ప్రశాంతతకు మారుపేరైన కాకినాడ నగరంలో జరిగిన ఒక దారుణ ఘటన యావత్ రాష్ట్రాన్ని ఉలిక్కిపడేలా చేసింది. సాదిక్ అనే వ్యక్తి పెట్టిన చిత్రహింసలు, వేధింపులు, బ్లాక్మెయిలింగ్ తట్టుకోలేక ఒకే కుటుంబానికి చెందిన నలుగురు ఆత్మహత్యకు పాల్పడగా, వారిలో 13 ఏళ్ల బాలుడు రియాన్ష్ మాత్రం అదృష్టవశాత్తు ప్రాణాలతో బయటపడ్డాడు. కళ్లెదుటే తన కుటుంబం మొత్తం జలసమాధి అవుతున్న దృశ్యాన్ని చూసిన ఆ చిన్నారి చెప్పిన వాస్తవాలు గుండెలు పిండేస్తున్నాయి. ఈ ఘటన వెనుక ఉన్న ఘోరమైన కుట్రను, నిందితుడి పైశాచికత్వాన్ని జనసేన ఎంపీ తంగెళ్ల ఉదయ్ శ్రీనివాస్ మీడియా ముందు ఆ బాలుడితో సహా హాజరై వివరించారు.
కాకినాడకు చెందిన ప్రముఖ మానేపల్లి జువెలర్స్ కుటుంబానికి చెందిన జగదీశ్ రెడ్డి, ప్రభుత్వ ఉద్యోగిని అయిన ఆయన భార్య, ఆమె తల్లిదండ్రులు.. ఈ నలుగురి మృతికి సాదిక్ అనే వ్యక్తి కారణమని ఎంపీ ఉదయ్ శ్రీనివాస్ తీవ్రంగా ఆరోపించారు. వారి కుమారుడైన రియాన్ష్ ప్రాణాలతో బయటపడి అసలు నిజాలను వెల్లడించాడని తెలిపారు. రియాన్ష్ కథనం ప్రకారం, షూటింగ్ కోచ్ అయిన సాదిక్.. మొదట తండ్రి జగదీశ్ రెడ్డిని లక్ష్యంగా చేసుకున్నాడు. ముంబై, కెనడా నుంచి ప్రమాదకర రసాయనాలు తెప్పించి, వాటిని ప్రోటీన్ షేక్లలో, ఆహారంలో కలిపి ఇచ్చి నెమ్మదిగా ఆయన్ను అనారోగ్యం పాలు చేసి, చివరికి ప్రాణాలు తీశాడని బాలుడు తెలిపాడు. ఈ విషయాన్ని చనిపోయే ముందు తల్లి రాసిన లేఖలో స్పష్టంగా పేర్కొన్నారని ఎంపీ వెల్లడించారు.ఆమె భర్త మరణం తర్వాత, సాదిక్ తన నిజ స్వరూపాన్ని బయటపెట్టాడు. రియాన్ష్ తల్లిని శారీరకంగా, మానసికంగా తీవ్రంగా హింసించడం మొదలుపెట్టాడు. ఆమెను రహస్యంగా వీడియోలు తీసి, వాటితో బ్లాక్మెయిల్ చేస్తూ ఆస్తులను తన పేరు మీద రాయించుకున్నాడు. బ్యాంకు ఖాతాలకు అనుసంధానమైన ఫోన్ నంబర్లను మార్చేసి, ఆర్థికంగా వారిని పూర్తిగా నిర్వీర్యం చేశాడు.
“నువ్వు ఎవరికైనా చెబితే, నీ కొడుకు రియాన్ష్ను ఉగ్రవాదులకు అమ్మివేస్తాను. నాకు అంతటా సంబంధాలున్నాయి” అని బెదిరించడంతో ఆ తల్లి బిడ్డ ప్రాణాల కోసం అన్నింటినీ సహించింది. ఫోన్కు ట్రాకింగ్ యాప్లు పెట్టి, 24 గంటలూ నిఘా నీడలో బంధించాడు.అన్నింటినీ వదులుకోవడానికి సిద్ధపడిన ఆ తల్లిని, సాదిక్ చివరిగా ఒక ఘోరమైన షరతు విధించాడు. “నువ్వు హిందూ మతాన్ని వదిలి ఇస్లాం స్వీకరించాలి. మతం మారితేనే నిన్ను, నీ కొడుకును వదిలిపెడతా” అని ఒత్తిడి చేశాడు. చిన్నప్పటి నుంచి దైవభక్తి, సంప్రదాయాలతో పెరిగిన ఆమె, ఆస్తులు, బంధాలు అన్నింటినీ వదులుకున్నా, తన ధర్మాన్ని, నమ్మకాన్ని వదులుకోవడానికి సిద్ధపడలేదు. ఈ క్రమంలోనే, తన కొడుకును ఉగ్రవాదిగా మార్చేస్తాడేమోనన్న భయంతో, తన ధర్మాన్ని కాపాడుకోవడం కోసం, కుటుంబంతో సహా ఆత్మహత్య చేసుకోవాలని ఆ తల్లి కఠిన నిర్ణయం తీసుకుంది.
ఆత్మహత్యకు ముందు రోజు, కుటుంబ సభ్యులంతా కారులో నాలుగు గంటల పాటు మౌనంగా ప్రయాణించారు. సాదిక్ తమను ట్రాక్ చేస్తున్నాడేమోనన్న భయంతో ఒక్క మాట కూడా మాట్లాడుకోలేదు. వారధి వద్దకు చేరుకున్నాక, మొదట తల్లి, కుమారుడు రియాన్ష్ నీటిలోకి దూకారు. ఆ తర్వాత కాసేపటికి తాత, అమ్మమ్మ కూడా దూకారు. ఈత వచ్చిన రియాన్ష్ 40 నిమిషాల పాటు నీటిలో పోరాడుతుండగా, మత్స్యకారుల బోటు వచ్చి అతన్ని కాపాడింది. నీటిలో కొట్టుకుపోతూ కూడా, “అమ్మా, నువ్వు బతికి నీ స్నేహితుల దగ్గరికెళ్లిపో. వాడి కంట పడకు. నా కళ్ల ముందే నువ్వు చావడం నేను చూడలేను” అని రియాన్ష్ తన తల్లితో చెప్పిన చివరి మాటలు అక్కడి వారిని కంటతడి పెట్టించాయి.
ఎంపీ ఉదయ్ శ్రీనివాస్ డిమాండ్లు, ప్రభుత్వానికి విజ్ఞప్తి ఈ ఘటనను తీవ్రంగా పరిగణించిన ఎంపీ ఉదయ్ శ్రీనివాస్, నిందితుడిని కఠినంగా శిక్షించాలని డిమాండ్ చేశారు. “పెహల్గామ్లో 26 మందిని చంపిన ఉగ్రవాదుల గురించి దేశం మొత్తం మాట్లాడుకుంది. ఇక్కడ ఒక్కడే నలుగురిని చంపాడు. వాళ్లకంటే పెద్ద టెర్రరిస్ట్ వీడు. ఇలాంటి వాడిని ఉరితీయాలి” అని ఉద్వేగంగా అన్నారు. ఈ కేసును వెంటనే సీబీఐకి అప్పగించాలని, నిందితుడి వెనుక ఉన్న నెట్వర్క్ను, ఢిల్లీ సంబంధాలను, అతని ద్వారా మోసపోయిన ఇతర బాధితుల వివరాలను వెలికితీయాలని కోరారు. ఇది సాధారణ ఘటన కాదని, పిల్లల ద్వారా కుటుంబాల్లోకి ప్రవేశించి, తల్లులను లోబరుచుకుని, బ్లాక్మెయిల్ చేసి మత మార్పిడులకు పాల్పడే ఒక “కొత్త రకం లవ్ జిహాద్” అని ఆయన అభివర్ణించారు.జిల్లా కలెక్టర్ను కలిసి, సాదిక్ కబ్జా చేసిన ఆస్తులన్నింటినీ తిరిగి రియాన్ష్ పేరు మీదకు మార్చాలని, తండ్రికి ప్రభుత్వం నుంచి రావలసిన బిల్లులను బాలుడికి అందజేయాలని, అతని చదువు, భవిష్యత్తు కోసం ప్రభుత్వం ఆర్థిక సహాయం అందించాలని విజ్ఞప్తి చేశారు.
నిందితుడి తరఫున ఏ న్యాయవాది వాదించవద్దని కాకినాడ బార్ అసోసియేషన్కు కూడా ఆయన విజ్ఞప్తి చేశారు. సనాతన ధర్మాన్ని కాపాడకపోతే ఇలాంటి దుర్మార్గులు చెలరేగిపోతారని, ఈ దారుణ ఘటనపై సమగ్ర విచారణ జరిపి, దోషులకు కఠిన శిక్ష పడే వరకు పోరాడతామని ఆయన స్పష్టం చేశారు
