ఇంద్రకీలాద్రి సమగ్ర అభివృద్ధి

విజయవాడ శ్రీ దుర్గామల్లేశ్వర స్వామి దేవస్థానంలోని ఇంద్రకీలాద్రి సమగ్ర అభివృద్ధికి రాష్ట్ర ప్రభుత్వం అత్యంత కృతనిశ్చయంతో ఉందని, సామాన్య భక్తులకు మెరుగైన, సౌకర్యవంతమైన సేవలు అందించడమే ప్రభుత్వ తొలి ప్రాధాన్యత అని రాష్ట్ర దేవాదాయ శాఖ కమిషనర్ కె. రామచంద్ర మోహన్ తెలిపారు.

ఇంద్రకీలాద్రిపై నిర్మాణంలో ఉన్న నూతన లడ్డూ పోటు (ప్రసాదశాల), అన్నప్రసాద భవనం పనులను కమిషనర్ పరిశీలించారు. ఈ సందర్భంగా ఆలయ ధర్మకర్తల మండలి చైర్మన్ **బొర్రా రాధాకృష్ణ (గాంధీ)**తో పాటు ఉన్నతాధికారులతో కలిసి పనుల పురోగతిని సమీక్షించారు.

ఈ సందర్భంగా కమిషనర్ మాట్లాడుతూ, ఇంద్రకీలాద్రి అభివృద్ధికి సంబంధించిన మాస్టర్ ప్లాన్ ముసాయిదాను జూలై 15లోపు సిద్ధం చేసి సమర్పించాలని అధికారులను ఆదేశించారు. అలాగే రాబోయే శ్రావణ మాసంలోనే నూతన లడ్డూ పోటు, అన్నదాన భవనాలను భక్తుల వినియోగానికి అందుబాటులోకి తీసుకురావాలని స్పష్టం చేశారు.

నూతన లడ్డూ పోటు నిర్మాణ పనులను పరిశీలించిన కమిషనర్, పనులు ఆశించిన వేగంతో సాగకపోవడంపై తీవ్ర అసంతృప్తి వ్యక్తం చేశారు. తాను పలుమార్లు స్వయంగా పర్యవేక్షించి సూచనలు చేసినప్పటికీ నిర్మాణంలో జాప్యం కొనసాగుతుండటంపై ఇంజినీరింగ్ అధికారులను ప్రశ్నించారు. రాబోయే దసరా శరన్నవరాత్రి ఉత్సవాలను దృష్టిలో ఉంచుకుని 24 గంటల పాటు షిఫ్టుల వారీగా పనులు నిర్వహించి నిర్మాణాన్ని వేగవంతం చేయాలని ఆదేశించారు. భవనానికి వేయాల్సిన రంగులను కూడా స్వయంగా పరిశీలించి ఎంపిక చేశారు.

అనంతరం అన్నదాన భవన నిర్మాణ పనులను పరిశీలించిన కమిషనర్, అక్కడ కూడా పనులు వేగంగా జరగడం లేదని అసంతృప్తి వ్యక్తం చేశారు. నిర్మాణ వ్యయాన్ని వృథా చేయకుండా, ప్రతి పని భక్తులకు ఉపయోగపడే విధంగా అత్యున్నత నాణ్యతతో చేపట్టాలని సూచించారు. శ్రావణ మాసంలోనే ఈ రెండు భవనాలను ప్రారంభించి భక్తుల సేవకు అందుబాటులోకి తీసుకురావాలని, దసరా నవరాత్రి ఉత్సవాల నాటికి నూతన పోటులోనే ప్రసాదాల తయారీ, నూతన అన్నప్రసాద భవనంలోనే అన్నప్రసాద వితరణ జరగాలని ఆదేశించారు.

పనుల్లో జాప్యం, నిధుల వృథాను ఎట్టి పరిస్థితుల్లోనూ సహించబోమని కమిషనర్ హెచ్చరించారు. భక్తుల సౌకర్యాలకు సంబంధించిన పనుల్లో ఎలాంటి నిర్లక్ష్యానికి తావు ఉండదని స్పష్టం చేశారు.

ఈ సందర్భంగా ఎలివేటెడ్ క్యూ కాంప్లెక్స్ కింద ఏర్పాటు చేసిన కూల్‌డ్రింక్ దుకాణాలు, క్లాక్‌రూమ్ తదితర వాణిజ్య కార్యకలాపాలపై కూడా కమిషనర్ తీవ్ర ఆగ్రహం వ్యక్తం చేశారు. భక్తుల సౌకర్యార్థం నిర్మించిన ప్రదేశాలను వ్యాపార అవసరాలకు వినియోగించడం సరికాదని పేర్కొంటూ, ఆ దుకాణాలను వెంటనే తొలగించాలని దేవస్థానం అధికారులను ఆదేశించారు.

“ఇంద్రకీలాద్రిపై ఉన్న ప్రతి అంగుళం స్థలం భక్తుల అవసరాలు, వారి సౌకర్యాల కోసమే వినియోగించాలి. వాణిజ్య కార్యకలాపాలకు అవకాశం ఉండకూడదు” అని కమిషనర్ అధికారులకు స్పష్టం చేశారు.

ఈ పర్యటనలో దేవస్థానం డిప్యూటీ ఈవో కిషోర్ బాబు, ఎగ్జిక్యూటివ్ ఇంజినీర్ శ్రీమతి రమ, అసిస్టెంట్ కమిషనర్ రంగారావు, ఇంజినీరింగ్ అధికారులు తదితరులు పాల్గొన్నారు.