‘కేరే’ (సరస్సు) సహజంగానే అతని పేరుకు ముందే ఉండేది. ఈ మధ్యకాలంలో వివిధ అవార్డుల ద్వారా తనకు వచ్చిన ధనాన్ని కూడా వ్యక్తిగత వినియోగానికి ఖర్చు పెట్టడానికి బదులు, కార్మికులకు మరియు ఆధునిక పరికరాలను తీసుకోవడానికి ఉపయోగించి మరెన్నో సరస్సులను తవ్వించాడు. ఇలా వచ్చిన ధనంతో పర్యాటకులను కొండకు తీసుకెళ్లడానికి ఒక చిన్న రహదారిని కూడా నిర్మించాడు. అతని పిల్లలు ఇప్పటికీ ఎటువంటి సౌకర్యాలు లేకుండా చిన్న హట్టిలలో(గుడిసెలు) ఉంటారు, మరియు వారి జీవనోపాధి కోసం గొర్రెలను మేపుతారు. పూరి గుడిసెల్లో ఉంటూ కూడా కొండకు రక్షణగా నిలబడ్డారు ఎందుకంటే కామె గౌడకు కొండలన్నా పర్యావరణమన్నా అమితమైన ఇష్టం.

కామెగౌడ మొదట ఈ కొండపై 40 సంవత్సరాల క్రితం చెరువులను తవ్వడం ప్రారంభించాడు. అతను సహజంగా గొర్రెల కాపరి కావడం వలన గొర్రెలను మేకలను కొండపైకి తీసుకెళ్లేవాడు గొర్రెలకు మేకలకు నీళ్ల కోసం చూస్తే ఎక్కడా నీటి గుంటలు కనిపించలేదు ఆ విధంగా మేకలకు గొర్రెలకు ఏదో రకంగా నీళ్లు అందించి దాహం తీర్చాలని నిర్ణయించుకున్నాడు. ఇక అప్పటినుండి గొర్రెలను మేపుతున్న సమయంలో తన దగ్గర ఉండే కర్రతో నీటి జాడలు ఉన్న ప్రదేశంలో తవ్వడం ప్రారంభించారు అలా తవ్వి తవ్వి అలసిపోయాడు. ఎన్నో రోజులకు ఒక గుంటలో నీరు రావడం జరిగింది. అలా వచ్చిన నీటితో మేకలకు గొర్రెలకు మొదట దాహం తీర్చాడు. ఆ గుంటలో నీరు రాగానే తనకు అనిపించింది ఇక్కడ నీటి జాడలు ఉన్నాయి కాబట్టి కొంచెం పెద్ద చెరువులు తవ్వుతూ ఒకదానికి ఒకటి అనుసంధానం చేయాలని నిర్ణయించుకున్నాడు కానీ తన దగ్గరున్న కర్రతో తవ్వడం వలన ఎక్కువ సమయం పడుతుంది కాబట్టి అతను తవ్వే పరికరాన్ని మార్చాలని అనుకున్నాడు వెంటనే తన గొర్రెల్లోని రెండు గొర్రెలు అమ్మి ఇనుప వస్తువులు తీసుకొచ్చాడు. వాటితో మరలా గుంతను పెద్దగా చేశాడు.

అలా ఒక చెరువు తవ్విన కామెగౌడ మనసులో కొండపైన ఉన్నటువంటి జంతువులు, జీవరాశులు గుర్తుకు వచ్చాయి ఇలా అనేక చెరువులు తవ్వడం వల్ల జంతువులు అన్నిటికీ దాహం తీర్చాలని ఆలోచన వచ్చింది వెంటనే తవ్విన చెరువుకు అనుసంధానం చేస్తూ ఇంకో చెరువు తవ్వడం మొదలు పెట్టాడు. ఇలా 2017 వరకు ఒక చెరువుకి ఇంకొక చెరువుని అనుసంధానిస్తూ ఆరు చెరువులు తవ్వాడు. అదే సమయంలో సినిమా హీరో కిచ్చా సుదీప్ అతనికి ఆర్థిక సహాయం చేశాడు. ఆ ఆర్థిక సహాయం మొత్తాన్ని కూడా కామెగౌడ మరో ఆరు చెరువులు తవ్వడానికి వినియోగించాడు. చూడండి ఒక పేదవాడు, గొర్రెల కాపరి అయివుండి కూడా తనకున్న డబ్బును, తనకు ఇతరులు సహాయంగా అందించిన డబ్బునంతా కొండ మీద ఉన్న జంతువుల కోసం, పక్షుల కోసం అలాగే కొండ సంరక్షణ కోసం గుంతలు తవ్వి చెరువులు నిర్మించి ఒక దానికొకటి అనుసంధానిస్తూ 16 చెరువులు తవ్వాడు. కొండపైకి వెళ్లడానికి ఒంటరిగా రహదారిని కూడా నిర్మించాడు. 2018 కాలంలో అక్కడే రెండు వేల పైబడి మర్రి చెట్లను నాటాడు.

కామె గౌడ చదువుకోనప్పటికీ భారత పురాణాలు, ఇతిహాసాలపై లోతైన అధ్యయనం కలవాడు. అందుకే అనుకుంటా మొదట తవ్విన చెరువుకు గోకర్ణ అని, అనుసంధానం చేసిన చెరువులకు రామ లక్ష్మణ్ పేర్లు కూడా పెట్టాడు. 84 సంవత్సరాల వయస్సులో కూడా, కెరె కామెగౌడ ఆరోగ్యంగా ఉన్నాడు. కొండపైకి మరియు క్రిందికి సులభంగా ఎక్కి దిగుతాడు.  ఆయన పయనం రోజూ ఉదయం 8 గంటలకు ప్రారంభమవుతుంది. కొండపై గత నలభై సంవత్సరాలుగా కనీసం 12 గంటలపైన గడుపుతున్నాడు.  రాత్రి మాత్రమే పడుకునే సమయంలో గుడిసె కు వస్తాడు. తన కుమారుడు శ్రీకృష్ణుడు పదవ తరగతి తర్వాత తండ్రి బాటలోనే నడుస్తూ కొండను సంరక్షిస్తూ గొర్రెలను కాచుకుంటూ జీవనం సాగిస్తున్నాడు. మైసూరుకు చెందిన సామాజిక కార్యకర్త జయరామ్ పాటిల్ కామె గౌడ కంటి శుక్లాల ఆపరేషన్ కు సహాయం చేశారు.

కేరె కామెగౌడలో ప్రత్యేకత ఏమిటంటే, అతను తన సంపాదన మొత్తాన్ని చెట్లు, సరస్సులు మరియు కొండపై ఖర్చు చేశాడు.  “మానవులు డబ్బు కోసం మరింత అత్యాశాపరులుగా మారుతున్నప్పుడు, అతను మనకు నిజమైన మార్గాన్ని చూపుతున్నాడు” అంటారు ఆ ప్రాంత ప్రజలు. అలాగే ‘కెరే’ అంటే ‘సరస్సు’ అని ముద్దుగా ఈ ప్రాంత ప్రజలంతా పిలుచుకుంటారు కామె గౌడను.

చొక్కా, చడ్డీ మరియు శాలువతో ఉండే కెరెను ఎప్పుడైనా కొండ మీద చూడవచ్చు.  సాధారణంగా అతను ఇతరులు దానం చేసిన దుస్తులను ధరిస్తాడు. గడ్డంతో ఉంటాడు. అతను చేతి కర్రతో నడుస్తాడు. కంటిశుక్లం సమస్య తప్ప కేరే కామెగౌడ కు ఎటువంటి ఇబ్బందులు లేవు. ఆరోగ్యంగా మరియు చురుకుగా ఉన్నాడు. కేరె కామెగౌడకు భార్య, ఇద్దరు పిల్లలు ఉన్నారు. అతను తన పెద్ద కుమారుడు కృష్ణుడితో కలిసి ఉంటున్నాడు. కెరె కామెగౌడ తన మనవరాళ్ల సహాయంతో కొండ మీద రాతి స్తంభాలపై అటవీ, జీవావరణ శాస్త్రం, సరస్సు రక్షణకు సంబంధించిన సామెతలు వ్రాశారు.  అతను తన మనవడికి ఒక సరస్సు పేరు పెట్టాడు. ముద్దే (సంగటి ముద్ద), అంబలి మరియు రోటీలతో సహా వేలి మిల్లెట్ లతో తయారు చేసిన ఆహార పదార్థాలను కేరె కామెగౌడ ఇష్టపడతారు. ఇదండీ పెద్ద మనసున్న కామెగౌడ కథ. కామెగౌడ స్ఫూర్తితో పర్యావరణాన్ని రక్షించడమే మన బాధ్యత గా తీసుకుందాం. జై హింద్.

– రాజశేఖర్ నన్నపనేని

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post దొడ్డ మనసున్న కామెగౌడ appeared first on Vishwa Samvad Kendra Andhra Pradesh.