భారతదేశ వైమానిక దళాధిపతి, ఎయిర్ చీఫ్ మార్షల్ విఆర్ చౌదరి… మిగ్ 29 యుద్ధ విమానాన్ని 1.9 మ్యాక్‌ల వేగం అంటే శబ్ధవేగానికి రెండింతల స్థాయి వేగంతో నడిపారు. ఈ వేగంతో విమానం దూసుకుపోతున్న దశలో పైకప్పు ఎగిరిపోయిన దశలోనే అత్యంత చాకచక్యంగా దీనిని గమ్యస్థానానికి చేర్చారు. అదే విధంగా పదాతిదళం, నౌకాదళం ప్రధానాధికారులు కూడా తమ వీరోచిత విన్యాసాల క్రమాన్ని సగర్వంగా ఏకరువు పెట్టుకుంటూ ఓ పుస్తకరూపంలో తీసుకువచ్చారు. ఇండియాస్ మోస్ట్ ఫియర్‌లెస్ – 3 పేరిట వెలువడిన ఈ పుస్తకంలో ఈ ముగ్గురు తమ అత్యంత అరుదైన పది సాహస ఘట్టాలను పొందుపర్చారు.
మిగ్ 29తో ఓ ఆటాడుకున్న ఎయిర్ చీఫ్ మార్షల్ చౌదరి తాను మిగ్‌ను భూమికి 12.3 కిలోమీటర్ల ఎత్తున అత్యంత వేగంగా, శబ్ధవేగాన్ని మించిపోయి నడిపిన అనుభవాన్ని చాటారు. ఈ దశలో వెలుపలి ఉష్ణోగ్రతలు మైనస్ 53 డిగ్రీలు ఉన్నాయని తెలిపారు. గడ్డకట్టుకుపోయే చలి వాతావరణంలో ఈ స్పీడ్‌లో మిగ్‌ను నడపడం, శబ్ధవేగాన్ని మించిపోయిన దశలో రగిలే వేడితోనే సాధ్యమని చమత్కరించారు.
తమ సాహసాలతో వెలువడ్డ పుస్తకావిష్కరణ దశలో త్రివిధ బలగాల అధిపతులు మాట్లాడారు. విలేకరుల ప్రశ్నలకు సమాధానం ఇచ్చారు. ఈ పుస్తకావిష్కరణ సభకు పలువురు సీనియర్ సైనికాధికారులు, సైనిక సిబ్బంది కుటుంబ సభ్యులు, విభిన్న రంగాలకు చెందిన వారు హాజరయ్యారు.
