2020 ఫిబ్రవరిలో ఢిల్లీలో జరిగిన అల్లర్లకు సంబంధించిన కేసులో కర్కర్డూమా కోర్టు ఐదుగురిని దోషులుగా నిర్ధారించింది. భజన్పురా ప్రాంతంలోని పెట్రోల్ పంపు వద్ద జరిగిన హింసాత్మక ఘటనకు సంబంధించి ఆరిఫ్, మహమ్మద్ ఖాలిద్, అబ్దుల్ సత్తార్, తన్వీర్ అలీ, హునైన్లపై నమోదైన కేసులో కోర్టు ఈ తీర్పు వెలువరించింది. దోషులకు శిక్షను సెప్టెంబర్ 16న ఖరారు చేయనుంది.
అదనపు సెషన్స్ జడ్జి ప్రవీణ్ సింగ్ విచారణ సందర్భంగా, అల్లర్లకు పాల్పడుతున్న గుంపును చెదరగొట్టేందుకు ప్రయత్నించిన ప్రభుత్వ అధికారులపై దాడి చేసినట్లు నమోదైన తీవ్రమైన ఆరోపణలను ప్రాసిక్యూషన్ సాక్ష్యాలతో నిరూపించిందని పేర్కొన్నారు.
కోర్టు రికార్డుల్లోని సాక్ష్యాలు, ప్రత్యక్ష సాక్షుల వాంగ్మూలాలను పరిశీలించిన అనంతరం, సుమారు 100 నుంచి 150 మంది వ్యక్తులు భజన్పురా పెట్రోల్ పంపు వద్ద గుమిగూడినట్లు కోర్టు నిర్ధారించింది. ఈ గుంపు అల్లర్లు, నిప్పంటించడం, నేరపూరిత దుష్ప్రవర్తన, విధ్వంసానికి పాల్పడే ఉద్దేశంతో అక్కడికి చేరుకున్నట్లు తీర్పులో పేర్కొంది.
ఈ కేసులో కోర్టు ఐదుగురిని దోషులుగా నిర్ధారించడంతో, సెప్టెంబర్ 16న వారికి విధించే శిక్షపై నిర్ణయం వెలువడనుంది.