భారత మెసేజింగ్ యాప్ అరట్టై మార్కెట్లో సంచలనం సృష్టిస్తోంది. పూర్తిగా స్వదేశీ పరిజ్ఞానంతో రూపొందించిన ‘అరట్టై’ యాప్ వాట్సాప్ ను సైతం వెనక్కి నెట్టి అగ్రస్థానాన్ని కైవసం చేసుకుంది. యాపిల్ యాప్ స్టోర్లోని సోషల్ నెట్వర్కింగ్ విభాగంలో తాము అధికారికంగా నెంబర్ 1 స్థానానికి చేరుకున్నట్లు అరట్టై మాతృసంస్థ ‘జోహో’ సోషల్ మీడియా ప్లాట్ఫామ్ ‘ఎక్స్’ వేదికగా ప్రకటించింది.
తమిళంలో ‘కబుర్లు’ అని అర్థం వచ్చే ‘అరట్టై’ పేరుతో 2021లో ఈ యాప్ ప్రారంభమైంది. అయితే ఇటీవల కేంద్ర విద్యాశాఖ మంత్రి ధర్మేంద్ర ప్రధాన్ వంటి ప్రముఖులు స్వదేశీ డిజిటల్ ప్లాట్ఫామ్లను ప్రోత్సహించాలని పిలుపునివ్వడం ఈ యాప్కు కలిసొచ్చింది. దీనికి తోడు ‘స్పైవేర్ రహిత – మేడ్ ఇన్ ఇండియా’ అనే నినాదం కూడా వినియోగదారులను బాగా ఆకర్షించింది. దీంతో దేశభక్తితో పాటు, తమ డేటా భద్రతకు ప్రాధాన్యమిచ్చే యూజర్లు పెద్ద సంఖ్యలో ఈ యాప్ను డౌన్లోడ్ చేసుకున్నారు. ప్రముఖ టెక్ వ్యాపారవేత్త వివేక్ వాధ్వా సైతం ఈ యాప్ను ‘ఇండియాస్ వాట్సాప్ కిల్లర్’ అని ప్రశంసించారు. కేవలం మూడు రోజుల్లోనే రోజూవారి సైన్ అప్స్ 3 వేల నుండి 3.5 లక్షల వరకు పెరిగాయి.
ప్రస్తుతం అరట్టై యాప్లో ఆడియో, వీడియో కాల్స్కు మాత్రమే ఎండ్-టు-ఎండ్ ఎన్క్రిప్షన్ సదుపాయం ఉంది. అయితే వాట్సాప్లో ఉన్నట్లుగా చాట్లకు ఈ భద్రతా ఫీచర్ ఇంకా అందుబాటులోకి రాలేదు. త్వరలోనే ఈ ఫీచర్ను తీసుకొస్తామని కంపెనీ చెబుతోంది. అలాగే వినియోగదారులు పెరుగుతుండడంతో యాప్ సర్వర్లపై తీవ్ర ఒత్తిడి ఉంది. దానివల్ల యాప్ ఫీచర్స్ సరిగ్గా పనిచేయడం లేదు. . ఈ సమస్యలను అంగీకరించిన జోహో, సర్వర్ల సామర్థ్యాన్ని పెంచేందుకు కృషి చేస్తున్నామని, ఈ సమస్యలను సరిదిద్దడానికి రెండు రోజులు పట్టవచ్చని తెలిపింది. ఇక వాట్సాప్ కు అరట్టై కు మధ్య తేడా ఏంటంటే…అరట్టై లో కాల్స్ ఎన్క్రిప్టెడ్ అయినా చాట్స్ మాత్రం ఎండ్ టు ఎండ్ ఎన్క్రిప్టెడ్ కావు. అంతేకాకుండా దీన్నిఫ్యామిలీ చాట్స్ క మాత్రమే కాకుండా ఆఫీస్ వర్క్, బిజినెస్ వర్క్ కూడా ఉపయోగించుకోవచ్చు. మరింతగా దీని లోపాలను సవరించుకుంటూ సర్వర్లపైన దఈష్టి సారిస్తే, రాను రాను ఈ స్వదేశీ యాప్ వాట్సాప్ కు గట్టి పోటీ ఇవ్వనుందని అంటున్నారు.
