దసరా, దుర్గాపూజ వేడుకలకు ప్రసిద్ధి చెందిన పశ్చిమ బెంగాల్లో ఈ ఏడాది ఉత్సవాల నిర్వహణకు కొత్త ప్రభుత్వం సన్నాహాలు ప్రారంభించింది. రాష్ట్రంలో బిజెపి ప్రభుత్వం ఏర్పాటైన తర్వాత తొలిసారిగా జరుగుతున్న దుర్గాపూజ వేడుకలను ఘనంగా నిర్వహించేందుకు ప్రభుత్వం పలు కీలక నిర్ణయాలు తీసుకుంది.
ఈ నేపథ్యంలో ముఖ్యమంత్రి సువేందు అధికారి రాష్ట్రవ్యాప్తంగా ఉన్న దుర్గాపూజ కమిటీల ప్రతినిధులతో సమావేశమయ్యారు. ఈ సందర్భంగా ప్రతి దుర్గాపూజ కమిటీకి రూ.1 లక్ష చొప్పున ఆర్థిక సాయం అందించనున్నట్లు ప్రకటించారు. అయితే ఆర్థికంగా స్థోమత ఉన్న పూజా కమిటీలు ప్రభుత్వం అందించే ఆర్థిక సాయాన్ని స్వచ్ఛందంగా వదులుకోవాలని సీఎం విజ్ఞప్తి చేశారు ప్రభుత్వం అందించే నగదుపై పూజా కమిటీలు ఆధారపడే పరిస్థితి ఏర్పడటం కూడా సరికాదని సీఎం అభిప్రాయపడ్డారు.
దుర్గాపూజకు విద్యుత్ ఛార్జీలు పూర్తిగా మాఫీ
దుర్గాపూజ వేడుకల నేపథ్యంలో ప్రభుత్వం పలు కీలక నిర్ణయాలను ప్రకటించింది.
– రాష్ట్రవ్యాప్తంగా ఉన్న దుర్గాపూజ కమిటీలకు **విద్యుత్ ఛార్జీలను 100 శాతం మాఫీ** చేయనున్నారు.
– పూజా మండపాలకు **ఫైర్ సేఫ్టీ క్లియరెన్స్** పొందేందుకు ఎలాంటి ఫీజు చెల్లించాల్సిన అవసరం ఉండదు.
– మహాలయ రోజున **ఈడెన్ గార్డెన్స్లో ప్రభుత్వ ఆధ్వర్యంలో దుర్గాపూజ** నిర్వహించనున్నారు. ఈ కార్యక్రమానికి ప్రధాని నరేంద్ర మోదీ హాజరయ్యే అవకాశం ఉన్నట్లు సమాచారం.
– దుర్గాపూజ వేడుకల్లో **డీజేల వినియోగంపై పూర్తిస్థాయి నిషేధం** విధించనున్నారు.
– అష్టమి రోజున రాష్ట్రవ్యాప్తంగా **మద్యం దుకాణాలు, బార్లను మూసివేయనున్నారు**.
– గత ప్రభుత్వ హయాంలో నిర్వహించిన **దుర్గా పూజ కార్నివాల్ను ఈ ఏడాది నిర్వహించకూడదని** ప్రభుత్వం నిర్ణయించింది.
– ఉత్తమ విగ్రహం, ఉత్తమ మండపం తదితర విభాగాల్లో పూజా కమిటీలకు అందించే **‘శరద్ సమ్మాన్’ అవార్డులను** కొనసాగించనున్నారు.
సంప్రదాయాలకు ప్రాధాన్యం
దుర్గాపూజ సందర్భంగా ఏర్పాటు చేసే విగ్రహాలు, మండపాలు రాష్ట్ర సాంస్కృతిక, మతపరమైన సంప్రదాయాలకు అనుగుణంగా ఉండేలా చూడాలని సీఎం సువేందు అధికారి పూజా కమిటీలకు సూచించారు.
భక్తి, సంప్రదాయం, సంస్కృతికి ప్రాధాన్యం ఇస్తూనే ప్రశాంత వాతావరణంలో దుర్గాపూజ వేడుకలు నిర్వహించేలా అన్ని కమిటీలు సహకరించాలని ప్రభుత్వం కోరింది.
