అద్భుత వైద్యం పేరుతో ప్రజలను తప్పుదోవ పట్టించారనే ఆరోపణల నేపథ్యంలో,మహారాష్ట్ర పూణేలోని కొండ్వా పోలీస్ స్టేషన్ పరిధిలో క్రైస్తవ పాస్టర్ కెన్నెత్ పాల్ సిల్వేతో పాటు మరో ఏడుగురిపై పోలీసులు కేసు నమోదు చేశారు. ‘పవిత్ర జలం’ సేవించడం లేదా శరీరానికి రాసుకోవడం ద్వారా క్యాన్సర్, కణితులు వంటి తీవ్రమైన వ్యాధులు నయమవుతాయని ప్రచారం చేసినట్లు ఫిర్యాదులో పేర్కొనబడింది.
ప్రార్థనా సభలో ‘అద్భుత వైద్యం’ ప్రచారం ?
ఫిర్యాదు ప్రకారం, కొండ్వాలో నిర్వహించిన ఒక క్రైస్తవ ప్రార్థనా కార్యక్రమంలో వాలంటీర్లు ప్లాస్టిక్ సీసాలలో నీటిని పంపిణీ చేస్తూ ఒక్కో సీసాకు ₹20 చొప్పున వసూలు చేశారు. ఈ నీటిని ‘పవిత్ర జలం’గా పేర్కొంటూ, అనారోగ్యంతో బాధపడుతున్న వారు దానిని ప్రభావిత భాగాలపై రాసుకుంటే వ్యాధులు తగ్గుతాయని లేదా పూర్తిగా నయమవుతాయని అక్కడికి వచ్చిన వారికి చెప్పినట్లు ఆరోపణలు ఉన్నాయి.
ఫిర్యాదులో పేర్కొన్న వివరాల ప్రకారం, పాస్టర్ కెన్నెత్ పాల్ సిల్వే సభలో పాల్గొన్న వారిని ఉద్దేశించి, “మీ శరీరంలో అనారోగ్యం ఉన్న భాగంపై కుడిచేతిని ఉంచండి. క్యాన్సర్ మరియు కణితులతో సహా ఏ వ్యాధినైనా దేవుడు నయం చేస్తాడు” అని చెప్పినట్లు ఆరోపించబడింది.
ఫిర్యాదుదారు మరియు ఆమె స్నేహితురాలు ఈ కార్యక్రమాన్ని తమ మొబైల్ ఫోన్లలో చిత్రీకరించినట్లు తెలిపారు. అయితే అక్కడ ఉన్న మహిళా వాలంటీర్లు వీడియో తీయడాన్ని వ్యతిరేకించి, వారితో వాగ్వాదానికి దిగడమే కాకుండా, మొబైల్ ఫోన్లలోని వీడియోలను తొలగించినట్లు ఫిర్యాదులో పేర్కొన్నారు.
మూఢనమ్మకాల నిరోధక చట్టం కింద కేసు
ఈ ఘటనపై ఫిర్యాదు అందుకున్న పోలీసులు పాస్టర్తో పాటు మరో ఏడుగురిపై *మహారాష్ట్ర నరబలి మరియు ఇతర అమానవీయ, దుష్ట, అఘోరీ ఆచారాలు మరియు క్షుద్ర విద్యల నివారణ మరియు నిర్మూలన చట్టం’తో పాటు ఇతర సంబంధిత చట్టాల కింద కేసు నమోదు చేశారు. ప్రస్తుతం ఈ వ్యవహారంపై దర్యాప్తు కొనసాగుతోంది.
