ముంబై: మహారాష్ట్ర రాజధాని ముంబైలోని కండివాలి ప్రాంతంలో మతమార్పిడికి ప్రయత్నించడం కలకలం రేపుతున్నాయి. హిందూ దేవతలను అవమానిస్తూ, డబ్బు ఆశ చూపి క్రైస్తవ మతంలోకి మారాలని ప్రలోభపెట్టినట్లు ఆరోపణలు ఎదుర్కొంటున్న ముగ్గురిని స్థానిక హిందూ యువకులు పట్టుకుని పోలీసులకు అప్పగించినట్లు స్థానిక పత్రిక నివేదించింది.
ఈ ఘటనలో ఇద్దరు భారతీయులు, దక్షిణ కొరియాకు చెందిన ఒక విదేశీ వ్యక్తి ఉన్నట్లు నివేదిక పేర్కొంది. భారతీయులిద్దరూ గతంలో బౌద్ధ మతానికి చెందినవారని, అనంతరం క్రైస్తవ మతంలోకి మారినట్లు ఆరోపణలు వచ్చాయి. దక్షిణ కొరియా యువకుడు చదువుల కోసం భారత్కు వచ్చినట్లు సమాచారం.
స్థానికుల ఆరోపణల ప్రకారం.. అనారోగ్యంతో బాధపడుతున్న వారికి తమ కార్యక్రమానికి వస్తే వ్యాధులు నయమవుతాయని, క్రైస్తవ మతాన్ని స్వీకరిస్తే రూ.5 నుంచి రూ.6 లక్షల వరకు ఆర్థిక ప్రయోజనం లభిస్తుందని ప్రలోభపెట్టినట్లు చెబుతున్నారు. అయితే ఈ ఆరోపణలను పోలీసులు అధికారికంగా ధృవీకరించాల్సి ఉంది.
శ్రావణ మాసం సందర్భంగా కొందరు హిందూ మహిళలు శివుడిని పూజిస్తున్న సమయంలో.. శివలింగంపై అవమానకరమైన వ్యాఖ్యలు చేశారని స్థానికులు ఆరోపించారు. ఈ సంభాషణను జితేంద్ర చౌదరి, ఆయన స్నేహితులు తమ మొబైల్ ఫోన్లలో రికార్డు చేసినట్లు నివేదిక పేర్కొంది.
దీంతో హిందూ యువకులు ఆ ముగ్గురిని ప్రశ్నించినట్లు సమాచారం. మతమార్పిడికి డబ్బు లేదా ఇతర ప్రలోభాలు చూపడం చట్టవిరుద్ధమని, హిందూ దేవతలను అవమానించడం సరికాదని వారు అభ్యంతరం వ్యక్తం చేసినట్లు తెలుస్తోంది.
అనంతరం బజరంగ్ దళ్, విశ్వ హిందూ పరిషత్ కార్యకర్తలకు సమాచారం అందించగా వారు సంఘటనా స్థలానికి చేరుకుని పోలీసులకు సమాచారం ఇచ్చినట్లు నివేదిక పేర్కొంది. ముగ్గురినీ పోలీసులకు అప్పగించినట్లు తెలిపింది.
ఈ నేపథ్యంలో దక్షిణ కొరియా పౌరుడితో పాటు మిగిలిన ఇద్దరిపైనా చట్టపరమైన చర్యలు తీసుకోవాలని విశ్వ హిందూ పరిషత్ డిమాండ్ చేసినట్లు సమాచారం.
ఇదిలా ఉండగా, మహారాష్ట్రలో మతమార్పిడులకు సంబంధించి కొత్త చట్టపరమైన నిబంధనలు ఇటీవల అమల్లోకి వచ్చాయి. మహారాష్ట్ర ఫ్రీడమ్ ఆఫ్ రిలిజన్ యాక్ట్, 2026 ప్రకారం బలవంతం, మోసం, ప్రలోభం, తప్పుడు ప్రాతినిధ్యం లేదా వివాహం వంటి మార్గాల ద్వారా మతమార్పిడి చేయడం నేరంగా పరిగణించబడుతుంది.
మత స్వేచ్ఛ రాజ్యాంగం కల్పించిన హక్కు అయినప్పటికీ.. బలవంతం, మోసం లేదా ఆర్థిక ప్రలోభాలతో మతమార్పిడికి ప్రయత్నాలు జరిగితే వాటిపై చట్టపరమైన చర్యలు తీసుకోవాల్సిన అవసరం ఉందన్న చర్చ ఈ ఘటనతో మరోసారి ముందుకు వచ్చింది.
