జిమ్ ట్రైనర్ నమ్మబలికి ఒక యువతిపై దారుణానికి ఒడిగట్టిన ఘటన ఉత్తరప్రదేశ్లోని సహారన్పూర్ జిల్లాలో వెలుగుచూసింది. బాధితురాలి ఫిర్యాదు మేరకు పోలీసులు నిందితుడితో పాటు అతనికి సహకరించిన మరొకరిని అరెస్ట్ చేశారు.
వివరాల్లోకి వెళితే స్థానిక బిహారీగఢ్ ప్రాంతానికి చెందిన 21 ఏళ్ల యువతి బి.ఎస్సీ నర్సింగ్ చదువుతోంది. ఆరోగ్య స్పృహతో ఆమె స్థానికంగా ఉన్న ఒక జిమ్కు వెళ్లేది. అక్కడ జిమ్ ట్రైనర్గా పనిచేస్తున్న షెహజాద్ (28) తో ఆమెకు పరిచయం ఏర్పడింది. ఈ పరిచయాన్ని ఆసరాగా చేసుకున్న షెహజాద్, ఆమెను నమ్మించి డెహ్రాడూన్ తీసుకెళ్లాడు.
బాధితురాలిచ్చిన ఫిర్యాదు ప్రకారం.. ప్రయాణ సమయంలో షెహజాద్ ఆమెకు ఇచ్చే ప్రోటీన్ డ్రింక్లో మత్తుమందు కలిపాడు. అది తాగిన యువతి స్పృహ కోల్పోవడంతో, కారులోనే ఆమెపై అత్యాచారానికి పాల్పడ్డాడు. ఈ ఘాతుకానికి ముకర్రం (27) అనే వ్యక్తి సహకరించినట్లు తేలింది. ముకర్రం గత కొన్ని రోజులుగా బాధితురాలి కదలికలపై నిఘా ఉంచి (రెక్కీ నిర్వహించి), షెహజాద్కు సమాచారం అందించినట్లు పోలీసులు గుర్తించారు.
బాధితురాలి ఫిర్యాదును స్వీకరించిన బిహారీగఢ్ పోలీసులు తక్షణమే స్పందించారు. ఎస్పీ (రూరల్) సాగర్ జైన్ పర్యవేక్షణలో ప్రత్యేక బృందాలు గాలించి, ప్రధాన నిందితుడు షెహజాద్తో పాటు ముకర్రంను శనివారం అరెస్ట్ చేశారు. నిందితులపై అత్యాచారం, కుట్ర పూరిత చర్యలు మరియు ఇతర సంబంధిత సెక్షన్ల కింద కేసులు నమోదు చేశారు.
ఈ ఘటన స్థానికంగా తీవ్ర కలకలం రేపింది. జిమ్లకు వెళ్లే మహిళల భద్రతపై ఆందోళనలు వ్యక్తమవుతున్నాయి. నిందితులను కఠినంగా శిక్షించాలని స్థానిక ప్రజలు డిమాండ్ చేస్తున్నారు.
