ఛత్రపతి సంభాజీనగర్ (మహారాష్ట్ర): శాశ్వత ఉద్యోగాలు ఇప్పిస్తామని, రూ.5 లక్షలు చెల్లిస్తామని ఆశ చూపి ఓ హిందూ దంపతులను క్రైస్తవ మతం మార్చారనే ఆరోపణలు మహారాష్ట్రలోని ఛత్రపతి సంభాజీనగర్ జిల్లాలో కలకలం రేపాయి. ఉద్యోగం పేరుతో తమను ప్రలోభపెట్టి, అనంతరం క్రైస్తవ మతంలోకి మార్చారని ఆరోపిస్తూ బాధితులు ఇచ్చిన ఫిర్యాదు ఆధారంగా ఐదుగురిపై వైజాపూర్ తాలూకాలోని వీర్గావ్ పోలీసులు కేసు నమోదు చేసినట్లు సమాచారం.
శాశ్వత ఉద్యోగాల పేరుతో రూ.5 లక్షల డిమాండ్?
ఫిర్యాదులోని వివరాల ప్రకారం.. బోర్సర్లోని శాంతి సదన్ ప్రాథమిక పాఠశాలలో బాలసాహెబ్ అప్పాసాహెబ్ సాతే, ఆయన భార్య పూజ కాంట్రాక్టు పద్ధతిలో పనిచేస్తున్నారు. ప్రయాణ ఖర్చుల కోసం వారికి నెలకు రూ.5 వేల చొప్పున చెల్లించేవారని పేర్కొన్నారు.
ఈ క్రమంలో శాశ్వత ఉపాధ్యాయ ఉద్యోగాలు ఇప్పిస్తామని, అందుకు రూ.5 లక్షలు చెల్లించాలని కొందరు చెప్పినట్లు ఫిర్యాదులో ఆరోపించారు. వారి మాటలు నమ్మిన దంపతులు స్నేహితుల వద్ద అప్పు తీసుకున్నారని తెలిపారు. అందులో రూ.4.80 లక్షలను సంజయ్ రూపేకర్ ఇంట్లో, మిగిలిన రూ.20 వేలును సెవెన్ హిల్స్లోని ఎస్ఎఫ్ఎస్ (సొసైటీ ఆఫ్ సెయింట్ ఫ్రాన్సిస్) కార్యాలయంలో చెల్లించినట్లు పేర్కొన్నారు.
మతం మార్చిన తర్వాత ఉద్యోగం కోసం ఒత్తిడి?
ఆ తర్వాత మాలి ఘోగర్గావ్లోని ఓ చర్చిలో ఫాదర్ ఆశిష్ మస్కే తమను క్రైస్తవ మతంలోకి మార్చినట్లు దంపతులు ఆరోపించారు. అయితే అనంతరం వారి ఇద్దరు చిన్నారులను కూడా క్రైస్తవ మతంలోకి మార్చాలని ఒత్తిడి తెచ్చినట్లు ఫిర్యాదులో పేర్కొన్నారు.
ఈ పరిణామాలతో తీవ్రంగా కలత చెందిన పూజ తన ఉద్యోగానికి రాజీనామా చేసి, పిల్లలను మతం మార్చేందుకు నిరాకరించినట్లు తెలిపారు. దీంతో సంస్థ తమను తిరిగి ఉద్యోగంలోకి తీసుకోకుండా, వారి స్థానంలో వేరొకరిని నియమించిందని ఫిర్యాదులో ఆరోపించారు.
ఐదుగురిపై కేసు
ఈ వ్యవహారంపై బాలసాహెబ్ అప్పాసాహెబ్ సాతే ఫిర్యాదు చేయడంతో ఫాదర్ ఆశిష్ మస్కే, సుదామ్ ఉబాలే, ఫాదర్ గెరాల్డ్ రెబెల్లో, సంజయ్ రూపేకర్, వినోద్ షెల్కేలపై పోలీసులు కేసు నమోదు చేసినట్లు సమాచారం. ఉద్యోగం పేరుతో తమను ఆర్థికంగా, మానసికంగా దోపిడీ చేశారని ఫిర్యాదుదారు ఆరోపించారు.
