విజయవాడ: ఇంద్రకీలాద్రిపై కొలువైన “శ్రీ దుర్గా మల్లేశ్వర స్వామి దేవస్థానం”,””శ్రీ దుర్గా మల్లేశ్వర స్వామి దేవస్థానం”కు వచ్చే భక్తులకు మరింత మెరుగైన అన్నప్రసాద సేవలు అందుబాటులోకి రానున్నాయి. తిరుమల తరిగొండ వెంగమాంబ అన్నప్రసాద భవనం తరహాలో ఆధునిక వసతులతో రోజుకు 10 వేల మంది భక్తులకు అన్నప్రసాదం అందించేలా అధునాతన వంటశాలను ఏర్పాటు చేయనున్నారు. ఆధునిక సాంకేతికత, శాస్త్రీయ విధానాలతో కచ్చితమైన కొలతలు పాటిస్తూ తాజా, నాణ్యమైన అన్నప్రసాదాన్ని భక్తులకు అందించడమే లక్ష్యంగా ఏర్పాట్లు చేస్తున్నారు.
ఏటేటా దుర్గమ్మ దర్శనానికి వచ్చే భక్తుల సంఖ్య పెరుగుతుండటంతో ప్రస్తుతం ఉన్న సంప్రదాయ వంట విధానంలో అన్నప్రసాదం తయారీ, పంపిణీలో పలు ఇబ్బందులు ఎదురవుతున్నాయి. ముఖ్యంగా దసరా ఉత్సవాలు, భవానీ దీక్షల విరమణ సమయంలో భారీగా తరలివచ్చే భక్తులకు అన్నప్రసాదం అందించడం సవాలుగా మారుతోంది.
ఈ సమస్యలకు శాశ్వత పరిష్కారం చూపేందుకు హరేకృష్ణ మూవ్మెంట్ ఛారిటబుల్ ఫౌండేషన్ (అక్షయపాత్ర) సాంకేతికతను వినియోగించుకోనున్నారు. అన్నప్రసాదం తయారీ, నిర్వహణను దుర్గగుడి ఆధ్వర్యంలో నిర్వహించేలా ఏర్పాట్లు చేస్తున్నారు. రానున్న సుమారు 30 ఏళ్ల భక్తుల అవసరాలను దృష్టిలో పెట్టుకుని ఈ సదుపాయాలను అభివృద్ధి చేయనున్నారు.
ఇంద్రకీలాద్రిపై ఇప్పటికే సుమారు రూ.26 కోట్ల వ్యయంతో ఆధునిక అన్నదాన భవనాన్ని నిర్మించారు. భవనం గ్రౌండ్ఫ్లోర్లో సెంట్రల్ ప్రాంతం, అన్నదాన స్టోర్, వంట తయారీ విభాగం, క్యూలైన్లు, వాష్రూమ్లు ఏర్పాటు చేశారు. మొదటి అంతస్తులో భక్తులు అన్నప్రసాదం స్వీకరించే డైనింగ్ ప్రాంతాన్ని ఏర్పాటు చేశారు.
ఈ భవనం ద్వారా ఒకేసారి వెయ్యి మంది భక్తులు భోజనం చేసే సౌకర్యం అందుబాటులోకి వచ్చింది. అయితే భవనానికి అనుగుణంగా అత్యాధునిక వంటశాల అవసరం ఉండటంతో ఇప్పుడు ఆ దిశగా చర్యలు చేపడుతున్నారు.
రూ.1.95 కోట్లతో అధునాతన స్టీమ్ కిచెన్
దుర్గగుడిలో సరైన ఆధునిక వంటశాల లేకపోవడంతో భక్తులకు అన్నప్రసాదం అందించడంలో ఎదురవుతున్న ఇబ్బందులను అధిగమించేందుకు రూ.1.95 కోట్లతో అధునాతన స్టీమ్ ఆధారిత కిచెన్ ఏర్పాటు చేయనున్నారు.
దేశవ్యాప్తంగా భారీ స్థాయిలో ఆధునిక వంటశాలలను నిర్వహిస్తున్న అక్షయపాత్ర ఫౌండేషన్ ఆధ్వర్యంలో ఈ కిచెన్ను ఏర్పాటు చేయనున్నారు. ఆధునిక యంత్రాలు, శాస్త్రీయ విధానాలను వినియోగించడం ద్వారా వంట ప్రక్రియను మరింత వేగవంతం చేయడంతోపాటు ఆహార నాణ్యతను పెంచనున్నారు.
కచ్చితమైన కొలతలు.. ఒకే రుచి, నాణ్యత
ఆధునిక ఆటోమేటెడ్ యంత్రాల వినియోగంతో వంటలో ఒకే రకమైన ఉష్ణోగ్రత, నిర్దిష్టమైన ఉడికే సమయం, కచ్చితమైన కొలతలు పాటించే అవకాశం ఉంటుంది. దీంతో ప్రతిరోజూ అన్నప్రసాదం రుచి, నాణ్యతలో స్థిరత్వం ఉండేలా చూడనున్నారు.
అలాగే నిత్యావసరాల వృథాను తగ్గించడంతోపాటు అవసరానికి అనుగుణంగా ఆహారాన్ని తయారు చేసుకునే అవకాశం ఉంటుంది. భక్తుల సంఖ్య ఒక్కసారిగా భారీగా పెరిగే దసరా, భవానీ దీక్షల వంటి సందర్భాల్లోనూ అన్నప్రసాదం అందించడంలో ఇబ్బందులు లేకుండా చర్యలు తీసుకుంటున్నారు.
తిరుమల తరహాలో భారీ వంట విధానం
తిరుమలలో వేలాది మంది భక్తులకు నిరంతరాయంగా అన్నప్రసాదం అందిస్తున్న తరహాలో ఇంద్రకీలాద్రిపైనా భారీ స్థాయి వంట ప్రక్రియను అందుబాటులోకి తీసుకురానున్నారు. తితిదేలో వినియోగించే భారీ బాయిలర్లు, స్టీమ్ కెటిల్స్ తరహా సాంకేతికతను ఇక్కడ కూడా వినియోగించనున్నారు.
ఆహారం తయారీ, ప్యాకింగ్ ప్రక్రియలో మానవ స్పర్శను గణనీయంగా తగ్గిస్తూ, ఎఫ్ఎస్ఎస్ఏఐ, అంతర్జాతీయ జీఎంపీ హైజీన్ ప్రమాణాలకు అనుగుణంగా వంటశాలను నిర్వహించనున్నారు. ఆహారం చల్లారకుండా ఉండేందుకు స్టెయిన్లెస్ స్టీల్ ఇన్సులేటెడ్ పాత్రలను వినియోగించనున్నారు.
సిబ్బందికి ప్రత్యేక శిక్షణ
అక్షయపాత్ర ఫౌండేషన్ ఆధ్వర్యంలో సాంకేతికత, శాస్త్రీయ విధానాలను అనుసరించి కిచెన్ను ఏర్పాటు చేయడంతోపాటు దుర్గగుడి సిబ్బందికి కూడా ప్రత్యేక శిక్షణ ఇవ్వనున్నారు. ఆధునిక వంట విధానాలు, పరిశుభ్రత, ఆహార నాణ్యత, యంత్రాల నిర్వహణ వంటి అంశాల్లో సిబ్బందికి శిక్షణ అందించనున్నారు.
దీంతో ఇంద్రకీలాద్రిపై భక్తులకు శుభ్రమైన వాతావరణంలో, నాణ్యమైన అన్నప్రసాదాన్ని పెద్ద సంఖ్యలో భక్తులకు నిరంతరాయంగా అందించే వ్యవస్థ అందుబాటులోకి రానుంది.
