NELLORE AYURVEDIC MEDICINE FOR CORONA – Vishwa Samvad Kendra Andhra Pradesh

ఆనందయ్య మందుకు హైకోర్టు పచ్చజెండా

Syam Korsipati — Mon, 31 May 2021 15:13:46 +0000

నెల్లూరు జిల్లా కృష్ణపట్నానికి చెందిన ఆనందయ్య ఆయుర్వేద మందుకు హైకోర్టు కూడా పచ్చజెండా ఊపింది. ఆనందయ్య సహా మరో ఇద్దరు వేసిన పిటిషన్లపై విచారణ చేపట్టిన ఉన్నత న్యాయస్థానం ఈ మేరకు ఆదేశాలు జారీ చేసింది. కంటిలో వేసే డ్రాప్స్‌పై గురువారంలోపు నివేదిక సమర్పించాలని ఏపీ ప్రభుత్వాన్ని హైకోర్టు ఆదేశించింది.

ఆనందయ్య మందుపై ఈరోజు ఉదయం, మధ్యాహ్నం హైకోర్టులో విచారణ కొనసాగింది. ఔషధంపై రాష్ట్ర ప్రభుత్వ నిర్ణయం తెలపాలని ప్రభుత్వం తరఫు న్యాయవాదిని కోర్టు కోరింది. ఈ విషయంపై ఇవాళ ప్రభుత్వం సమీక్ష జరుపుతుందని న్యాయవాది వివరించారు. చట్టప్రకారం ఆనందయ్య మందు పంపిణీకి ప్రభుత్వం అనుమతి అవసరం లేదని ఆనందయ్య తరఫు న్యాయవాది కోర్టులో వాదించారు. వాదనలు విన్న ధర్మాసనం విచారణను మధ్యాహ్నం 3 గంటలకు వాయిదా వేసింది. మధ్యాహ్నం 3 గంటల తర్వాత మరో దఫా విచారణ చేపట్టిన హైకోర్టు.. ఆనందయ్య మందు పంపిణీకి గ్రీన్‌ సిగ్నల్‌ ఇచ్చింది. అనంతరం తదుపరి విచారణను గురువారానికి వాయిదా వేసింది.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post ఆనందయ్య మందుకు హైకోర్టు పచ్చజెండా appeared first on Vishwa Samvad Kendra Andhra Pradesh.

ఆనందయ్య మందుపై అభ్యంతరమెందుకు?: చినజీయర్‌స్వామి

Syam Korsipati — Sun, 30 May 2021 15:48:15 +0000

“నెల్లూరు జిల్లా కృష్ణపట్నానికి చెందిన ఆనందయ్య మందు వల్ల ఎటువంటి దుష్ప్రభావాలు లేవంటున్నారు.. దీంతో పాటు ఔషధాన్ని ఉచితంగా ఇస్తున్నప్పుడు అభ్యంతరం ఎందుకు?” అని చినజీయర్ స్వామి ప్రశ్నించారు. “ఓ మందు ప్రాణాలు నిలబెడుతుంటే వివాదం ఎందుకు?” అని ఆయన అన్నారు. “సంక్షోభం వేళ వివాదాలకు తావివ్వకూడదు” అని ఆయన పేర్కొన్నారు. ఎర్రగడ్డలోని ఈఎస్ ఐ ఆస్పత్రిని స్వామిజీ సందర్శించారు. ఈ సందర్భంగా ఆయన వైద్య సిబ్బందితో మాట్లాడారు.

ఒక వ్యక్తి చనిపోతుంటే ఆనందయ్య మందు ప్రాణం నిలబెడుతున్నప్పుడు ఎందుకు వివాదం అవుతోందని చినజీయర్‌స్వామీజీ అన్నారు. అలోపతి వైద్యాన్ని వ్యవస్థ అంగీకరించిందని.. కానీ మంచిని ఎక్కడి నుంచైనా తీసుకోవచ్చని ఆయన వివరించారు.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post ఆనందయ్య మందుపై అభ్యంతరమెందుకు?: చినజీయర్‌స్వామి appeared first on Vishwa Samvad Kendra Andhra Pradesh.

డాక్టర్ ఆనందయ్య

Syam Korsipati — Thu, 27 May 2021 17:31:28 +0000

కరోనా కష్ట కాలంలో కృష్ణపట్నం ఉదంతం భారతీయ వైద్య విధానాల విశిష్టతను చాటి చెప్పిందనే చెప్పవచ్చు.సంప్రదాయ వైద్య విలువల్ని ప్రపంచ వ్యాప్తంగా గుర్తించేలా చేసింది కూడా. అల్లోపతిక్ మెడిసిన్ అస్థిత్వాన్ని ప్రశ్నించే విధంగా Dr.ఆనందయ్య రూపంలో దేవుడు మనల్ని మేలుకొల్పాడు.

ఈ సందర్భంగా దయ చేసి దేశీ వైద్యుల్ని ‘నాటు వైద్యులుగా’ గా సంబోధించకండి. మల్టీ నేషనల్ కార్పొరేట్లు తమ స్వప్రయోజనాల కు ప్రచారంలోకి తెచ్చిన ఈ పద ప్రయోగాన్ని భారతీయడన్నవాడు ఎవడైనా ఉచ్ఛరించే సందర్భం రాకూడదు. ఇంతవరకు చేసిన తప్పును సరి దిద్దుకోండి. దేశీ వైద్యుల ప్రతిభను గుర్తించి, వారి నిపుణతకు పట్టం కట్టండి.

వంశ పారంపర్యంగా వస్తున్న వృత్తి విద్యను కొనసాగిస్తూ, ఏ లాభాపేక్ష లేకుండా సమాజ సేవలో తరిస్తున్న దేశీ వైద్యుడు అనందయ్యను డాక్టర్ గా సంభోదించటానికి నోరు రాని ఈ సభ్య సమాజం ఆతన్ని ఒక దోషిగా నిలబెట్టటానికి ప్రయత్నించింది. అందుకు మనందరం సిగ్గు పడాలి. మరీ ముఖ్యంగా పైత్యం ప్రకోపించిన మీడియా కథనాలు నేటివ్ వైద్య విద్యను, సంప్రదాయాలను కించ పరిచే విధంగా ఉన్నాయి. దైవ దత్తం గా కొలిచే మన ‘పంచమ వేదాన్ని’ అపహాస్యం చేసే మిడి మిడి జ్ఞానులకు పుట్టగతులు ఉండవు.

సంప్రదాయ వైద్యము,జానపద వైద్యము,ప్రకృతి వైద్యము వృత్తిగా గిరిజన,హరిజన వైద్యులు తర తరాలుగా అందిస్తున్న సేవలు మనకు సంక్రమించిన దేశీయ సంపద. సామాజిక ఉమ్మడి ఆస్తి. జాతీయ వారసత్వం కూడా. దేశ ప్రజానీకాన్ని అంతు చిక్కని రోగాలు, రొష్టుల బారిన పడకుండా కాపాడిన ఆదిమ జాతి తెగలు వీరు. గురు శిష్య పరంపరను కొనసాగిస్తూ వారి వారి వృత్తి ధర్మాన్ని త్రికరణ శుద్ధిగా ఆరాధించే ఈ వైద్య విద్వాన్లు మన జాతిరత్నాలు. వీరందరూ బడుగు వర్గాల వారు. భేషజం లేని అయ్యవార్లు. ఆకులు,అలములు, దేశీయ ద్రవ్యాల కలయిక ఏ మోతాదులో ఏయే వ్యాధులకు ఇవ్వాలో ఆచరణలో చూపిన వైద్య నిపుణులు వీరు. ప్రపంచ ఆరోగ్య సంస్థల ఆమోదానికి నోచుకోని ఈ వైద్య శిఖామణుల్ని దేశీ సంస్థలు గుర్తించాల్సిన అవసరాన్ని Dr. ఆనందయ్య లాంటి వారు గుర్తుచేశారు ఈ సంఘటన ద్వారా.

అలాగే సాంప్రదాయ వైద్యులకు ‘ఆయూష్’ సంస్థలే తగిన శక్తి కేంద్రాలు. ఐసీఎంఆర్ కాదు. ఆంగ్లేయ పరిశోధనా సంస్థలు అసలే కాదు. ఆయుర్వేద, యునాని, సిద్ధ, హోమియో, ప్రకృతి వైద్యం ఇత్యాది జ్ఞానాన్ని సమన్వయ పరిచి చైనా దేశంలో లాగా ఆంగ్లేయ వైద్య విధానాల డొల్లతనాన్ని బహిర్గతం చేయాల్సిన అవసరం ఈ నేపథ్యంలో గుర్తించి ఆచరణలో చూపాలి. తగు రీతిగా ఆయుష్ ప్రమాణాలను మెరుగు పరచే విధంగా ప్రభుత్వాలు తక్షణ చర్యలు చేపట్టాలి.పేటెంట్ రైట్స్ పేరుతో దేశీ అధ్యయనాన్ని విదేశీ సంస్థల గుత్తాధిపత్యానికి లోను కాకుండా చూడాలి. ఇప్పటికే భారతావని మోసపోయింది.

గుడ్డిలో మెల్లగా ఈ మధ్యనే కేంద్ర ప్రభుత్వ ఆయుష్ పరిశోధనా సంస్థలు దేశీయ ఔషధాలను ఎలా ఇవ్వాలో దేశీయ వైద్యులకు నిర్దేశాలు జారీ చేయటం హర్షణీయం. తిప్ప తీగ బిళ్ళలు, అశ్వగంధ గోళీలు, ఆయుష్ 64, శొంఠి, వాము, కర్పూరము, పిప్పిలి వంటి ద్రవ్యాలను ఆయుష్ సంస్థలు ప్రోత్స హిస్తున్నై. ఈ దిశగా నేటివ్ వైద్యులు శ్రమించి కనుగొన్న ఔషధాలకు రాష్ట్ర, కేంద్ర ప్రభుత్వాల ఆధీనంలో పనిచేస్తున్న ఆయుష్ సంస్థలు ఆమోద ముద్ర వేసి సర్టిఫైడ్ మందులుగా మార్కెట్లోకి తెస్తే, దేశీయ వైద్య విధానానికి చట్ట బద్ధత కల్పించిన వారమవుతాము.

ఎన్నో క్లిష్టమైన క్యాన్సర్ కేసుల్ని ఆయుర్వేదం బతికించింది. అలాగే ప్రాణ వాయువులు అందని అమరనాథ్ యాత్రికుల్ని కాలినడకన నడిపించిన సంఘటన 2015 లో దేశీ మందుల విలువను ఇనుముడింప జేసింది. శ్రీశ్రీశ్రీ రమణ మహర్షి తన జీవిత కాలం మొత్తం దేశీ వైద్య విధానమే ఊపిరిగా జీవించారు. అప్పటి మన ప్రియతమ ప్రధాని అటల్ జీ కేరళ కొట్టైకల్ ఆయుర్వేద చికిత్సతో ఊరట పొందటం మనందరికీ తెలిసిందే. నేటి సాధు సoతులు దేశీ మందులను జన బాహుళ్యానికి అందుబాటులోకి తెస్తున్నారు. సంతోషం.

ఈ నేపథ్యంలో ఆయుష్ వైద్యులు Dr. అనందయ్య ను ఆదర్శంగా తీసుకుని innovative టెక్నిక్స్ తో స్వదేశీ వైద్యానికి పూర్వ వైభవం ఆచరణలో చూపాల్సిన సమయమిది. దోపిడీ వ్యవస్థకు అనుకూలమైన అంతర్జాతీయ ఆరోగ్య సంస్థలకు వత్తాసు పలుకుతున్న మాఫియాను కూకటి వేళ్లతో పెకిలించి, మన సమాజాన్ని ఆనందంగా, ఆరోగ్యంగా తీర్చిదిద్దాల్సిన బాధ్యత మనందరి మీదా ఉంది. ప్రభుత్వాలు అందుకు సంపూర్ణ మద్దతును వెంటనే ప్రకటించాలి. ప్రజల మనో నిగ్రహాన్ని పరీక్షించడం మంచిది కాదు.

– Dr. శ్రీనివాసులు దాసరి, IAS

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post డాక్టర్ ఆనందయ్య appeared first on Vishwa Samvad Kendra Andhra Pradesh.

ఆనందయ్య మందు విషయమై ఉప రాష్ట్రపతి, సీఎంల ఆదేశాలు

Syam Korsipati — Fri, 21 May 2021 16:08:58 +0000

నెల్లూరు జిల్లా కృష్ణపట్నంలో ఆనందయ్య కరోనా నివారణ కోసం ఇస్తున్న ఆయుర్వేద మందు ఏకంగా భారత ఉప రాష్ట్రపతి దాకా వెళ్ళింది. ఆనందయ్య ఆయుర్వేద వైద్యంపై ఉపరాష్ట్రపతి వెంకయ్యనాయుడు స్పందించారు. నెల్లూరు ఆయుర్వేద మందుపై అధ్యయనం ప్రారంభించాలని.. ఈ మేరకు కేంద్ర ఆయుష్ ఇన్చార్జి మంత్రి కిరణ్ రిజిజు, ఐసీఎంఆర్ డైరెక్టర్ జనరల్ ప్రొఫెసర్ బలరామ్ భార్గవ్ కు సూచనలు చేశారు. కిరణ్ రిజిజు, బలరామ్ భార్గవ్ లకు ఫోన్ చేసిన వెంకయ్యనాయుడు నెల్లూరు ఆయుర్వేద ఔషధంపై వారితో చర్చించారు. వెంటనే అధ్యయనం ప్రారంభించాలని, సాధ్యమైనంత త్వరగా నివేదిక వచ్చేలా చొరవ చూపాలని వారికి తెలిపారు.

సీఎం ఆదేశాలు…..

ఆయుర్వేద మందుపై గందరగోళం తలెత్తడంతో కేంద్ర ప్రభుత్వ విభాగాల అధికారులతో పరీక్షలు చేయించాలని వైద్యఆరోగ్యశాఖ ఉన్నతాధికారులను సీఎం ఆదేశించారు. నెల్లూరు జిల్లా కృష్ణపట్నానికి ఐసీఎంఆర్‌ బృందాన్ని పంపాలని.. ఆయుర్వేద వైద్యంపై శాస్త్రీయ నిర్ధారణ చేయించాలని ఆయన స్పష్టం చేశారు.

ఐసీఎంఆర్‌ బృందం పర్యటన……

ఉపరాష్ట్రపతి, సీఎం ల సూచనలతో కరోనాకు నెల్లూరు జిల్లా ముత్తుకూరు మండలం కృష్ణపట్నంలో ఆనందయ్య ఇస్తున్న ఆయుర్వేద మందుపై శాస్త్రీయతను నిర్ధారించేందుకు భారత వైద్య పరిశోధనా మండలి(ఐసీఎంఆర్‌) బృందం అక్కడికి చేరుకుంది. ఆయుర్వేద మందుపై అధ్యయనం చేసి శాస్త్రీయతను పరీక్షించనుంది.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post ఆనందయ్య మందు విషయమై ఉప రాష్ట్రపతి, సీఎంల ఆదేశాలు appeared first on Vishwa Samvad Kendra Andhra Pradesh.

నెల్లూరు ఆయుర్వేద వైద్యం – వేలాదిగా తరలివస్తున్న జనం

Syam Korsipati — Fri, 21 May 2021 06:35:39 +0000

కరోనాకు నెల్లూరు జిల్లా ముత్తుకూరు మండలం కృష్ణపట్నంలో ఆనందయ్య ఇస్తున్న ఆయుర్వేద మందుకు డిమాండ్‌ పెరుగుతోంది. నేటి నుంచి ఈ మందు పంపిణీ చేస్తారంటూ ఎమ్మెల్యే కాకాణి గోవర్ధన్‌ చేసిన ప్రకటనతో నెల్లూరు పరిసర ప్రాంతాల్లోని వేలాది మంది వాహనాల్లో కృష్ణపట్నం తరలి వస్తున్నారు. పెద్ద సంఖ్యలో ప్రజలు రావడంతో క్యూలైన్లలో స్వల్ప తోపులాట చోటు చేసుకుంది. మరోవైపు ఇంత వరకు ఆనందయ్య మందు పంపిణీకి అధికారులు అనుమతి ఇవ్వకపోవడంతో అక్కడికి వచ్చిన వారంతా ఎదురు చూస్తున్నారు.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post నెల్లూరు ఆయుర్వేద వైద్యం – వేలాదిగా తరలివస్తున్న జనం appeared first on Vishwa Samvad Kendra Andhra Pradesh.

నెల్లూరు ఆయుర్వేద వైద్యానికి మేం పూర్తిగా సహకరిస్తాం – ఆర్ ఎస్ ఎస్

Syam Korsipati — Wed, 19 May 2021 16:10:21 +0000

కరోనా నివారణ మరియు నిర్మూలనకు నెల్లూరు జిల్లా ముత్తుకూరు మండలం కృష్ణపట్నం గ్రామంలోని ఆయుర్వేద వైద్యులు శ్రీ ఆనందయ్య తయారుచేసి ప్రజలకు ఉచితంగా పంచుతున్న ఆయుర్వేద మందు తయారీకి కావలసిన అనుమతులు సంపాదించడంలోనూ, మందు తయారీలోనూ, పంపిణీలోనూ రాష్ట్రీయ స్వయంసేవక్ సంఘ్ సహకారం పూర్తిగా ఉంటుందని ఆర్ ఎస్ ఎస్ ఆంధ్రప్రదేశ్ ప్రాంత ప్రచార ప్రముఖ్ శ్రీ బయ్యా వాసు ప్రకటించారు.

ఈరోజు ఉదయం శ్రీ బయ్యా వాసు తో పాటు ఆర్ ఎస్ ఎస్ నెల్లూరు జిల్లా సంఘటనా కార్యదర్శి శ్రీ నవీన్, జిల్లా కార్యవాహ శ్రీ సుభాష్, జిల్లా సహ కార్యవాహ శ్రీ మల్లికార్జున రెడ్డి, ముత్తుకూరు ఖండ కార్యవాహ శ్రీ ప్రతాప్ రెడ్డి తదితరులు ఆయుర్వేద వైద్యులు శ్రీ ఆనందయ్య గారిని సందర్శించి ఆయన మందు తయారు చేస్తున్న విధానాన్ని, దాని పనితీరును, సాధించిన ఫలితాలను విచారించి తెలుసుకున్నారు.

ఈ సందర్భంగా శ్రీ బయ్యా వాసు మీడియాతో మాట్లాడుతూ ఏదైనా ఒక విషయం శాస్త్రీయంగా నిరూపితం కాకపోయినంత మాత్రాన అందులో శాస్త్రీయత లేనట్లా? అని ప్రశ్నించారు.

న్యూటన్ భూమ్యాకర్షణ సిద్ధాంతాన్ని తెలుపక ముందు భూమ్యాకర్షణ లేదా? ప్రతి చర్యకూ సమానమైన ప్రతిచర్య ఉంటుందన్న బోర్ సిద్ధాంతం వెలువడక ముందు సృష్టిలో చర్యకు ప్రతిచర్య లేదా? అని ఆయన ప్రశ్నించారు.

https://vskandhra.org/wp-content/uploads/2021/05/RSS.mp4

ఈ మందు స్వీకరించిన వారికి ఎందరికో జబ్బు నయమయిన దృష్టాంతాలు ఎన్నో కనిపిస్తూ ఉన్నా, ఎలాంటి దుష్పరిణామాలూ లేవని తెలుస్తూ ఉన్నా అనుమతులు లేవన్న సాకుతో ప్రభుత్వం ఆ మందు పంపిణీని అడ్డుకోవడం సమంజసం కాదని ఆయన అభిప్రాయపడ్డారు.

శ్రీరామనవమి నుండి సుమారుగా 20,000 మంది కరోనా పాజిటివ్ వచ్చిన వారికి కనీసం మాస్క్ కూడా లేకుండా శ్రీ ఆనందయ్య గారు వైద్యం చేశారని, తను గాని తన కుటుంబ సభ్యులు గాని కరోనా బారిన పడలేదని, ఆనండయ్య గారి ఆయుర్వేద మందు అద్భుతంగా పనిచేస్తున్నదన్న విషయానికి ఇంతకంటే నిదర్శనమింకేమి కావాలని ఆయన ప్రశ్నించారు.

ఇప్పటికైనా అధికారులు కళ్ళు తెరిచి కరోనా రోగులకు ఎంతో ప్రయోజనం కలిగించే సదరు ఆయుర్వేద ఔషధ పంపిణీకి మార్గం సుగమం చేయాలని ఆయన సూచించారు.

ఆయుర్వేదం, అలోపతి, హోమియో ఇలా ఈ వైద్య విధానంలోనైనా ఇప్పటివరకూ కరోనాకు ట్రయల్ అండ్ ఎర్రర్ పద్ధతిలోనే వైద్యం చేస్తూ ఉన్నారని, ఏ పద్ధతి కూడా పూర్తి ప్రామాణికమైనది కాదని ఆయన పేర్కొన్నారు.

https://vskandhra.org/wp-content/uploads/2021/05/RSS1.mp4

డబ్ల్యూహెచ్ఓ అనుమతి పొందిన ప్లాస్మా వైద్య విధానం వల్ల ఎలాంటి ప్రయోజనమూ లేదని తేలింది కదా? డబ్ల్యూహెచ్ఓ అనుమతి పొందిన రెమిడిసివర్ ఇంజక్షన్ వల్ల ఎలాంటి ప్రయోజనమూ లేదని తేలింది కదా? అని ఆయన ప్రశ్నించారు.

అలోపతిలో అసలు దుష్ఫలితాలు లేని మందులే లేవని ఆయన పేర్కొన్నారు. కరోనా వ్యాధి చికిత్సలో వాడుతున్న స్టెరాయిడ్స్ వల్ల రోగుల యొక్క షుగర్ లెవెల్స్ అధికాధికమవుతున్న సంగతిని ఆయన గుర్తు చేస్తూ…. అత్యంత ప్రాణాపాయ స్థితిలో అంబులెన్స్ లో వచ్చిన రోగులు కూడా కోలుకునేలా చేస్తున్న ఎలాంటి సైడ్ ఎఫెక్ట్స్ లేని ఈ ఆయుర్వేద మందును అడ్డుకోవడం ఎందుకని ఆయన ప్రశ్నించారు.

కనుక ఆర్ఎస్ఎస్ వైపునుంచి అన్ని విధాలుగా తాము సహకరిస్తామని, వేగంగా అనుమతులు పొందడానికి ప్రయత్నిస్తామని ఆయన తెలిపారు. జిల్లా కలెక్టర్ గారు కూడా వెంటనే స్పందించి ఆయుర్వేద మందు పంపిణీకి అవసరమైన అనుమతులు ఇప్పించాలని, అడ్డంకులు తొలగించాలని కోరారు.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post నెల్లూరు ఆయుర్వేద వైద్యానికి మేం పూర్తిగా సహకరిస్తాం – ఆర్ ఎస్ ఎస్ appeared first on Vishwa Samvad Kendra Andhra Pradesh.