ఆర్ట్ ఆఫ్ లివింగ్ ఫౌండర్ గురుదేవ్ శ్రీశ్రీ రవిశంకర్ కు అరుదైన గుర్తింపు దక్కింది. అమెరికాలోని వాషింగ్టన్ రాష్ట్రంలోని సియాటెల్ నగరం అక్టోబర్ 19వ తేదీని ‘శ్రీశ్రీ రవిశంకర్ దినం’గా ప్రకటించింది. ఆర్ట్ ఆఫ్ లివింగ్ వ్యవస్థాపకునిగా శ్రీశ్రీ రవిశంకర్ను.. ప్రపంచశాంతి, ప్రజల మానసిక ఆరోగ్యం, సమాజ అభివృద్ధికి చేస్తున్న సేవల్ని ప్రశంసించిన 34వ అంతర్జాతీయ నగరంగా సియాటెల్ నిలిచింది. ప్రపంచ శాంతికి, మానవతా విలువల పరిరక్షణకు కృషిచేస్తున్న, ప్రపంచంలోని అత్యంత ప్రముఖవ్యక్తులలో ఒకరైన గురుదేవ్ శ్రీశ్రీ రవిశంకర్ సేవలను గుర్తిస్తూ సియాటెల్ నగరం అక్టోబర్ 19 తేదీని ‘శ్రీశ్రీ రవిశంకర్ దినం’గా ప్రకటించింది. ‘ప్రపంచవ్యాప్తంగా మానసిక ఒత్తిడి.. హింస లేని సమాజాన్ని నిర్మించేందుకు.. ప్రజల మానసిక ఆరోగ్యాన్ని, వివిధ మతాల మధ్య సుహృద్భావాన్ని పెంపొందించటం.. సమాజాభివృద్ధికి కృషి చేయటం వంటి విషయాలలో గురుదేవుల స్ఫూర్తికి గుర్తింపుగా ఈ గౌరవాన్ని ప్రకటించారు’ అని ప్రకటనలో తెలిపారు. అమెరికా పర్యటనలో భాగంగా గురుదేవ్ సియాటెల్ నగరంలో నిర్వహిస్తున్న “సోక్ ఇన్ బ్లిస్: ఏ మాస్టర్ క్లాస్ బియాండ్ మైండ్ ఫుల్ నెస్” కార్యక్రమానికి వేలాది ప్రజలు హాజరై ధ్యాన, సత్సంగాలలో పాల్గొన్నారు.
సియోటెల్లో జరిగిన ప్రత్యేక అభినందన సమావేశంలో.. నగర మేయర్ బ్రూస్ హారెల్ శ్రీశ్రీ రవిశంకర్ను ప్రశంసించారు. “మీరు ఇక్కడకు రావడం మాకెంతో గౌరవప్రదం.. మీ రాక వలన ఇక్కడ ఉత్సాహం, ప్రశాంతత నెలకొన్నాయి’ అన్నారు. ‘ప్రపంచవ్యాప్తంగా గౌరవింపబడుతున్న మానవతావాది, ఆధ్యాత్మికవేత్త, శాంతిదూత అయిన శ్రీశ్రీ రవిశంకర్ గారి ఒత్తిడి లేని, హింస లేని సమాజం నెలకొల్పాలనే లక్ష్యం ప్రపంచ వ్యాప్తంగా 180 దేశాలలో 8 కోట్లకు పైగా ప్రజలను ప్రభావితం చేసింది’ అని అధికారిక ప్రశంసాపత్రంలో పేర్కొన్నారు మేయర్ బ్రూస్ హారెల్. సియాటెల్, పుగెట్ సౌండ్ ప్రాంతాలలో ఆర్ట్ ఆఫ్ లివింగ్ సంస్థ నిర్వహించిన ఒత్తిడి నిర్మూలన శిబిరాలు, యువ నాయకత్వ శిబిరాలు, సామాజిక అభివృద్ధి, సేవా కార్యక్రమాలు ప్రజలలో మానసిక దృఢతను, సౌభ్రాతృత్వాన్ని, ఆరోగ్యాన్ని పెంపొందించేందుకు తోడ్పడ్డాయి. సకల జనుల శ్రేయస్సును కోరే సియాటెల్ నగరపు దార్శనికతను ఈ కార్యక్రమం ప్రతిబింబిస్తోంది’ అన్నారు.
అంతకు ముందురోజైన అక్టోబర్ 18వ తేదీన వాంకోవర్ నగరం సైతం గురుదేవ్ను ఇదే విధంగా సత్కరించి.. అక్టోబర్ 18వ తేదీని గురుదేవ్ శ్రీశ్రీ రవిశంకర్ దినంగా ప్రకటించటం గమనార్హం. ‘మానవతా విలువలను మేల్కొలపటం ద్వారా హింస లేని, ఒత్తిడి లేని సమాజాన్ని నిర్మించాలనే గురుదేవ్ శ్రీశ్రీ రవిశంకర్ ఆకాంక్ష ప్రపంచవయాప్తంగా కోట్లాది ప్రజల ఆలోచనా పరిధిని, బాధ్యతను విస్తరింపజేసి, ప్రపంచప్రగతికి పాటుడేలా వారిని ప్రేరేపించింది’ అన్నారు వాంకోవర్ మేయర్ కెన్ సిమ్. ‘శ్రీశ్రీ రవిశంకర్ స్థాపించిన ఆర్ట్ ఆఫ్ లివింగ్ సంస్థ చేపట్టిన సేవాకార్యక్రమాలు మా సమాజంలో సామరస్యాన్ని, పరస్పర విశ్వాసాన్ని నెలకొల్పాయి. సంఘర్షణల నివారణ, శాంతిని నెలకొల్పటం, మానసిక గాయాలకు సాంత్వన చేకూర్చటం, పేదరిక నిర్మూలన, మహిళా సాధికారత, ఖైదీలలో మానసిక పరివర్తన, అందరికీ విద్యను అందించే దిశగా అడుగులు వేస్తున్నారు’ అని ప్రశంసించారు.
అంతకముందు వాషింగ్టన్ రాష్ట్రానికి శ్రీశ్రీ రవిశంకర్ను సెనేటర్ డెరెక్ స్టాన్ ఫోర్డ్ స్వాగతం పలికారు. ‘ఆర్ట్ ఆఫ్ లివింగ్ ద్వారా చేపడుతున్న స్ఫూర్తిదాయకమైన పనులు, మీరు చేస్తున్న శాంతి ప్రయత్నాలు ప్రపంచవ్యాప్తంగా లెక్కలేనన్ని జీవితాలను స్పృశించి, వారికి సాంత్వనను, ఆలోచనలలో స్పష్టతను తీసుకువచ్చి, వారి జీవితాలను అర్థవంతంగా మార్చాయి. మీరే చెప్పిన విధంగా ప్రజాసేవ, ధ్యానం అనేవి వేర్వేరు మార్గాలు కావు – ప్రశాంతంగా, కేంద్రంలో స్థిరంగా ఉన్న మనసు సమాజసేవలో సైతం ఉత్సాహంగా, ధైర్యంగా పాల్గొని, మంచిమార్పు తేగలుగుతుంది అన్నారు సెనేటర్ డెరెక్ స్టాన్ ఫోర్డ్. గురుదేవ్ ఇచ్చిన సామాజిక బాధ్యతా నినాదాన్ని ప్రస్తావిస్తూ, సమాజంలో మంచిని పెంచే ఆలోచనలు సాధికారకమైన ప్రయత్నాలుగా మార్చేందుకు వారి మాటలు దోహదపడతాయి’ అన్నారు.
