
0views
ప్రకాశం జిల్లా దొనకొండ మండలం లక్ష్మీపురంలోని రామాలయంలో చోరీ ఘటన ఆలస్యంగా వెలుగులోకి వచ్చింది. ఆలయ ధ్వజస్తంభానికి సంబంధించిన సుమారు 80 కేజీల ఇత్తడి తొడుగులను గుర్తుతెలియని వ్యక్తులు అపహరించారు. వీటి విలువ దాదాపు రూ.50 వేలు ఉంటుందని గ్రామస్తులు అంచనా వేస్తున్నారు.
పోలీసుల వివరాల ప్రకారం.. రామాలయ ధ్వజస్తంభం దెబ్బతినడంతో దానికి అమర్చిన ఇత్తడి తొడుగులను తొలగించారు. సుమారు 80 కేజీల బరువున్న వాటిని ఆలయం పక్కనే ఉన్న పంచాయతీ కార్యాలయ భవనంలో భద్రపరిచారు. వారం రోజుల క్రితం వరకు అవి అక్కడే ఉన్నట్లు గ్రామస్తులు తెలిపారు.
అయితే సోమవారం ఇతర పనుల నిమిత్తం పంచాయతీ కార్యాలయానికి వెళ్లిన గ్రామస్తులు ఇత్తడి తొడుగులు కనిపించకపోవడాన్ని గుర్తించారు. దీంతో గుర్తుతెలియని వ్యక్తులు వాటిని అపహరించి ఉంటారని అనుమానిస్తూ పోలీసులకు ఫిర్యాదు చేశారు.
గ్రామస్తుల ఫిర్యాదు మేరకు ఎస్ఐ రామకృష్ణ కేసు నమోదు చేశారు. చోరీకి పాల్పడిన వారిని గుర్తించేందుకు దర్యాప్తు చేపట్టినట్లు పోలీసులు తెలిపారు.





