వర్షాల కారణంగా కేరళలోని మలప్పురంలో రోడ్లు అధ్వాన్నంగా మారాయి. స్థానిక నేతలు పట్టించుకోకపోవడంతో హమ్జా పోరాలి అనే వ్యక్తి ఈ వినూత్న నిరసనకు దిగాడు. ఒంటిపై టవల్‌తో బకెట్‌, సబ్బు పట్టుకొని వెళ్లి.. రోడ్డుపై ఉన్నఓ భారీ నీటి గుంతలో స్నానం చేశాడు. గుబురు గెడ్డం, జుట్టుతో కనిపిస్తున్న అతడు.. ఆ నీటిలోనే పద్మాసనం, సూర్య నమస్కారాలు చేయడం గమనార్హం. ఈ వినూత్న నిరసనకు ప్రభుత్వం దిగొచ్చింది. స్థానిక ఎమ్మెల్యే యూఏ లతీఫ్‌ నేరుగా నిరసన చేస్తున్న హమ్జా వద్దకు వెళ్లి.. త్వరలోనే మరమ్మతులు చేపడతామని హామీ ఇవ్వడంతో ఆయన నిరసన విరమించుకున్నట్లు తెలుస్తోంది.

ఈ గుంతల వల్ల రోడ్డు ప్రమాదాలు జరుగుతున్నాయని, చాలామంది చనిపోతున్నారని సదరు యువకుడు వివరించాడు. దీనికి సంబంధించిన వీడియో సోషల్ మీడియాలో వైరల్ అవుతోంది.

రోడ్లపై గుంతల కారణంగా కేరళ ఎర్నాకుళంలోని నెడుంబసెరీ హైవేపై జరిగిన ప్రమాదంలో కొద్దిరోజుల క్రితమే ఓ వ్యక్తి ప్రాణాలు కోల్పోయాడు. 52ఏళ్ల ఆ వ్యక్తి ద్విచక్రవాహనంపై వెళ్తూ గుంత కారణంగా రోడ్డుపై అదుపుతప్పి పడిపోగా.. అతడిపై నుంచి ఓ ట్రక్కు దూసుకెళ్లింది. ఈ ప్రమాదంలో ఆయన అక్కడికక్కడే మృతిచెందాడు. ఈ ప్రమాదానికి సంబంధించిన వీడియోలు నెట్టింట వైరల్ ‌గా మారాయి.

The post కేరళ రోడ్లపై నీటి గుంతలు… స్నానం చేస్తూ వ్యక్తి వినూత్న నిరసన appeared first on Vishwa Samvad Kendra Andhra Pradesh.