AYURVEDA – Vishwa Samvad Kendra Andhra Pradesh

ఆయుర్వేదాన్ని జ్యోతిష్యానికి జోడిస్తే మరిన్ని సత్ఫలితాలు

Krishna Murty Gunna — Tue, 12 Jul 2022 10:49:20 +0000

మీర్జాపూర్: ఆయుర్వేదానికి జ్యోతిషాన్ని జోడిస్తే సత్ఫలితాలు వస్తాయని, పలు వ్యాధుల చికిత్స సులభతరం అవుతుందని ఉత్తరప్రదేశ్‌లోని మీర్జాపూర్ ఆయుర్వేద కళాశాల ప్రిన్సిపాల్ డాక్టర్ కెఎస్ఆర్ ప్ర‌సాద్ తెలిపారు. తిరుపతిలోని ఎస్వీ ఆయుర్వేద కళాశాలలో ఆయుర్వేద శాస్త్రం, జ్యోతిష్య సమన్వయం అనే అంశంపై ఆయన ప్రసంగించారు.

ఆయుర్వేదం, జ్యోతిష శాస్త్రాలు వేద సంస్కృతి నుండి ఉద్భవించాయని, మానవుల ఆరోగ్య పరిరక్షణకు ఎంతగానో దోహదపడతాయని చెప్పారు. ఆయుర్వేద వైద్యులు మెడికల్ ఆస్ట్రాలజీలో ప్రవేశం పొంది అవగాహన పెంచుకోవడం ద్వారా, దీర్ఘకాలిక వ్యాధులకు జ్యోతిష్య శాస్త్రంలో పొందుపరిచిన ఔషధాలను ఉపయోగించడం ద్వారా మెరుగైన ఫలితాలు సాధించవచ్చన్నారు. తన 15 ఏళ్ల పరిశోధనలో ఆయుర్వేదానికి జ్యోతిషాన్ని జోడించడం ద్వారా చికిత్స సులభతరమైందన్నారు.

చిన్నపిల్లల వ్యాధులలో ముఖ్యంగా ఆటిజం, బుద్ధి మాంద్యం, సెరిబ్రల్ పాల్సీ లాంటి వ్యాధులను ముందుగా నయం చేయడానికి జ్యోతిష శాస్త్రం బాగా ఉపయోగపడిందన్నారు. ఆయుర్వేద వైద్య విద్యార్థులు మెడికల్ ఆస్ట్రాలజీని అభ్యసించడం ద్వారా భవిష్యత్ వ్యాధులు అవగాహన, దీర్ఘకాలిక వ్యాధుల చికిత్సను సులువుగా తెలుసుకోవచ్చన్నారు.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post ఆయుర్వేదాన్ని జ్యోతిష్యానికి జోడిస్తే మరిన్ని సత్ఫలితాలు appeared first on Vishwa Samvad Kendra Andhra Pradesh.

బ్లాక్ ఫంగస్ చికిత్సలో ఆయుష్ మందులు

Syam Korsipati — Mon, 31 May 2021 14:30:32 +0000

దేశంలో కొవిడ్‌ కేసులు కొద్దిగా తగ్గుముఖం పడుతున్నా.. బ్లాక్‌ ఫంగస్‌ మాత్రం ఆందోళనకు గురిచేస్తోంది. కొవిడ్‌, బ్లాక్‌ ఫంగస్‌ చికిత్సల్లో ప్రధానంగా అలోపతి వైద్యంపైనే ఎక్కువగా ఆధారపడుతున్నారు. ఇదే సమయంలో ప్రత్యామ్నాయ వైద్యంలోనూ కొవిడ్‌, బ్లాక్‌ ఫంగస్‌లను ఎదుర్కొనే సమర్థమైన చికిత్సలున్నాయని నిపుణులు వివరిస్తున్నారు. కేంద్ర ఆయుష్‌ మంత్రిత్వశాఖతో పాటు రాష్ట్ర ఆయుష్‌ శాఖ కూడా ఈ మహమ్మారి వ్యాధులను నయం చేయడానికి అవసరమైన చికిత్స విధానాలను ఇటీవలే అందుబాటులోకి తెచ్చింది. ఆయుర్వేద, హోమియో, యునానీ వైద్యాల్లో కొవిడ్‌, మ్యూకర్‌ మైకోసిస్‌ల చికిత్స, నివారణకు సంబంధించి నిపుణులు ప్రత్యేక ఔషధాలను పరిచయం చేశారు. బ్లాక్‌ ఫంగస్‌పై ఆయుష్‌ బాగా పనిచేస్తోందని వారు చెబుతున్నారు. కొవిడ్‌ బాధితులకు కూడా ఈ వైద్య విధానాలు కచ్చితంగా ఊరటనిస్తాయని స్పష్టం చేశారు. రోగ నిరోధక శక్తిని పెంపొందించడం ద్వారా నివారణలోనే కాకుండా చికిత్సలోనూ తోడ్పాటునందిస్తాయని పేర్కొన్నారు. అలోపతి వైద్యాన్ని వినియోగిస్తూనే.. ఆయుష్‌ వైద్య విధానాలను కూడా అనుసరించవచ్చని తెలిపారు. ఎటువంటి దుష్ఫలితాలు ఎదురు కావని వివరించారు. అయితే ఏదిపడితే అది… ఎలాపడితే అలా కాకుండా తప్పనిసరిగా నిపుణులైన డాక్టర్ల సూచనలు తీసుకునే తగిన వైద్య పద్ధతులను నిర్ణయించుకోవాలని స్పష్టం చేస్తున్నారు. ఇప్పటికే కరోనా వైరస్‌ లక్షణాలు స్వల్పంగా, మధ్యస్థంగా ఉన్న రోగులకు దివ్యంగా ఉపయోగపడే ఔషధం ఆయుష్‌-64. ఈ మాత్రను 15 రోజుల పాటు ఉదయం ఒకటి, రాత్రి ఒకటి చొప్పున వాడాలి. దీన్ని కేంద్ర ఆయుష్‌ మంత్రిత్వ శాఖ ఆమోదించింది.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post బ్లాక్ ఫంగస్ చికిత్సలో ఆయుష్ మందులు appeared first on Vishwa Samvad Kendra Andhra Pradesh.

నెల్లూరు ఆయుర్వేద వైద్యానికి మేం పూర్తిగా సహకరిస్తాం – ఆర్ ఎస్ ఎస్

Syam Korsipati — Wed, 19 May 2021 16:10:21 +0000

కరోనా నివారణ మరియు నిర్మూలనకు నెల్లూరు జిల్లా ముత్తుకూరు మండలం కృష్ణపట్నం గ్రామంలోని ఆయుర్వేద వైద్యులు శ్రీ ఆనందయ్య తయారుచేసి ప్రజలకు ఉచితంగా పంచుతున్న ఆయుర్వేద మందు తయారీకి కావలసిన అనుమతులు సంపాదించడంలోనూ, మందు తయారీలోనూ, పంపిణీలోనూ రాష్ట్రీయ స్వయంసేవక్ సంఘ్ సహకారం పూర్తిగా ఉంటుందని ఆర్ ఎస్ ఎస్ ఆంధ్రప్రదేశ్ ప్రాంత ప్రచార ప్రముఖ్ శ్రీ బయ్యా వాసు ప్రకటించారు.

ఈరోజు ఉదయం శ్రీ బయ్యా వాసు తో పాటు ఆర్ ఎస్ ఎస్ నెల్లూరు జిల్లా సంఘటనా కార్యదర్శి శ్రీ నవీన్, జిల్లా కార్యవాహ శ్రీ సుభాష్, జిల్లా సహ కార్యవాహ శ్రీ మల్లికార్జున రెడ్డి, ముత్తుకూరు ఖండ కార్యవాహ శ్రీ ప్రతాప్ రెడ్డి తదితరులు ఆయుర్వేద వైద్యులు శ్రీ ఆనందయ్య గారిని సందర్శించి ఆయన మందు తయారు చేస్తున్న విధానాన్ని, దాని పనితీరును, సాధించిన ఫలితాలను విచారించి తెలుసుకున్నారు.

ఈ సందర్భంగా శ్రీ బయ్యా వాసు మీడియాతో మాట్లాడుతూ ఏదైనా ఒక విషయం శాస్త్రీయంగా నిరూపితం కాకపోయినంత మాత్రాన అందులో శాస్త్రీయత లేనట్లా? అని ప్రశ్నించారు.

న్యూటన్ భూమ్యాకర్షణ సిద్ధాంతాన్ని తెలుపక ముందు భూమ్యాకర్షణ లేదా? ప్రతి చర్యకూ సమానమైన ప్రతిచర్య ఉంటుందన్న బోర్ సిద్ధాంతం వెలువడక ముందు సృష్టిలో చర్యకు ప్రతిచర్య లేదా? అని ఆయన ప్రశ్నించారు.

https://vskandhra.org/wp-content/uploads/2021/05/RSS.mp4

ఈ మందు స్వీకరించిన వారికి ఎందరికో జబ్బు నయమయిన దృష్టాంతాలు ఎన్నో కనిపిస్తూ ఉన్నా, ఎలాంటి దుష్పరిణామాలూ లేవని తెలుస్తూ ఉన్నా అనుమతులు లేవన్న సాకుతో ప్రభుత్వం ఆ మందు పంపిణీని అడ్డుకోవడం సమంజసం కాదని ఆయన అభిప్రాయపడ్డారు.

శ్రీరామనవమి నుండి సుమారుగా 20,000 మంది కరోనా పాజిటివ్ వచ్చిన వారికి కనీసం మాస్క్ కూడా లేకుండా శ్రీ ఆనందయ్య గారు వైద్యం చేశారని, తను గాని తన కుటుంబ సభ్యులు గాని కరోనా బారిన పడలేదని, ఆనండయ్య గారి ఆయుర్వేద మందు అద్భుతంగా పనిచేస్తున్నదన్న విషయానికి ఇంతకంటే నిదర్శనమింకేమి కావాలని ఆయన ప్రశ్నించారు.

ఇప్పటికైనా అధికారులు కళ్ళు తెరిచి కరోనా రోగులకు ఎంతో ప్రయోజనం కలిగించే సదరు ఆయుర్వేద ఔషధ పంపిణీకి మార్గం సుగమం చేయాలని ఆయన సూచించారు.

ఆయుర్వేదం, అలోపతి, హోమియో ఇలా ఈ వైద్య విధానంలోనైనా ఇప్పటివరకూ కరోనాకు ట్రయల్ అండ్ ఎర్రర్ పద్ధతిలోనే వైద్యం చేస్తూ ఉన్నారని, ఏ పద్ధతి కూడా పూర్తి ప్రామాణికమైనది కాదని ఆయన పేర్కొన్నారు.

https://vskandhra.org/wp-content/uploads/2021/05/RSS1.mp4

డబ్ల్యూహెచ్ఓ అనుమతి పొందిన ప్లాస్మా వైద్య విధానం వల్ల ఎలాంటి ప్రయోజనమూ లేదని తేలింది కదా? డబ్ల్యూహెచ్ఓ అనుమతి పొందిన రెమిడిసివర్ ఇంజక్షన్ వల్ల ఎలాంటి ప్రయోజనమూ లేదని తేలింది కదా? అని ఆయన ప్రశ్నించారు.

అలోపతిలో అసలు దుష్ఫలితాలు లేని మందులే లేవని ఆయన పేర్కొన్నారు. కరోనా వ్యాధి చికిత్సలో వాడుతున్న స్టెరాయిడ్స్ వల్ల రోగుల యొక్క షుగర్ లెవెల్స్ అధికాధికమవుతున్న సంగతిని ఆయన గుర్తు చేస్తూ…. అత్యంత ప్రాణాపాయ స్థితిలో అంబులెన్స్ లో వచ్చిన రోగులు కూడా కోలుకునేలా చేస్తున్న ఎలాంటి సైడ్ ఎఫెక్ట్స్ లేని ఈ ఆయుర్వేద మందును అడ్డుకోవడం ఎందుకని ఆయన ప్రశ్నించారు.

కనుక ఆర్ఎస్ఎస్ వైపునుంచి అన్ని విధాలుగా తాము సహకరిస్తామని, వేగంగా అనుమతులు పొందడానికి ప్రయత్నిస్తామని ఆయన తెలిపారు. జిల్లా కలెక్టర్ గారు కూడా వెంటనే స్పందించి ఆయుర్వేద మందు పంపిణీకి అవసరమైన అనుమతులు ఇప్పించాలని, అడ్డంకులు తొలగించాలని కోరారు.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post నెల్లూరు ఆయుర్వేద వైద్యానికి మేం పూర్తిగా సహకరిస్తాం – ఆర్ ఎస్ ఎస్ appeared first on Vishwa Samvad Kendra Andhra Pradesh.

ఆయుర్వేదమే మన ఆయువుపట్టు కానుందా?

Syam Korsipati — Sat, 02 Jan 2021 10:39:41 +0000

కరోనా వైరస్ ‌ను ఎదుర్కొనే ఆయుర్వేద ఫార్ములాల సామర్థ్యాన్ని పరీక్షించడానికి హైదరాబాద్ లోని సెంటర్‌ ఫర్‌ సెల్యూలార్‌ అండ్‌ మాలిక్యులర్‌ బయాలజీ(సీసీఎంబీ)తో కేరళ కొట్టక్కల్‌లోని ఆర్య వైద్యశాల(ఏవీఎస్‌) ఒప్పందం చేసుకుంది. ఆర్య వైద్యశాల 118 సంవత్సరాల పురాతన స్వచ్ఛంద సంస్థ. ఆయుర్వేద చికిత్సతోపాటు ప్రచారంలో నిమగ్నమై ఉంది. ఈ సంస్థ 500కుపైగా ఆయుర్వేద ప్రామాణిక సూత్రీకరణలను ఇప్పటివరకు అభివృద్ధి చేసింది. వీటిలో కొన్ని ఫార్ములాలు కొవిడ్‌ వైరస్ ‌ను సమర్థంగా ఎదుర్కొంటున్నట్లు ఏవీఎస్‌ ప్రాథమికంగా గుర్తించింది. వాటిని సీసీఎంబీ ప్రయోగశాలలో పెంచిన కరోనా వైరస్ ‌పై ప్రయోగించి యాంటీ వైరల్‌ సామర్థ్యాన్ని పరీక్షిస్తారు. ఇది స్పష్టమైన ఫలితాలను ఇస్తే ఈ పరిశోధనలు భారత్ లోని ఔషధ పరిశ్రమలో కీలక పురోగతికి దారి తీస్తుంది. భారత్‌ చాలా పురాతన విజ్ఞానాన్ని కలిగి ఉన్నా… పురాతన గ్రంథాలపై ఆధారపడిన ఆయుర్వేద ఫార్ములాల సామర్థ్యాన్ని పరీక్షించడానికి ఇప్పటివరకు సరియైన విధివిధానాలు‌ లేవు. ఇప్పటివరకూ మన ప్రభుత్వాలేవీ ఆ దిశగా ప్రయత్నించనే లేదు. ప్రస్తుత మోడీ ప్రభుత్వం ఆ దిశగా అడుగులు వేస్తున్నట్టు కనిపిస్తోంది.

కరోనా వైరస్ ‌పై పనిచేసే ఔషధాలను ప్రజలకు ఇచ్చే ముందు పలు చికిత్సా అవకాశాలను కఠినంగా పరీక్షించడం అత్యవసరం. అప్పుడే వీటికి శాస్త్రీయత ఉంటుంది. తమ ప్రయోగశాలకు వృద్ధి చేసిన కరోనా వైరస్ ‌పై ఔషధాలు పనిచేస్తాయో లేదో పరీక్షించే సామర్థ్యం ఉందని.. ఆయుర్వేద ఫార్ములాల్లోని యాంటీవైరల్‌ సామర్థ్యాన్ని పరీక్షించడానికి ఇది ఉపయోగపడుతుందని సీసీఎంబీ డైరెక్టర్‌ డాక్టర్‌ రాకేశ్ మిశ్ర అన్నారు.

ఆధునిక సైన్స్ ‌తో ఆయుర్వేద శాస్త్రీయ పరిజ్ఞానాన్ని ధ్రువీకరించే ప్రయత్నంలో సీసీఎంబీతో చేతులు కలిపామని ఏవీఎస్‌ సీనియర్‌ శాస్త్రవేత్త డాక్టర్‌ సి.టి.సులెమాన్‌ అన్నారు. ఎంపిక చేసిన ఫార్ములాల రసాయన మూల్యాంకనం శక్తివంతమైన అణువుల ఉనికి చూపించిందని.. తాజా ఒప్పందంతో మరింత లోతుగా పరిశోధనకు అవకాశం ఉంటుందన్నారు. గతంలో హిమాలయాల్లో పండించే పుట్టగొడుగులో యాంటీవైరల్‌ గుణాలు ఉన్నట్లు సీసీఎంబీ నిర్ధారించిన సంగతి తెలిసిందే.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post ఆయుర్వేదమే మన ఆయువుపట్టు కానుందా? appeared first on Vishwa Samvad Kendra Andhra Pradesh.

భారత్ లో ప్రపంచస్థాయి ఆయుర్వేద కేంద్రాన్ని ఏర్పాటు చేయనున్న WHO

Syam Korsipati — Fri, 13 Nov 2020 10:52:09 +0000

సంప్రదాయ వైద్యం కోసం భారత్‌లో ప్రపంచస్థాయి కేంద్రాన్ని ఏర్పాటు చేయనున్నట్లు ప్రపంచ ఆరోగ్య సంస్థ(డబ్ల్యూహెచ్‌ఓ) శుక్రవారం ప్రకటించింది.

‘ధన్వంతరి జయంతి’ని పురస్కరించుకుని జరిగే ఆయుర్వేద దినోత్సవం సందర్భంగా నేడు జయపుర(రాజస్థాన్‌), జమనగర్‌(గుజరాత్‌)లలో రెండు ఆయుర్వేద శిక్షణ, పరిశోధనా సంస్థలను ప్రధాని మోడీ వీడియో కాన్ఫరెన్స్‌ ద్వారా ప్రారంభించారు. ఈ కార్యక్రమంలో పాల్గొన్న డబ్ల్యూహెచ్‌వో డైరెక్టర్‌ జనరల్‌ టెడ్రోస్‌ అధానమ్‌ సంప్రదాయ వైద్యం కోసం భారత్‌లో ప్రపంచ స్థాయి కేంద్రాన్ని ఏర్పాటు చేయనున్నట్లు వీడియో సందేశం ద్వారా ప్రకటించారు. సంప్రదాయ వైద్యంపై అవగాహన కల్పించేందుకు, ఆయుర్వేద వైద్యంలో శిక్షణ, పరిశోధనలను మరింత బలోపేతం చేసేందుకు ఈ కేంద్రాన్ని ఏర్పాటు చేయనున్నట్లు తెలిపారు.

డబ్ల్యూహెచ్‌వో ప్రకటనపై ప్రధాని మోడీ ఆనందం వ్యక్తం చేశారు. ఆయుర్వేదం భారత వారసత్వ సంపద అని, దానికి ప్రపంచవ్యాప్త గుర్తింపు లభించడం గర్వంగా ఉందని ప్రధాని అన్నారు. భారత సంప్రదాయ విజ్ఞానం ఇతర దేశాలను సుసంపన్నం చేస్తుండటం సంతోషకరమన్నారు. సంప్రదాయ వైద్యం కోసం ప్రపంచస్థాయి కేంద్రాన్ని భారత్ ‌లో ఏర్పాటు చేయడం గర్వకారణమని తెలిపారు. ప్రపంచానికే ఔషధ కేంద్రంగా ఎదుగుతున్న భారత్‌ తాజా ప్రకటనతో ప్రపంచ సంరక్షణ కేంద్రంగా మారుతుందని ప్రధాని విశ్వాసం వ్యక్తం చేశారు. భారత్ కు ఇంత గొప్ప బాధ్యతను కల్పించిన డబ్ల్యూహెచ్‌ఓకు కృతజ్ఞతలు తెలిపారు. ‘ధన్వంతరి జయంతి’ని పురస్కరించుకుని 2016 నుంచి ఆయుష్‌ మంత్రిత్వ శాఖ ఏటా ఆయుర్వేద దినోత్సవాన్ని నిర్వహిస్తోంది. కొవిడ్‌ కారణంగా ఈ సారి ఈ వేడుకను వర్చువల్ ‌గా జరిపారు.

మరిన్ని జాతీయ, అంతర్జాతీయ వార్తలు, విశేషాల కోసం VSK ANDHRAPRADESH యాప్ ను డౌన్ లోడ్ చేసుకోవడానికి ఇక్కడ క్లిక్ చెయ్యండి.

The post భారత్ లో ప్రపంచస్థాయి ఆయుర్వేద కేంద్రాన్ని ఏర్పాటు చేయనున్న WHO appeared first on Vishwa Samvad Kendra Andhra Pradesh.