NewsSeva

కొనసాగుతున్న ఆర్ ఎస్ ఎస్ తుఫాన్ సహాయ కార్యక్రమాలు

209views

నివర్ తుఫాను కారణంగా పూర్తిగా జలమయమైన నెల్లూరులోని వివిధ లోతట్టు ప్రాంతాలలో ఆరెస్సెస్ కార్యకర్తలు తమ సేవా కార్యక్రమాలను కొనసాగిస్తున్నారు. వివిధ ప్రాంతాలలోని వారికి సహాయం అందించటం కోసం సేవాభారతి వారి ఆధ్వర్యంలో ఒక టోల్ ఫ్రీ నంబర్ ను ఇచ్చారు. ఆ టోల్ ఫ్రీ నంబర్ కు ఎవరైనా ఫోన్ చేసి తమ ప్రాంతంలోని సమస్యల గురించి తెలియజేస్తే అందుకు తగినట్లుగా వారికి సహాయం అందిస్తున్నారు.

ఈ క్రమంలో మనుమసిద్ధి నగర్ నుంచి కొంతమంది ఫోన్ చేసి తమ ప్రాంతంలో ఒక పెద్ద చెట్టు రోడ్డుకు అడ్డంగా పడి ఉన్నదని తెలిపారు. దాంతో కార్యకర్తలు వెంటనే అక్కడికి చేరుకొని ఆ చెట్టును నరికి, అక్కడ అడ్డు తొలగించారు. నగరంలోని పొర్లుకట్ట, బోడిగాడి తోట, మనుమసిద్ధి నగర్, పరమేశ్వరి నగర్ తదితర ప్రాంతాలలోని వారికి ప్రాథమికంగా దోమల కడ్డీలు, అగ్గిపెట్టె, మందులు, పాలు, 2 బిస్కట్ ప్యాకెట్లతో కూడిన కిట్లను అందజేశారు. ఆయా ప్రాంతాలలో త్రాగునీరు లభించక ఇబ్బంది పడుతున్న పరిస్థితులలో మంచినీళ్ళ క్యాన్లను అందజేశారు. అనంతరం ఆహార పొట్లాలు, నిత్యావసరాలను కూడా సరఫరా చేశారు. వెంకటాచలం టోల్ గేట్ వద్ద వాహన డ్రైవర్లకు ఆహార పొట్లాలు అందజేశారు. ఈ మొత్తం సహాయ కార్యక్రమాలకి లయన్స్ క్లబ్ నెల్లూరు, లయన్స్ క్లబ్ పినాకిని, లయన్స్ క్లబ్ లియో, జయభారత్ హాస్పిటల్, జైన సమాజం, కోమల విలాస్ హోటల్ యాజమాన్యం ఆర్ధిక సహకారాన్ని అందించాయి.

అలాగే కావలి నగరంలోని వేంగాయగారిపాలెంలోని గుంటగట్టుసంగం గిరిజన కాలనీలో చెట్లు పడిపోయిన విషయం తెలుసుకున్న ఆర్ ఎస్ ఎస్ కార్యకర్తలు అక్కడికి వెళ్లి ఆ చెట్లను అడ్డు తొలగించారు. అక్కడి నిరుపేద యానాదులకు బియ్యం పంపిణీ చేశారు. తుఫాను కారణంగా ఏర్పడిన క్లిష్ట పరిస్థితులలో ఆర్ ఎస్ ఎస్ వారు అందిస్తున్న సహాయం నిరుపమానమైనదని అందరూ కొనియాడుతున్నారు.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.