కర్నూలు జిల్లా హొళగుంద మండల కేంద్రంలో భక్త కనకదాసు నూతన విగ్రహ, కలశ ప్రతిష్ఠాపన కార్యక్రమం ఘనంగా నిర్వహించారు. జూనియర్ కళాశాల ఎదురుగా ఉన్న చెరువు సమీపంలో ఏర్పాటు చేసిన ఈ కార్యక్రమానికి భక్తులు పెద్ద సంఖ్యలో హాజరయ్యారు.
దమ్మూరు గోవర్ధననందపురి స్వామి, మదిరే యల్లా లింగామఠం నాగరాజు స్వామి ఆధ్వర్యంలో ప్రతిష్ఠాపన కార్యక్రమం జరిగింది. ఈ సందర్భంగా ప్రత్యేక పూజలు, ఆధ్యాత్మిక కార్యక్రమాలు నిర్వహించారు. ప్రముఖులు కార్యక్రమానికి హాజరై భక్త కనకదాసు విగ్రహాన్ని దర్శించుకుని పూజలు చేశారు.
ఈ సందర్భంగా వారు మాట్లాడుతూ.. భక్త కనకదాసు తన కీర్తనలు, భక్తి సాహిత్యం ద్వారా సమాజంలో చైతన్యాన్ని పెంపొందించిన మహనీయుడని పేర్కొన్నారు. సామాజిక సమానత్వం, భక్తి మార్గం, మానవ విలువలను ప్రజల్లో విస్తరించడంలో ఆయన కృషి చిరస్మరణీయమని అన్నారు.
ప్రతిష్ఠాపన వేడుకల్లో భాగంగా గ్రామంలో భక్త కనకదాసు చిత్రపటంతో ఊరేగింపు నిర్వహించారు. గజ్జెల్లి చిన్నారుల కోలాట ప్రదర్శన, భజన బృందాల కార్యక్రమాలు భక్తులను ఆకట్టుకున్నాయి. పరిసర గ్రామాల నుంచి వచ్చిన భక్తులకు నిర్వాహకులు అన్నదాన కార్యక్రమం చేపట్టారు.
భక్త కనకదాసు విగ్రహ ప్రతిష్ఠాపన సందర్భంగా గ్రామంలో ఆధ్యాత్మిక వాతావరణం నెలకొంది.
