ఆదిలాబాద్‌: ఆదిలాబాద్ జిల్లా, నార్నూర్‌లో రెండు రోజుల‌ కింద‌ట నూనె మొక్కు ఉత్స‌వం ఘ‌నంగా ప్రారంభ‌మైంది. ప్రతి ఏటా పుష్య మాసంలో నార్నూర్‌లో ఈ ఉత్స‌వం జ‌రుగుతుంది. ఉత్స‌వాన్ని పుర‌స్క‌రించుకుని జ‌రిగే ఖాందేవ్ జాతరలో తొడసం వంశీయుల ఆడపడుచులు నూనె మొక్కు చెల్లించుకోవడం ఆనవాయితీ. జాతరలో భాగంగా ఖాందేవ్ ఆలయంలో ఓ ఆదివాసీ మహిళ మంగళవారం నూనె మొక్కు చెల్లించుకుంది. తొడసం వంశీయుల సమక్షంలో మట్టిపాత్రలో 2.5 కిలోల నువ్వుల నూనెను ఒకేసారి తాగేసింది.

ఈ జాతరకు ఆదివాసీలు పెద్దసంఖ్యలో తరలివచ్చారు. ఆలయంలో మహాపూజ చేశారు. తర్వాత తొడసం వంశీయుల ఆడపడచు యోత్మభాయి నూనె మొక్కు చెల్లించుకుంది. తొడసం వంశీంలోని ప్రతిఇంటి నుంచి తీసుకొచ్చిన నువ్వుల నూనెను మట్టిపాత్రలో సేకరిస్తారు. ఆ నూనెను ఆ వంశానికి చెందిన ఆడపడచు తాగడం ఇక్కడి ఆచారం.

ఇలా నూనె సేవిస్తే ఖాందేవ్ దేవుడు తమ కుటుంబాలను, పాడిపంటలను చల్లగా చూస్తాడని వారి విశ్వాసం. ఒకసారి నూనె మొక్కును చెల్లించే ఆదివాసి మహిళ వరుసగా మూడేళ్లు ఈ మొక్కును చెల్లించాలి. ఈ జాతరకు తెలంగాణ నుంచి మాత్రమే కాక మహారాష్ట్ర, ఛత్తీస్‌గఢ్, జార్ఖండ్, ఆంధ్రప్రదేశ్ రాష్ట్రాల నుంచి పెద్ద సంఖ్యలో ఆదివాసీలు తరలిస్తారు. రెండు రోజుల క్రితం ప్రారంభమైన ఈ జాతర ఈనెల 30 వరకు జరుగుతుంది.

Source: SiteTelugu

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి. 

The post నార్నూర్‌లో ‘నూనె మొక్కు’ ఉత్స‌వం appeared first on Vishwa Samvad Kendra Andhra Pradesh.