లక్నో: ఉత్తరప్రదేశ్లో ప్రముఖ హిందూ నాయకుడు ధీరేంద్ర ప్రతాప్ సింగ్ దారుణ హత్యకు గురయ్యారు. లక్నోలోని దుబగ్గా పోలీస్ స్టేషన్ పరిధిలో ఓ కాలువలో ఆయన మృతదేహం లభ్యమైంది. ధీరేంద్ర ప్రతాప్ సింగ్ను కాల్చి చంపిన అనంతరం మృతదేహాన్ని ఆయన ఫార్చ్యూనర్ కారులోనే తరలించి కాలువలో పడేసినట్లు పోలీసులు అనుమానిస్తున్నారు.
సమాచారం అందుకున్న వెంటనే పోలీసులు ఘటనా స్థలానికి చేరుకుని దర్యాప్తు ప్రారంభించారు. మృతదేహాన్ని వెలికితీసి పోస్టుమార్టం నిమిత్తం ఆసుపత్రికి తరలించినట్లు సమాచారం. ఘటనకు సంబంధించిన ఆధారాలను సేకరించేందుకు పోలీసులు ప్రయత్నిస్తున్నారు.
ధీరేంద్ర ప్రతాప్ సింగ్ స్వస్థలం ఉన్నావ్ అయినప్పటికీ కొంతకాలంగా లక్నోలో నివాసం ఉంటున్నారు. ప్రాథమిక దర్యాప్తులో భూ వివాదమే హత్యకు కారణమై ఉండొచ్చని పోలీసులు అనుమానిస్తున్నారు. అయితే హత్యకు దారితీసిన పూర్తి కారణాలు ఇంకా నిర్ధారణ కాలేదు.
ఈ కేసులో ధీరేంద్ర ప్రతాప్ సింగ్ డ్రైవర్ పాత్రపైనా పోలీసులు దృష్టి సారించారు. ఆయన ప్రత్యర్థులతో డ్రైవర్ కలిసి కుట్ర చేసి ఉండొచ్చన్న కోణంలోనూ దర్యాప్తు కొనసాగుతోంది. హత్య జరిగిన సమయంలో కారులో ఎవరెవరు ఉన్నారు, అనంతరం మృతదేహాన్ని కాలువ వద్దకు ఎలా తరలించారు అనే అంశాలపై పోలీసులు ఆధారాలు సేకరిస్తున్నారు.
హత్య వెనుక ఉన్న అసలు కారణాలు, నిందితులెవరన్నది తేల్చేందుకు పోలీసులు అన్ని కోణాల్లో దర్యాప్తు చేస్తున్నారు. ఘటనకు సంబంధించి మరిన్ని వివరాలు పోలీసుల దర్యాప్తు పూర్తయిన తర్వాత వెల్లడయ్యే అవకాశం ఉంది.
