేయవచ్చని, దుస్తులపై ఎలాంటి ఆంక్షలు లేవని స్పష్టం చేశారు. ఎలాంటి అవాంఛనీయ ఘటనలు చోటుచేసుకోకుండా ఉండేందుకు అవసరమైన భద్రతా ఏర్పాట్లు చేసినట్లు అధికారులు వెల్లడించారు.
