దేశవ్యాప్తంగా పెద్ద సంఖ్యలో సంఘ్‌లో చేరుతున్న యువత

జార్ఖండ్ లోని రాంచిలో జరిగిన అఖిల భారతీయ ప్రాంత ప్రచారక్ బైఠక్ గురించి రాష్ట్రీయ స్వయంసేవక్ సంఘ్ అఖిల భారతీయ ప్రచార ప్రముఖ్ సునీల్ అంబేకర్ మీడియాకు వివరించారు.
దేశవ్యాప్తంగా మొత్తం 227 మంది కార్యకర్తలు ఈ సమావేశంలో పాల్గొన్నారని, సమావేశంలో సంస్థాగత కోణంలో ముఖ్యమైన అంశాలపై చర్చ జరిగినట్లు తెలిపారు. రాంచీలోని సరళా బిర్లా యూనివర్శిటీ క్యాంపస్‌లో అఖిల భారతీయ ప్రాంత ప్రచారక్ బైఠక్ జూలై 12, 13, 14 తేదీలలో మూడు రోజుల పాటు నిర్వహించినట్లు తెలిపారు. పరస్పర చర్చల కోసం వివిధ సంస్థల సమన్వయ సమావేశం ఆగస్టు 31, సెప్టెంబర్ 1, 2 తేదీలలో కేరళలోని పాలక్కాడ్‌లో జరుగుతుందని వెల్లడించారు.

దేశంలోని యువత సంఘ్‌లో చేరాలని ఆకాంక్షిస్తున్నారని, పెద్దఎత్తున చేరుతున్నారని అన్నారు. సంఘ్ 2012లో ఆర్‌ఎస్‌ఎస్‌లో చేరండి అనే ఆన్‌లైన్ మాధ్యమాన్ని ప్రారంభించింది. ప్రతి యేటా 1.25 లక్షల మంది ఆన్‌లైన్ మాధ్యమం ద్వారా సంఘ్‌ చేపట్టే వివిధ కార్యకలాపాలలో పాల్గొంటున్నారు. ఈ ఏడాది కూడా జూన్ నెలాఖరు నాటికి 66,529 మంది సంఘ్‌లో చేరేందుకు సంప్రదించారని తెలిపారు.

ఈ ఏడాది నుంచి సంఘ్ శిక్షణ తరగతుల కూర్పు, పాఠ్యాంశాల్లో మార్పులు చేశామని, ఈ సంవత్సరం దేశవ్యాప్తంగా మొత్తం 72 తరగతులు (సంఘ్ శిక్షా వర్గ – 60, కార్యకర్త వికాస్ వర్గ I – 11, కార్యకర్త వికాస్ వర్గ II – 1) నిర్వహించబడ్డాయని, ఇందులో మొత్తం 20,615 మంది శిక్షణ పొందారన్నారు. 40 నుండి 65 సంవత్సరాల మధ్య వయస్సు గల వ్యక్తుల కోసం నిర్వహించిన 18 తరగతులలో 3,335 మంది అభ్యాసకులు పాల్గొన్నారు. గతేడాది నిర్వహించిన ప్రాథమిక విద్యా తరగతుల్లో కొత్తగా లక్ష మంది శిక్షణ పొందారు. అదేవిధంగా, మొదటిసారిగా సామాన్య స్వయం సేవకులకు దేశవ్యాప్తంగా ప్రారంభిక్ తరగతులు (మూడు రోజులు) నిర్వహించబడుతున్నాయని, ఇందులో ప్రాథమిక వాటితో పోలిస్తే రెట్టింపు సంఖ్యలో యువత పాల్గొంటున్నారని చెప్పారు.

2025 విజయదశమి (100 సంవత్సరాలు పూర్తి) నాటికి దేశంలోని గ్రామీణ ప్రాంతాల్లోని అన్ని డివిజన్‌లలో మరియు పట్టణ ప్రాంతాల్లోని అన్ని ప్రాంతాల్లో సంఘ్ పనిని విస్తరించాలని లక్ష్యంగా పెట్టుకున్నట్లు సునీల్ అంబేకర్ చెప్పారు. మార్చి 2024 నాటికి, దేశంలో దాదాపు 58,981 మండలాలు ఉన్నాయని, 36,823 మండలాల్లో దైనిందిన శాఖలు నడుస్తున్నాయని, మిగిలిన మండలాల్లో వారం వారం సమావేశాలు లేదా నెలకొకసారి సమావేశాల రూపంలో సంఘ్ కార్యకలాపాలు జరుగుతున్నాయన్నారు. నగరాల్లోని బస్తీల విషయానికొస్తే, 23,649 బస్తీలు ఉన్నాయని, వీటిలో 14,645 బస్తీలలో సంఘ్ కార్యం నిర్వహింపబడుతోందని వివరించారు. ప్రస్తుతం, దేశంలో 73,117 రోజువారీ శాఖలు మరియు 27,717 వారపు సమావేశాలు నడుస్తున్నాయి. ఇది కాకుండా, శాఖా పని లేదా పరిచయం లేని 1,58,532 గ్రామాల్లో జాగరణ్ పత్రికల ద్వారా ప్రజలకు సానుకూల సందేశాలు, ఆధ్యాత్మిక చింతనలు, సాధువుల సందేశాలను పంచుతోందని, 15 రోజుల్లో దేశంలోని 6.6 లక్షల గ్రామాలకు స్వయం సేవకులు చేరుకుని శ్రీరామ జన్మభూమి అక్షతల పంపిణీ చేశారని తెలిపారు.

ఈ సంవత్సరం పుణ్యశ్లోక్ అహల్యా దేవి హోల్కర్ త్రిశతాబ్ది సంవత్సరంగా జరుపుకుంటున్నామన్నారు. ప్రతికూల పరిస్థితులు ఎదురైనా తట్టుకొని పుణ్యశ్లోక అహల్యాదేవి ఆదర్శంగా నిలిచారని, ఆమె జీవిత సందేశాన్ని, జీవిత ఆదర్శాలను అందరికీ తెలిపేందుకు స్వయం సేవకులు ఏడాది పొడవునా వివిధ సంస్థలతో కలిసి పనిచేస్తారని తెలిపారు.

గ్రామీణ ప్రాంతాల అభివృద్ధిని దృష్టిలో ఉంచుకుని గోసేవ, గ్రామాభివృద్ధిని మేళవించి ప్రత్యేక ప్రణాళిక రూపొందిస్తున్నామని అన్నారు. ఈ రెండింటికి సంబంధించి గ్రామీణ ప్రాంతాల్లో కార్యక్రమాలు జరుగుతున్నాయన్నారు.తద్వారా గ్రామాల్లో పరిస్థితి మెరుగుపడుతుందని, యువత కూడా ఈ పనిలో భాగస్వాములు కావాలని విజ్ఞప్తి చేశారు.

సంఘ్ స్వయం సేవకులు దేశవ్యాప్తంగా సేవా కార్యక్రమాలు చేస్తున్నారని తెలిపారు. సేవతో పాటు స్వావలంబనకు కూడా ప్రాధాన్యత ఇస్తూ, మణిపూర్‌తో సహా అన్ని ప్రాంతాలలో స్వయం సేవకులు నిరంతరం సేవా కార్యక్రమాలు చేస్తున్నారని తెలిపారు.

పర్యావరణ పరిరక్షణకు సంబంధించి సంఘ్ కార్యకలాపాలకు ప్రజల నుంచి కూడా విశేష స్పందన వస్తోందన్నారు. పంచ పరివర్తన సమస్యలకు సంబంధించి కూడా సన్నాహాలు జరుగుతున్నాయని, సమాజంలో నిరంతర సంప్రదింపులు కూడా కొనసాగుతున్నాయని చెప్పారు.

ఎన్నికల పనుల్లో సంఘ్ ప్రత్యక్షంగా పాల్గొనడం లేదని ఒక ప్రశ్నకు సమాధానంగా చెప్పారు. సంఘ్ ప్రజాభిప్రాయాన్ని మెరుగుపరచడం మరియు ప్రజాభిప్రాయాన్ని మేల్కొల్పడం వంటి పని చేస్తుందన్నారు. ఈసారి కూడా స్వయం సేవకులు చిన్న చిన్న సదస్సుల ద్వారా ప్రజాభిప్రాయాన్ని మెరుగుపరిచే పని చేశారని, ప్రజాస్వామ్యంలో ప్రజలే సర్వోన్నతులని, అన్ని పార్టీలు ప్రజా తీర్పును గౌరవించాలని అన్నారు.

మోసం, బలవంతం లేదా దురాశతో మతం మారకూడదని, ఇది పూర్తిగా అనైతికం అని అన్నారు. దీన్ని అరికట్టేందుకు చట్టాలు కూడా ఉన్నాయని, ప్రతి ఒక్కరూ చట్టాన్ని పాటించాలన్నారు.

ఎమర్జెన్సీ విధించడం సరికాదని, ప్రజాస్వామ్యంలో ఇలాంటివి జరగకూడదని ఒక ప్రశ్నకు సమాధానంగా చెప్పారు. రాష్ట్రీయ స్వయంసేవక్ సంఘ్ కూడా ఎమర్జెన్సీకి వ్యతిరేకంగా పోరాడిందన్నారు. ఆ సమయంలో వందలాది సంఘ్ స్వయం సేవకులు వేధింపులను ఎదుర్కోవలసి వచ్చిందని పేర్కొన్నారు.