జైపూర్ (రాజస్థాన్): హిందూ సమాజం, భారతీయ సంస్కృతి, జాతీయ ప్రయోజనాలకు వ్యతిరేకంగా సోషల్ మీడియా వేదికగా సాగుతున్న ప్రచారాన్ని సమర్థంగా ఎదుర్కోవాల్సిన అవసరం ఉందని జైపూర్ డైలాగ్స్ వేదికగా పలువురు వక్తలు అభిప్రాయపడ్డారు. తప్పుడు సమాచారాన్ని, సూక్ష్మమైన విషప్రచారాన్ని గుర్తించడంతో పాటు, దేశ ప్రయోజనాలకు సంబంధించిన వాస్తవాలను ప్రజల్లోకి తీసుకెళ్లేందుకు సమాజం అప్రమత్తంగా ఉండాలని పిలుపునిచ్చారు.
రాజస్థాన్ రాజధాని జైపూర్‌లో అక్టోబర్ 31న ప్రారంభమైన ప్రపంచ ప్రసిద్ధ ‘జైపూర్ డైలాగ్స్’ కార్యక్రమంలో భాగంగా నిర్వహించిన వివిధ చర్చాగోష్ఠుల్లో జాతీయ భద్రత, పొరుగు దేశాలతో సంబంధాలు, సోషల్ మీడియా ప్రభావం, కథనాల యుద్ధం వంటి కీలక అంశాలపై చర్చించారు.
పొరుగు దేశాలతో సంబంధాలు.. కొత్త దక్షిణాసియా క్రమం
‘భారత్ మరియు దాని పొరుగు దేశాలు: ఒక కొత్త దక్షిణాసియా క్రమం’ అనే అంశంపై జరిగిన చర్చలో కల్నల్ అజయ్ రైనా, జనరల్ డి.పి. పాండే, మేజర్ జనరల్ రాజీవ్ నారాయణన్, మేజర్ గౌరవ్ ఆర్య, కల్నల్ ఆర్.ఎస్.ఎన్. సింగ్, ఆది అచింత్ పాల్గొన్నారు.
దక్షిణాసియాలో మారుతున్న భౌగోళిక రాజకీయ పరిస్థితులు, భారత్ ఎదుర్కొంటున్న భద్రతాపరమైన సవాళ్లు, ద్వైపాక్షిక సంబంధాలపై తమ అభిప్రాయాలను వెల్లడించారు. ముఖ్యంగా సరిహద్దు భద్రతతో పాటు సమాచార రంగంలో సాగుతున్న పోరాటాన్ని కూడా దేశం తీవ్రంగా పరిగణించాల్సిన అవసరం ఉందని చర్చించారు.
భారత్‌పై అంతర్జాతీయంగా, ప్రాంతీయంగా రూపొందుతున్న వివిధ కథనాలను విశ్లేషించడం, వాటి వెనుక ఉన్న వాస్తవాలను ప్రజలకు వివరించడం అవసరమని వక్తలు పేర్కొన్నారు.
సోషల్ మీడియా.. నియంత్రణ లేని క్షిపణిలా మారుతోందా?
‘కథనాల యుద్ధం: సోషల్ మీడియా వర్సెస్ లూటియన్స్ మీడియా’ అనే అంశంపై జరిగిన మరో చర్చ ప్రత్యేక ఆకర్షణగా నిలిచింది. ఈ చర్చలో అశోక్ శ్రీవాస్తవ, ఆనంద్ నరసింహన్, సుశాంత్ సిన్హా, హర్ష్ కుమార్, ప్రకాష్ శ్రీవాస్తవ పాల్గొన్నారు. 2014 తర్వాత భారత మీడియా, సమాచార రంగాల్లో చోటుచేసుకున్న మార్పులను విశ్లేషించారు.
సోషల్ మీడియా ఒక ‘నియంత్రణ లేని క్షిపణి’లా మారిందని, దానిని వివిధ వర్గాలు తమ ప్రచార ప్రయోజనాలకు ఉపయోగించుకుంటున్నాయని వక్తలు అభిప్రాయపడ్డారు. గతంలో ప్రధాన మీడియా సంస్థలకే పరిమితమైన వార్తలు, అభిప్రాయాలు ఇప్పుడు సామాన్య ప్రజలు కూడా వీడియోలు, పోస్టుల రూపంలో నేరుగా ప్రజల్లోకి తీసుకెళ్లగలుగుతున్నారని పేర్కొన్నారు. అయితే ఈ స్వేచ్ఛతో పాటు తప్పుడు సమాచారం, వక్రీకరించిన కథనాలు వేగంగా వ్యాప్తి చెందే ప్రమాదం కూడా ఉందని హెచ్చరించారు.
