భారత ప్రభుత్వ నిబంధనలను ఉల్లంఘిస్తూ పాకిస్థాన్లో తయారైన సౌందర్య సాధనాలను (బ్యూటీ ప్రొడక్ట్స్) విక్రయిస్తున్న ముఠా గుట్టును మహారాష్ట్రలోని ఛత్రపతి సంభాజీనగర్ పోలీసులు రట్టు చేశారు. నగరంలోని వివిధ ప్రాంతాల్లో బహిరంగంగా ‘మేడ్ ఇన్ పాకిస్తాన్’ లేబుల్స్ ఉన్న క్రీములు, సబ్బులు అమ్ముతున్నారన్న పక్కా సమాచారంతో పోలీసులు ఏకకాలంలో దాడులు నిర్వహించి ముగ్గురు దుకాణ యజమానులపై కేసులు నమోదు చేశారు.
భారతదేశ విదేశీ వాణిజ్య డైరెక్టరేట్ జనరల్ (DGFT) జారీ చేసిన ఉత్తర్వుల ప్రకారం పాకిస్తాన్ నుండి దిగుమతి చేసుకునే వస్తువులపై కఠినమైన నిషేధాలు ఉన్నాయి. అయితే, నిబంధనలకు విరుద్ధంగా కొందరు వ్యాపారులు రహస్య మార్గాల ద్వారా పాకిస్తానీ బ్రాండ్లకు చెందిన తెల్లబడే క్రీములు (Whitening Creams), సబ్బులు, సీరమ్స్ మరియు ఇతర బ్యూటీ ప్యాక్లను తెప్పించి స్థానిక మార్కెట్లో విక్రయిస్తున్నట్లు మహారాష్ట్ర నవనిర్మాణ సేన (MNS) కార్యకర్తలు పోలీసుల దృష్టికి తీసుకెళ్లారు.
ఫిర్యాదు అందుకున్న వెంటనే సిటీ చౌక్ పోలీస్ స్టేషన్ పరిధిలోని క్రైమ్ బ్రాంచ్ బృందాలు వేర్వేరు ప్రాంతాల్లో ఉన్న మూడు ప్రముఖ దుకాణాలపై ఆకస్మిక దాడులు చేశాయి. ఘాస్మండి ప్రాంతంలోని ‘హైలైట్ కలెక్షన్’ (యజమాని మహ్మద్ అబ్రార్ – 26), షాహ్గంజ్ ప్రాంతంలోని ‘ఓమ్ ట్రేడర్స్’ (యజమాని అంకుర్ అగర్వాల్ – 35)
సిటీ సెంటర్ మాల్లోని ‘ఫలక్ ఎంపోరియం’ (యజమాని జుమాన్ ఖాన్ – 48) దుకాణాల్లో ఈ తనిఖీలు జరిగాయి. ఈ దాడుల్లో దాదాపు ₹59,980 విలువైన సుమారు 28 రకాల నిషేధిత పాకిస్తానీ ఉత్పత్తులను పోలీసులు స్వాధీనం చేసుకున్నారు.
పట్టుబడిన నిందితుల వద్ద ఈ వస్తువులకు సంబంధించి ఎలాంటి చెల్లుబాటు అయ్యే కొనుగోలు బిల్లులు గానీ, దిగుమతి పత్రాలు గానీ లేవని పోలీసులు గుర్తించారు. కస్టమర్లను మోసం చేయడం, నిషేధిత వస్తువులను అక్రమంగా విక్రయించడం వంటి నేరాల కింద నిందితులపై విదేశీ వాణిజ్య (అభివృద్ధి మరియు నియంత్రణ) చట్టం (FTDR Act), భారతీయ న్యాయ సంహిత (BNS), మరియు డ్రగ్స్ అండ్ కాస్మెటిక్స్ యాక్ట్ లోని సంబంధిత సెక్షన్ల కింద ఎఫ్ఐఆర్ నమోదు చేశారు.
ఈ నిషేధిత ఉత్పత్తులు అసలు భారతదేశంలోకి ఎలా ప్రవేశించాయి? వీటి వెనుక ఉన్న సరఫరా నెట్వర్క్ ఏమిటి? అనే కోణంలో పోలీసులు లోతైన దర్యాప్తు జరుపుతున్నారు.
