ఎన్టీఆర్ జిల్లా విజయవాడలోని గొల్లపూడిలో ఇస్కాన్ విజయవాడ ఆధ్వర్యంలో ప్రతిష్ఠాత్మకంగా నిర్మించనున్న ఇస్కాన్ వేదిక్ కల్చరల్ సెంటర్ నిర్మాణానికి భూమిపూజ కార్యక్రమం వైభవంగా నిర్వహించారు. వేద పండితుల మంత్రోచ్ఛారణలు, ఆధ్యాత్మిక వాతావరణం మధ్య సంప్రదాయబద్ధంగా జరిగిన ఈ కార్యక్రమానికి విజయవాడ పార్లమెంట్ సభ్యులు కేశినేని శివనాథ్ (చిన్ని) ముఖ్య అతిథిగా హాజరయ్యారు. ఈ సందర్భంగా ఆయన ప్రత్యేక పూజలు నిర్వహించి భూమిపూజ కార్యక్రమంలో పాల్గొన్నారు.
ఈ సందర్భంగా ఎంపీ కేశినేని శివనాథ్ మాట్లాడుతూ.. భారతీయ సంస్కృతి, సనాతన ధర్మం, వేద విజ్ఞానం ప్రపంచవ్యాప్తంగా విశిష్టమైన గుర్తింపును పొందాయని పేర్కొన్నారు. ఈ గొప్ప ఆధ్యాత్మిక, సాంస్కృతిక వారసత్వాన్ని భావితరాలకు అందించడంలో ఇస్కాన్ వంటి ఆధ్యాత్మిక సంస్థలు కీలక పాత్ర పోషిస్తున్నాయని తెలిపారు.
గొల్లపూడిలో నిర్మించనున్న ఇస్కాన్ వేదిక్ కల్చరల్ సెంటర్ విజయవాడకు మరో ముఖ్యమైన ఆధ్యాత్మిక కేంద్రంగా నిలవనుందని అన్నారు. ఈ కేంద్రం ద్వారా ప్రజలకు ఆధ్యాత్మిక చింతనతో పాటు భారతీయ సంప్రదాయాలు, సాంస్కృతిక విలువలు, వేద విజ్ఞానంపై మరింత అవగాహన కలుగుతుందని పేర్కొన్నారు.
నేటి ఆధునిక సమాజంలో యువతకు భారతీయ సంస్కృతి, సంప్రదాయాలు, వేద విజ్ఞానం గురించి తెలియజేయడం ఎంతో అవసరమని అన్నారు. ఆధ్యాత్మికత మనిషిలో నైతిక విలువలను పెంపొందించడమే కాకుండా సమాజంలో సానుకూల ఆలోచనలు, మంచి జీవన విధానానికి మార్గనిర్దేశం చేస్తుందని వివరించారు.
ఆధ్యాత్మిక కేంద్రంగా విజయవాడకు మరింత గుర్తింపు
విజయవాడ నగరం ప్రాచీన కాలం నుంచి ఆధ్యాత్మికంగా విశిష్టమైన ప్రాధాన్యతను కలిగి ఉందని ఎంపీ పేర్కొన్నారు. ఇంద్రకీలాద్రిపై కొలువైన శ్రీ కనకదుర్గమ్మ ఆలయంతో పాటు నగరంలోని పలు పుణ్యక్షేత్రాలు విజయవాడకు ప్రత్యేక ఆధ్యాత్మిక గుర్తింపును తీసుకొస్తున్నాయని తెలిపారు.
ఈ నేపథ్యంలో ఇస్కాన్ వేదిక్ కల్చరల్ సెంటర్ నిర్మాణం పూర్తయితే విజయవాడ ఆధ్యాత్మిక, సాంస్కృతిక ప్రాధాన్యత మరింత పెరుగుతుందని ఆకాంక్షించారు. భక్తులకు, ఆధ్యాత్మిక చింతన కలిగిన వారికి ఈ కేంద్రం ఒక ముఖ్యమైన వేదికగా నిలుస్తుందని పేర్కొన్నారు.
భారతీయ సంస్కృతి, సనాతన ధర్మ ప్రచారం, వేద విజ్ఞాన పరిరక్షణకు ఈ కేంద్రం దోహదపడుతుందనే ఆశాభావాన్ని వ్యక్తం చేశారు.
