భారతీయ పండుగల్లో అత్యంత ముఖ్యమైన దీపావళికి అంతర్జాతీయంగా మరో విశిష్ట గౌరవం లభించింది. ఈ పండుగ భారతదేశంతో పాటు విదేశాల్లోనూ విశేష ప్రాచుర్యం పొందింది.
దీపావళి పండుగ సమీపిస్తున్న తరుణంలో అమెరికాలోని కాలిఫోర్నియా రాష్ట్రం దీనిని అధికారిక సెలవు దినంగా ప్రకటించింది. ఈ మేరకు కాలిఫోర్నియా గవర్నర్ న్యూసమ్ ఒక ప్రకటన విడుదల చేశారు.
గతంలో అమెరికా కాంగ్రెస్‌లో దీపావళిని సెలవు దినంగా గుర్తించాలని బిల్లు ప్రవేశపెట్టిన విషయం విదితమే. ఆ ప్రక్రియ కొనసాగింపుగా, కాలిఫోర్నియా స్టేట్ అసెంబ్లీ ఆమోదించిన బిల్లుపై గవర్నర్ న్యూసమ్ సంతకం చేశారు.
భారతీయ అమెరికన్లకు గుర్తింపు
ఈ బిల్లును అసెంబ్లీ సభ్యుడు ఆష్ కల్రా ప్రవేశపెట్టారు. దీపావళి పండుగను అధికారిక సెలవుగా ప్రకటించడం ద్వారా కాలిఫోర్నియాలో నివసిస్తున్న లక్షలాది భారతీయ అమెరికన్లకు ఇది గౌరవ సూచకమని ఆయన అన్నారు. ఈ పండుగ సద్భావన, శాంతి, సమైక్యత అనే విలువల సందేశంతో సమాజాన్ని ఏకం చేస్తుందని ఆయన పేర్కొన్నారు.
ఇప్పటికే రెండు రాష్ట్రాల్లో అమల్లో
కాలిఫోర్నియా కంటే ముందు పెన్సిల్వేనియా, న్యూయార్క్ రాష్ట్రాలు దీపావళిని అధికారిక సెలవుగా గుర్తించాయి. ఈ నేపథ్యంలో భారతీయుల పండుగకు గుర్తింపు ఇచ్చిన మూడవ అమెరికన్ రాష్ట్రంగా కాలిఫోర్నియా నిలిచింది.
