ELEPHANT DIED IN KERALA – Vishwa Samvad Kendra Andhra Pradesh

ఏనుగు మృతికి కారణమదే……

Syam Korsipati — Thu, 04 Jun 2020 17:02:33 +0000

దేశవ్యాప్తంగా ప్రజల కోపానికి కారణమైన కేరళలో మరణించిన గర్భిణీ ఏనుగు యొక్క ప్రాథమిక పోస్టుమార్టం నివేదికను తిరువిజమ్కును అటవీ కేంద్రం నేడు విడుదల చేసింది. ‘నీళ్ళలో మునిగిపోవడం వల్ల శ్వాసకోశం విఫలమై ఏనుగు మరణించిందని’ అదే ఏనుగు మరణానికి తక్షణ కారణం అని బుధవారం విడుదల చేసిన నివేదిక పేర్కొంది. నోటిలో పేలుడు వల్ల ఏర్పడిన గాయాలను కూడా పోస్టుమార్టం రిపోర్ట్ నిర్ధారించింది.

ఇదిలావుండగా, కేరళలో ఏనుగును చంపిన క్రూరమైన చర్యను కేంద్ర పర్యావరణ, అటవీ, వాతావరణ మార్పుల మంత్రి ప్రకాష్ జవదేకర్ తీవ్రంగా ఖండించారు. నిందితులపై కఠిన చర్యలు తీసుకుంటామని హామీ ఇచ్చారు. ఇలాంటి దారుణమైన చర్య భారతీయ సంస్కృతికి సంకేతం కాదని జవదేకర్ అన్నారు. “ఈ రకమైన హత్యలు పూర్తిగా ఆమోదయోగ్యం కాదు” అని ఆయన అన్నారు. నిందితులను పట్టుకుని అదుపులోకి తీసుకురావడానికి ఇప్పటికే ఈ ప్రాంతంలోని సీనియర్ అధికారులను మోహరించామని ఆయన చెప్పారు.

ఈ హత్యను కేంద్ర ప్రభుత్వం పరిగణనలోకి తీసుకుందని, ఈ ఘోరమైన నేరానికి పాల్పడినవారిని పట్టుకోవడానికి అన్ని చర్యలు తీసుకుంటామని అటవీ మంత్రి ట్విట్టర్‌లో హామీ ఇచ్చారు.

మలప్పురంలో దారుణంగా ఏనుగు హత్య

మలప్పురంలోని సైలెంట్ వ్యాలీ ఫారెస్ట్‌లో ఒక గర్భిణీ ఏనుగు చనిపోయింది. మలప్పురం గ్రామస్థులు క్రూరత్వానికి పాల్పడిన అనంతరం మే 27న ఏనుగు వెల్లయర్ నదిలో నీటిలో నిలబడి ఉండగా మరణించింది. అటవీ అధికారులు దవడలో గాయంతో ఆ ఏనుగు మరణించిందని వెల్లడించారు.

ఇదిలావుండగా, ఈ సంఘటనపై వైల్డ్ లైఫ్ ప్రొటెక్షన్ యాక్ట్ యొక్క సంబంధిత సెక్షన్ల కింద గుర్తు తెలియని వ్యక్తులపై ఎఫ్ఐఆర్ నమోదు చేసినట్లు మన్నార్కాడ్ అటవీ శాఖ అధికారి బుధవారం తెలిపారు.

Source : RepublicWorld

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post ఏనుగు మృతికి కారణమదే…… appeared first on Vishwa Samvad Kendra Andhra Pradesh.

అదే కేరళలో మరో ఏనుగు కూడా…….

Syam Korsipati — Thu, 04 Jun 2020 08:40:45 +0000

కేరళలో ఏనుగు మృతి ఘటనపై ఓ వైపు విచారం, మరోవైపు తీవ్ర ఆగ్రహం వ్యక్తమవుతుండగా.. అదే రాష్ట్రంలో మరో ఏనుగు మృతి తాజగా వెలుగులోకి వచ్చింది. అది కూడా ఏదో పేలుడు పదార్థం తినడం వల్లే మరణించి ఉండొచ్చని అటవీశాఖ అధికారులు భావిస్తున్నారు. కొల్లం జిల్లా పతానపురం అటవీ ప్రాంతంలో ఏప్రిల్‌లో బలహీనంగా ఉన్న ఓ ఆడ ఏనుగును కనుగొన్నామన్నారు. దానికి వైద్యం చేయాలని ప్రయత్నించినా అది సహకరించకుండా కొద్ది దూరం నడిచివెళ్లినట్లు తెలిపారు. మరుసటి రోజు ఓ చోట పడి మరణించిందని స్పష్టం చేశారు. పోస్టుమార్టం నివేదికలో ఏనుగు దవడ విరిగినట్లు తేలిందన్నారు. దీంతో.. ఆ ఏనుగు కూడా ఏదో పేలుడు పదార్థం తినడం వల్లే చనిపోయి ఉండొచ్చని అనుమానిస్తున్నారు. వైద్య పరీక్షల ఫలితాల కోసం ఎదురుచూస్తున్నామని అధికారులు చెప్పారు.

మరోవైపు సైలెంట్‌వ్యాలీలో ఓ గర్భంతో ఉన్న ఏనుగు నదిలో నిలబడి కన్నుమూసిన సంగతి తెలిసిందే. అంతకుముందు అది ఆకలిగా ఉండగా, చుట్టుపక్కల గ్రామాల్లో ఎవరో గుర్తు తెలియని వ్యక్తులు పైనాపిల్‌ పండు తినిపించారు. అందులో పేలుడు పదార్ధాలు ఉండడంతో ఆ ఏనుగు తీవ్రంగా గాయపడింది. ఆ నొప్పిని భరిస్తూనే అది సమీపంలోని ఓ నదిలోకి వెళ్లి ఉపశమనం పొందింది. ఈ క్రమంలోనే అది ఆకలితో అలమటించి నదిలోనే తుదిశ్వాస విడిచింది. ఓ అటవీ శాఖ అధికారి ఈ విషయాన్ని ఫేస్‌బుక్‌లో పోస్టు చేయడంతో విషయం వెలుగులోకి వచ్చింది. దీంతో ఈ ఘటనపై జంతుప్రేమికులతో పాటు పలువురు సెలబ్రిటీలు, ప్రజలు ఆగ్రహం వ్యక్తం చేశారు.

The post అదే కేరళలో మరో ఏనుగు కూడా……. appeared first on Vishwa Samvad Kendra Andhra Pradesh.

ఏనుగును నమ్మించి మోసం చేసిన మనుషులు

Syam Korsipati — Wed, 03 Jun 2020 06:03:56 +0000

మనిషికి మాత్రమే వచ్చిన విద్య నమ్మించి మోసం చేయడం.. అది సాటి మనిషినైనా.. నమ్మిన జంతువునైనా.. చాలా చోట్ల కుక్కల్ని పెంచుకొని అవి ముసలివికాగానే మారుమూల ప్రదేశాల్లో వాటిని కట్టేసి రావడం.. అవి యజమాని కోసం ఎదురుచూస్తూ ఆకలితో చావడం వంటివి తరచూ మనకు సోషల్‌ మీడియాలో కనిపిస్తూనే ఉంటాయి. కానీ, ఆకలితో ఉన్న ఓ జంతువుకు ఆహారం ఆశచూపి.. దాని ప్రాణాలు తీసే ప్రయత్నం చేశారు.. ఇంత జరిగినా ఎవరికీ అపకారం చేయకుండా.. మోసపోయాననే బాధతో విలవిల్లాడిపోతూ అక్కడి నుంచి నిష్క్రమించింది. కొన్నాళ్లపాటు బాధతో కుమిలిపోయి నిలుచున్నచోటే ప్రాణం కోల్పోయింది.. అది చేసిన తప్పు మనిషిని నమ్మడమే..!

మానవత్వానికే మచ్చతెచ్చే ఈ ఘటన గత నెలలో కేరళలో చోటు చేసుకొంది. గర్భంతో ఉన్న ఓ ఏనుగుతో మల్లప్పురం వద్ద ఓ గ్రామంలోని ప్రజలు అత్యంత క్రూరంగా ప్రవర్తించారు. నదిపాయల్లో ఆహారం వెతుక్కుంటూ ఓ ఆడ ఏనుగు గ్రామంలోకి వచ్చింది. అది ఎవరినీ ఏమీ చేయకుండా తన దారిన పోతుండగా.. కొందరు స్థానికులు దానికి ఒక పైనాపిల్‌ ఆశచూపారు. ఆ పైనాపిల్‌లో పేలుడు పదర్థాలు పెట్టారు. అది ఆ మనుషలను నమ్మి వారు ఇచ్చిన పండును తీసుకొని నోటపెట్టింది. అంతే.. ఆ పండు భారీ చప్పుడుతో పేలింది. ఆ మూగజీవి నోటివెంట రక్తం ధారగా కారింది. అంత బాధలో కూడా అది తనను మోసం చేసిన మనుషులపై దాడిచేయలేదు. రక్తమోడుతున్న నోటితో గ్రామం వదిలి వెళ్లిపోయింది. ఓ పక్క కడుపులో పెరుగుతున్న బిడ్డ ఉండటంతో ఆకలి.. మరోపక్క నరాలను మెలిపెట్టే బాధ.. దీనికి తోడు గాయంపై ఈగలు వాలుతుండటంతో.. ఏమి చేయాలో తెలియక ఆ మూగజీవం వెల్లియార్‌ నదిలోకి దిగి గొంతు తడుపుకొంది. ఆ నీటి ప్రవాహంతో గాయానికి కొంత ఉపశమనం లభించడం.. ఈగల బాధ తప్పడంతో అక్కడే ఉడిపోయంది.

విషయం తెలుసుకొన్న అటవీశాఖ సిబ్బంది.. సురేందర్‌, నీలకంఠన్‌ అనే మరో రెండు ఏనుగులను తీసుకొచ్చి దానిని బయటకు రప్పించేందుకు ప్రయత్నించారు. కానీ, గాయం బాధను తట్టుకోలేకపోతున్న ఆ ఏనుగు అక్కడే ఉండిపోయింది. చివరికి మే 27వ తేదీ సాయంత్రం 4గంటలకు తుదిశ్వాస విడిచింది. కేవలం మనుషులను నమ్మినందుకు అది తన కడపులో బిడ్డతో సహా లోకాన్ని వదిలి వెళ్లిపోయింది. హృదయ విదారకమైన ఈ ఘటనను మల్లప్పురం అటవీశాఖ అధికారి మోహన్‌ కృష్ణన్‌ తన సోషల్‌ మీడియా ఖాతాలో వెల్లడించారు. చనిపోయిన ఏనుగును బయటకు తీసుకొచ్చి దానిని పరీక్షించగా అది గర్భంతో ఉందని తెలిసి వైద్యులు బాధపడ్డారు. చివరికి అటవీశాఖ సిబ్బంది దానికి అంత్యక్రియలు నిర్వహించారు.

SOURCE : ENADU

The post ఏనుగును నమ్మించి మోసం చేసిన మనుషులు appeared first on Vishwa Samvad Kendra Andhra Pradesh.