ఉత్తరప్రదేశ్లోని బరేలీ జిల్లా అగస్త్య ముని ఆశ్రమంలో ఓ యువతి స్వచ్ఛందంగా సనాతన ధర్మాన్ని స్వీకరించి, తన ప్రియుడిని వేద పద్ధతిలో వివాహం చేసుకుంది. ఈ ఘటనకు సంబంధించిన వివరాలు ప్రస్తుతం చర్చనీయాంశంగా మారాయి.
జాన్పూర్ జిల్లాలోని భీలంపుర్కు చెందిన షాజహాన్ బానో స్వచ్ఛందంగా సనాతన ధర్మాన్ని స్వీకరించి, తన పేరును ప్రతీక్షగా మార్చుకున్నట్లు ఆశ్రమ నిర్వాహకులు తెలిపారు. అనంతరం ప్రతాప్గఢ్ జిల్లా భోజేమౌ గ్రామానికి చెందిన పవన్తో వేద మంత్రోచ్ఛారణల మధ్య సప్తపది పూర్తి చేసి వివాహ బంధంలోకి అడుగుపెట్టింది.
ఆశ్రమ వర్గాల సమాచారం ప్రకారం, షాజహాన్ బానో, పవన్కు పాఠశాల రోజుల నుంచే పరిచయం ఉంది. ఒకే కళాశాలలో డిగ్రీ చదువుతున్న సమయంలో ఆ పరిచయం ప్రేమగా మారింది. దాదాపు పదేళ్లుగా ప్రేమలో ఉన్న వీరు వివాహం చేసుకోవాలని నిర్ణయించుకున్నప్పటికీ, కుటుంబ సభ్యుల నుంచి అంగీకారం లభించలేదని తెలిపారు. ఇద్దరూ మేజర్లు కావడంతో వివాహం కోసం బరేలీలోని అగస్త్య ముని ఆశ్రమాన్ని ఆశ్రయించినట్లు పేర్కొన్నారు.
ఆశ్రమ పూజారి కేకే శంఖధార్ మాట్లాడుతూ, ఇరువురి వయస్సు, విద్యార్హతలకు సంబంధించిన పత్రాలను పరిశీలించి వారు చట్టబద్ధంగా మేజర్లు అని నిర్ధారించుకున్న అనంతరం వివాహం నిర్వహించినట్లు తెలిపారు. యువతి అభ్యర్థన మేరకు సనాతన సంప్రదాయం ప్రకారం సిందూర ధారణ, మంగళసూత్ర ధారణ, సప్తపది తదితర వివాహ క్రతువులు నిర్వహించినట్లు చెప్పారు.
తమ ఆశ్రమంలో జరిగిన 251వ వివాహం ఇదేనని నిర్వాహకులు తెలిపారు. చట్టపరమైన ప్రక్రియలు, అవసరమైన పత్రాల పరిశీలన పూర్తయిన తర్వాత స్వచ్ఛందంగా ముందుకు వచ్చే మేజర్ జంటలకే వివాహాలు నిర్వహిస్తున్నామని స్పష్టం చేశారు.
ఇదిలా ఉండగా, ఈ వివాహంపై ఒక వర్గం అభ్యంతరాలు వ్యక్తం చేస్తున్నట్లు సమాచారం. యువతి కుటుంబంలో కూడా ఈ వ్యవహారంపై విభేదాలు నెలకొన్నట్లు స్థానిక వర్గాలు తెలిపాయి. అధికారుల నుంచి ఈ అంశంపై అధికారిక ప్రకటన వెలువడాల్సి ఉంది.
